“E ore mau te Atua e rave i te parau ino.”—Ioba 34:12.

TA TE TAATA E PARAU RA

No vetahi, e tupu te mau mea atoa i te hinaaro o te Atua. Te tiaturi nei ïa ratou o ˈNa te tumu e mauiui ai tatou. Ia tupu te ati natura, te manaˈo ra ratou tera te ravea ta te Atua e faaohipa ra no te faautua i tei rave i te hara.

TA TE BIBILIA E PARAU RA

E ere te Atua te tumu ia mauiui tatou. Te na ô râ hoi ia faaruru tatou i te mau tamataraa, mea hape ia parau: “Ua haavarehia vau e te Atua.” No te aha? No te mea “e ore roa hoi te Atua e vare i te ino, e ore roa hoi oia e haavare i te taata.” (Iakobo 1:13) E ere te Atua te faatupu ra i to tatou mau fifi aore ra mauiui, mea ino roa hoi ia na reira! Te faaitehia ra te Atua mai tei ore “e rave i te parau ino.”—Ioba 34:12.

Mai te peu e ere te Atua, o vai ïa aore ra no te aha tatou e mauiui ai? Ma te peapea mau, e pinepine te taata i te hamani-ino-hia e te tahi atu taata tia ore. (Koheleta 8:9) Hau atu â, e faaruru paha tatou i te ati no te tahi tupuraa manaˈo-ore-hia. (Koheleta 9:12) Te haapii atoa ra te Bibilia o “te arii o teie nei ao,” Satani te Diabolo, te tumu o te mauiui o te taata no te mea “te vai noa nei to te ao atoa i raro aˈe i taua varua ino ra.” (Ioane 12:31; Ioane 1, 5:19) O Satani ïa te tumu, e ere râ te Atua!

“Aroha ˈtura to ˈna aau i te pohe rahi o Iseraela.”—Te mau tavana 10:16.

TA TE TAATA E PARAU RA

Te manaˈo ra vetahi aita te Atua e tâuˈa ra ia fifihia tatou. Ia au i te tahi taata papai buka, aita te Atua e aroha ra ia mauiui tatou. No ˈna, mai te peu te vai ra te Atua, e ere ïa oia i te mea tâuˈa i te taata.

TA TE BIBILIA E PARAU RA

E ere roa ˈtu te Atua mai tera. Te haapii ra hoi te Bibilia te oto ra oia ia ati tatou e ua fatata roa atoa i te haamou i te mauiui. A hiˈo na e toru haapiiraa Bibilia tamahanahana mau.

Ua ite maitai te Atua to tatou mauiui. Mai te taime matamua i mauiui ai te taata, aita e roimata ta Iehova a i ore i ite no te mea “te hiˈo maira to ˈna mata” i te mau mea atoa. (Salamo 11:4; 56:8) I tahito ra, ua ite te Atua a hamani-ino-hia ˈi ta ˈna mau tavini e ua na ô: “Ua hiˈo papu vau i te pohe o to ˈu ra mau taata.” Ua hiˈo noa anei te Atua i to ratou mauiui? Aita, ua na ô faahou Oia: “Ua ite hoi au i to ratou oto.” (Exodo 3:7) Ua tamahanahanahia e rave rahi taata i tera noa parau. Te ite ra hoi te Atua i to tatou mau mauiui atoa tae noa ˈtu te mau fifi ta vetahi ê e ore e ite ra aore ra e taa ra.—Salamo 31:7; Maseli 14:10.

Te oto ra te Atua ia mauiui tatou. Aita noa te Atua ra o Iehova i ite i to tatou mauiui, te oto atoa ra râ o ˈNa. Ua peapea roa te Atua a fifihia ˈi ta ˈna mau tavini. Te parau ra te Bibilia: “Aroha ˈtura to ˈna aau i te pohe rahi o Iseraela.” (Te mau tavana 10:16) Noa ˈtu to ˈna hau ê, te tâuˈa mau ra te Atua i te feia e mauiui ra! Mai te huru ra o ˈna atoa te mauiui ra! E Atua ‘aroha e te hamani maitai rahi’ mau Iehova. (Iakobo 5:11) Hau atu â, te tauturu mai ra Iehova ia faaoromai i te mauiui.—Salamo 121:1, 2.

E faaore te Atua i te mauiui. Ia au i te Bibilia, e faaore te Atua i te mauiui o te taata atoa i nia i te fenua nei. Maoti to ˈna Basileia i te raˈi, e taui roa Iehova i te mau mea atoa. Te fafau ra te Bibilia: “E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.” (Apokalupo 21:4) Eaha te tupu no te feia pohe? E faatia mai te Atua ia ratou no te ora i nia i te fenua a oaoa ˈtu ai i te oraraa e a muri noa ˈtu. (Ioane 5:28, 29) E haamanaˈo ra anei te taata i te mauiui ta ratou i faaoromai? Eita, teie hoi ta Iehova e fafau ra: “E ore hoi tei mutaaihora e manaˈohia, e ore e faatupu-faahou-hia i roto i te aau.”—Isaia 65:17. b