I MURI aˈe i to ˈna tereraa i te mau tuhaa fenua no Mediteranea e to ˈna faaôraa ia ˈna i roto i te poritita i Surakusa, te hoê oire Heleni, i Sicile, ua hoˈi Platon i Ateno. I reira, ua haamau oia i te hoê fare haapiiraa no nia i te philosophia e te ite aivanaa. Faahiti-pinepine-hia ei fare haapiiraa teitei matamua o Europa, ua riro te reira ei pu maimiraa i te pae o te numera e te philosophia.

Ua niuhia e rave rahi tiaturiraa a e mirioni taata, oia atoa tei parau e e Kerisetiano ratou, i nia i ta Platon haapiiraa. Ua manaˈo e rave rahi ma te hape e ua niuhia te reira i nia i te Bibilia. I roto i tera mau haapiiraa, te vai ra te manaˈo e e mea te ora ˈtu ia pohe te taata.

Ua anaanatae roa Platon i te oraraa i muri aˈe i te pohe. Ia au i te hoê buka, “o te pohe-ore-raa o te varua hoê o ta Platon tumu parau au roa ˈˈe.” (Body and Soul in Ancient Philosophy) Ua papu ia ˈna e “e mea te ora ˈtu ia pohe te taata o te haamaitaihia aore ra faautuahia” no te ora i roto i te ao varua ia au i to ˈna huru oraraa i te fenua. a

I te roaraa e iva senekele, ua ohipa noa te fare haapiiraa philosophia a Platon mai 387 hou te Mesia e tae atu i 529 i muri aˈe i te Mesia. Ua matauhia ˈtura ta Platon mau haapiiraa i te mau fenua ta Heleni e Roma i faatere. Ua farii atoa te philosopho ati Iuda ra o Philète no Alesenaderia oia atoa e rave rahi tia haapaoraa a te Amuiraa faaroo Kerisetiano i ta Platon i haapii. Ei faahopearaa, ua ô riirii noa mai te mau manaˈo philosophia mai te oraraa ˈtu te tahi mea ia pohe te taata i roto i te mau haapiiraa ati Iuda e Kerisetiano.

Ia au i te hoê buka, “ua taaihia te mau haapiiraa Kerisetiano atoa, i nia i te tahi faito, i te haapiiraa philosophia Heleni o tera tau, ta Platon iho â râ. No te tahi mau Kerisetiano i farii i te philosophia . . . mea tano ia parau e e Kerisetiano e turu ra ia Platon ratou.” (The Anchor Bible Dictionary) A hiˈo na i to muri nei mau manaˈo.

Ta Platon i parau: “[I te poheraa,] te hopea hoi o te taatoaraa, e haere te parauhia ra te varua pohe ore, i mua i te tahi atu mau atua, i reira . . . o ˈna e tia ˈi ma te itoito no to ˈna maitai, ma te rurutaina râ no to ˈna ino.”—Plato—Laws, Buka XII.

Ta te Bibilia e parau ra: E taata tatou, aita râ e mea e ora ˈtu ia pohe tatou. Hoê â aho to te taata e to te animara, hoê â ˈtoa ïa faahopearaa to raua. b A hiˈo na i te mau irava i muri nei:

• “I hamanihia te taata matamua o Adamu ei taata ora.”—Korinetia 1, 15:45.

• “Ua parau ihora te Atua, Ia fanau mai te fenua nei i te mau mea ora ma to ratou ra huru, te mau puaa, te mau mea e nee haere, e te mau manu avae maha o te fenua ra, ma to ratou ra huru: e oia mau atura.”—Genese 1:24.

• “Ia pohe noa ˈtu vau.”—Te mau tavana 16:30.

• “O tei rave i te hara ra, o te pohe ïa.”—Ezekiela 18:4.

Aita te Bibilia e haapii ra e e mea te ora ˈtu ia pohe te taata. A uiui na: ‘Ua niuhia anei ta ˈu mau tiaturiraa i nia i te Bibilia aore ra i nia i ta Platon mau haapiiraa?’