MEA maoro te manaˈoraahia na te taata anaˈe i hamani i te faanahoraa o te faatere i te matini. Mea hape roa râ! Ua itehia te reira i roto i te tahi manumanu o te patia i te mau raau no te ote mai i te tapau. E itehia o ˈna i roto i te mau aua atoa ati aˈe ia Europa. a

Mea apî anaˈe tera manumanu, e nehenehe o ˈna e ouˈa oioi i nia fatata maha metera i roto noa hoê tetoni. Te auraa, ua hau atu 400 te iti o te mama o to ˈna tino! E nehenehe o ˈna e moe i te taime noa o te hoê amoraa mata. No te pee mai tera, e titauhia ia haa na avae e piti i muri ma te hoê â puai i te hoê â taime. Eaha ta ˈna ravea no te na reira?

A hiˈo na: Ua itehia e te mau aivanaa e piti ravea o te tapea i te niaraa o na avae e piti i muri o teie manumanu. Ia ouˈa o ˈna, e mau maitai na avae e piti i muri maoti tera ravea e e haa raua i te hoê â taime. Aita anaˈe, e ohu hanoa te manumanu a ouˈa ˈi!

Ia ouˈa te mau manumanu rahi aˈe, e faaohipa ratou i te mau uaua uira o to ratou roro ia mau maitai to ratou avae. No teie râ manumanu, ua maoro roa ïa ia na reira oia. Te tumu ïa o tera na ravea e piti o te ara ia ore na avae ia hauti aˈe. Te na ô ra te tahi taata papai buka e aivanaa atoa o Gregory Sutton, “ua matauhia i te manaˈo na te taata i hamani i te faanahoraa o te faatere i te matini.” Eaha te tumu? Ua na ô oia: “Aita tatou e hiˈo maitai ra [i te tahi atu mau vahi].”

Eaha to oe manaˈo? Mea tupu noa anei te ravea o te tapea i na avae i muri o te manumanu ote tapau aore ra mea poietehia?