Piri i te hoê matahiti to te mau taeae o te Betela rohiraa no te hamani i te pu radio WBBR i Staten Island, i te oire o New York. Ua tamâ ratou i te fenua, ua hamani i te hoê fare rahi no te mau rave ohipa e te tahi atu ei vairaa taihaa. I muri iho, haamata ˈtura te mau taeae i te tamaumau i te mau taihaa haapuroro na roto i te radio. E faaruru râ ratou e rave rahi fifi.

E ere roa ˈtu mea ohie ia tamau i te pou radio. Mea tamau hoi tena pou e 91 metera te roa i nia e piti pou raau e 61 metera te teitei. Aita râ i haere. Ua ani ïa te mau taeae i ta Iehova tauturu. Ua parau o Calvin Prosser: “Ahani ua mau ia matou tera pou radio i te taime matamua, e huti ïa matou i to matou reva.” Ua haamauruuru te mau taeae ia Iehova. E fifi ê atu râ ta ratou i farerei.

A tahi ra te Feia haapii Bibilia a faaohipa ˈi i te haapurororaa radio. E ere atoa mea ohie ia hoo mai i te mau taihaa no te reira. Ua faaohipa ïa te mau taeae i te mau taihaa ta te hoê taata i hamani. Aita ratou i hoo mai i te taoˈa haapuai reo, ua faaohipa râ i to te niuniu paraparau. Faaoti aˈera te mau taeae e tamatamata i te reira i te hoê po i Fepuare. Haapuroro aˈera ratou i te mau arueraa ia Iehova ta ratou i himene. Te haamanaˈo ra o Ernest Lowe e a himene ai te mau taeae, ua taniuniu mai o taeae Rutherford. b Ua faaroo  hoi oia ia ratou e himene ra i roto i ta ˈna radio i Brooklyn, e 25 kilometera te atea.

“Faaea i te maniania,” ta taeae Rutherford ïa i parau. “E au ra e te tutuô ra outou!” Tupohe oioi atura te mau taeae i te radio no te haama. Ua ite râ ratou e ua ineine ratou no te faaohipa i te radio.

I te 24 no Fepuare 1924, i te haapurororaa matamua, ua parau taeae Rutherford e faaohipahia te pu radio “no te ohipa ta te Mesia te Arii i faaue mai e rave.” Te fa o te reira, “o te tautururaa ïa i te mau taata atoa ia taa i te Bibilia e te auraa o te anotau ta tatou e ora nei.”

Ua tere maitai te haapurororaa matamua. E 33 matahiti te faaohiparaahia te pu radio WBBR no te haapuroro i te ohipa a te faanahonahoraa a Iehova.

I Tiurai 1924, ua ruru te Feia haapii Bibilia i Columbus, Ohio no te hoê tairururaa. No te mau fenua atoa mai ratou, e ua faaroo ratou i te mau oreroraa parau na roto i na reo Arabia, Beretane, Farani, Heremani, Heleni, Honegeria, Italia, Lituanie, Poronia, Rusia, Scandinavie, e Ukraine. Ua haapurorohia te tahi mau oreroraa parau na roto i te radio, e ua piahia te tahi mau tumu parau tairururaa i roto i te Ohio State Journal i na mahana tataitahi.

I te Mahana maha 24 no Tiurai, hau i te 5 000 taeae e tuahine tei haere e poro na te oire i tupu ai te tairururaa. Piri i te 30 000 buka ta ratou i opere e e tausani haapiiraa Bibilia tei faaterehia. Ia au i Te Pare Tiairaa, “o te taime oaoa roa ˈˈe ïa o te tairururaa.”

I te Mahana pae 25 no Tiurai, ua taio taeae Rutherford ma te mǎtaˈu ore i te tahi poroi faahapa i te mau tia faaroo. Ua parau o ˈna e aita te mau tia poritita, faaroo e tapihooraa i haapii i te taata i te parau mau no nia i te Faatereraa arii a te Atua, ta ˈna e faaohipa no te haamaitai i te huitaata. Ua parau atoa o ˈna e ua hape teie mau tia i te tururaa i te Amuitahiraa o te mau hau faatere, a parau ai e tera ta te Atua ravea no te faatere i te fenua. Ua titauhia ia faaite te Feia haapii Bibilia ma te itoito rahi i teie poroi i te taata.

I muri iho, ua faataahia i roto i Te Pare Tiairaa e ua puaihia te faaroo o te mau taeae e tuahine tei putuputu i te tairururaa i  Colombus. Ua itoito-roa-hia ratou no te poro noa ˈtu te patoiraa e tiai mai ra. Te haamanaˈo ra o Leo Claus tei haere i tera tairururaa: “Ua faarue matou i te tairururaa ma te oaoa, inaha ua ineine matou no te poro haere i teie poroi faahapa.”

