IA AU I TE BIBILIA
Te viivii-ore-raa
Mea faufaa anei no te Atua ia mâ to tatou tino?
“E tamâ hua tatou ia tatou iho i te mau viivii atoa o te tino e te varua.”—Korinetia 2, 7:1.
TA TE BIBILIA E PARAU RA
Te here mai ra te Atua poiete e te hinaaro atoa ra ia maitai to tatou ea e oraraa. Te parau ra te Atua: “Ia haapao maite to aau i ta ˈu nei ture: e maoro hoi to oe ra pue mahana e to oe ra mau matahiti, e te ora hoi e te hau ta te reira e amui atoa mai ia oe ra.” (Maseli 3:1, 2) Te itehia ra te here o te Atua i te huitaata i roto i ta ˈna mau ture no te nunaa Iseraela. Ua horoa hoi te reira i te mau aratairaa taa maitai no nia i te vai-mâ-raa o te tino e te faarueraa i te mea viivii. (Deuteronomi 23:12-14) Ia haapao te mau Iseraela i tera mau ture aveia tano, e fanaˈo ratou i te ea maitai e eita atoa e roohia i te mau maˈi i itehia i roto i te tahi atu mau nunaa tei ore i fanaˈo i te ture mai i Aiphiti.—Deuteronomi 7:12, 15.
I teie atoa mahana, te vai ra te nunaa taata ‘e tamâ hua ia ratou i te mau viivii atoa o te tino.’ I rotopu i te mau peu iino ta ratou e haapae, te vai ra te puhipuhiraa i te avaava, te inu-hua-raa i te ava e te raveraa i te raau taero. Eita ratou e roo-hanoa-hia i te maˈi i te pae tino e feruriraa e e ora maoro atu â ïa. I te mea aita tatou e faataa ê ra i te toea o te huiraatira, te tâuˈa mau ra tatou ia vetahi ê ma te haapao i te mau ture aveia a te Atua no nia i te viivii-ore-raa.—Mareko 12:30, 31.
No te Atua, mea faufaa anei ia viivii ore i te pae morare e varua?
“Uumi iho i to outou mau melo . . . mai te faaturi, te parau faufau ra, te paia ra, te hinaaro tia ore ra, e te nounou taoˈa, e haamori idolo ïa. No taua mau mea ra e roohia mai ai te tamarii faaroo ore i te riri o te Atua.”—Kolosa 3:5, 6.
TA TE BIBILIA E PARAU RA
Mai tei parauhia i te haamataraa, te faaitoito ra te Bibilia ia “tamâ hua tatou ia tatou iho i te mau viivii atoa o te tino e te varua.” I te tau o Iesu, e rave rahi taata, oia atoa te mau tia haapaoraa ati Iuda, tei tutava roa ino ia mâ to ratou tino, aita râ i haapao i te mau ture aveia a te Atua i te pae morare e varua. (Mareko 7:1-5) No te faaafaro i to ratou feruriraa, ua na ô Iesu: “O to rapae au nei ia ô i roto i te taata ra, e ore oia e viivii i te reira.” Ua faataa hoi Iesu, e haere hoi te reira i roto i te opu i te vahi e taa ê ai te ino o te maa a faaruehia ˈtu ai i rapae. Ua na ô râ oia: “O te mea no roto mai i te taata ra, o te mea ïa e viivii ai te taata. No roto mai hoi i te aau taata te manaˈo ino, te faaturi, te poreneia, te taparahiraa taata, te eiâ, te nounou taoˈa, te feii, te haavare, te tiaâ, te miimii, . . . e te aoaoa: na roto anaˈe te reira mau mea iino . . . e viivii ai te taata.”—Mareko 7: 18-23.
Ia au i ta Iesu mau parau, ia tamâ maitai te taata i to ratou tino, eita râ e haapao i ta te Atua mau ture aveia i te pae morare e varua, e au ratou i te auˈa o rapae anaˈe tei mâ, i roto râ, ua repo roa ïa!—Mataio 23:25, 26.
Mea tano anei te mau ture aveia Bibilia?
“Teie hoi te hinaaro i te Atua, o te haapao i ta ˈna ra parau: e ere hoi ta ˈna parau i te mea teimaha.”—Ioane 1, 5:3.
TA TE BIBILIA E PARAU RA
Te taio ra tatou i roto i te Mika 6:8: “Eaha ta Iehova hinaaro ia oe ra maori râ o te rave i te parau-tia, e ia hinaaro hoi i te aroha, e te haere ma te haehaa i te aro o to Atua?” E ere anei teie i te titauraa tano roa ˈˈe? Hau atu â, te hinaaro ra te Atua poiete ia auraro tatou ia ˈna ma te here. E oaoa mau hoi tatou a na reira ˈi. (Salamo 40:8) Ia hape tatou, e aroha mai te Atua. “Mai te aroha o te metua i ta ˈna ra mau tamarii, o to Iehova ïa aroha i te feia i mǎtaˈu ia ˈna ra. Ua ite hoi oia i to tatou huru; te manaˈo ra oia e, e repo tatou” aore ra e taata paruparu e te tia ore.—Salamo 103:13, 14.
Ei haapotoraa, e faaite ta te Atua mau ture aveia no nia i te viivii ore i te pae tino, morare e varua i to ˈna maitai e to ˈna here ia tatou. E itehia to tatou paari e here ia ˈna ia farii tatou i te haapao i tera mau ture aveia.
E au atoa outou . . .
TE PARE TIAIRAA
Eaha to te Atua manaˈo i te puhipuhiraa avaava?
Aita te Parau a te Atua i faahiti no te avaava, e nafea ïa ia ite i to te Atua manaˈo?