I Atopa, e mirioni api parau Ecclesiastics Indicted ta te Feia haapii Bibilia i opere. Ua piahia i roto ta taeae Rutherford i parau no nia i te mau tia faaroo. I te oire iti o Cleveland, i Oklahoma, no oti noa ˈtura taeae Frank Johnson i te opere i ta ˈna mau api parau. Ua tiai ïa o ˈna e 20 minuti ia haere mai te mau taeae e tuahine e tii ia ˈna. Ua tapuni o ˈna na pihai iho i te hoê fare pure no te mea ua riri te tahi mau tane o te oire a imi noa ˈi ia ˈna. Ia ˈna i ite e aita hoê aˈe taata i roto i te fare pure, tomo atura oia e tuu haavitiviti ihora i te mau api parau Ecclesiastics Indicted i nia i te parahiraa tataitahi e i roto i te Bibilia a te perepitero. Haavitiviti ihora oia i te haere i rapae. Inaha, te toe ra maa taime iti, haere atura oia i roto e piti atu fare pure e ua vaiiho faahou oia i te mau api parau mai ta ˈna i rave i roto i te fare pure matamua.

Hoˈi atura taeae Franck i te vahi i reira oia e tiihia mai ai. Ua tapuni o ˈna i muri mai i te hoê titoraa mori a tamoemoe noa ˈi i te mau tane e imi ra ia ˈna. Ua tere mai ratou na pihai iho, aita râ ratou i ite ia ˈna. Aita i maoro tae mai nei te mau taeae e tuahine no te tii mai ia taeae Franck e faarue aˈera ratou pauroa i taua vahi ra.

Te faatia ra hoê o ratou: “A tere ai matou, ite atura matou i na fare pure e toru. Ua piri i te 50 taata i mua i te fare pure tataitahi. Te taio ra vetahi o ratou i te api parau e te faaite ra te tahi atu i te reira i te perepitero. Auaˈe iho â matou i faarue oioi i te oire! Mauruuru roa matou ia Iehova no to ˈna tautururaa mai ia ite matou eaha te rave. Maoti Iehova, ua tere maitai te pororaa e aita matou i noaahia.”

Ua poro te Feia haapii Bibilia ma te mǎtaˈu ore i te tahi mau fenua. I Farani apatoerau ua poro Józef Krett i te feia heru no Poronia. E vauvau o ˈna i te oreroraa parau: “Fatata te feia pohe i te faatiahia mai.” I te opereraahia te mau titau-manihini-raa na te oire, ua faaara te perepitero i te feia faaroo eiaha e haere atu. Tera râ, hau atu i te 5 000 taata tei haere e faaroo i tera oreroraa parau, oia atoa te perepitero. Ua titau manihini taeae Krett i te perepitero ia faataa i ta ˈna mau tiaturiraa, aita râ oia i hinaaro. Ua opere taeae Krett i te mau buka e buka rairai e vai ra ia ˈna. Ua hinaaro mau â te taata e ite hau atu â no nia i te Parau a te Atua.—Amosa 8:11.

I Afirika, ua poro taeae Claude Brown i te parau apî oaoa i te Côte-de-lˈOr, o Ghana ïa i teie mahana. Maoti ta ˈna mau oreroraa parau e te mau papai ta ˈna i opere, ua parare oioi te parau mau na tera fenua. Ua haere John Blankson o te haapii ra i te toroa taote raau e faaroo hoê oreroraa parau ta taeae Brown. Ua taa ia ˈna e tera te parau mau. Te faatia ra o ˈna: “Ua oaoa roa vau i te iteraa i te parau mau e ua faaite au i te reira i e rave rahi taata i te fare haapiiraa.”

I te hoê mahana, ua haere John i te hoê Ekalesia no Beretane no te uiui i te perepitero  no nia i te Toru tahi. Ua ite hoi o ˈna e ere teie haapiiraa no roto mai i te Bibilia. Tiahi atura te perepitero ia ˈna ma te parau: “E ere oe i te Kerisetiano, no te Diabolo hoi oe. Haamoˈe to oe hohoˈa!”

Hoˈi atura John i te fare. Papai atura oia i te hoê rata i te perepitero ia farerei raua i te vahi taata no te paraparau no nia i te Toru tahi. Ua ani te perepitero ia John ia haere e hiˈo i te orometua tuatoru o tei ui ia ˈna e ua papai iho â anei o ˈna i te perepitero.

“E, Orometua,” ta John ïa i parau.

Faaue ihora te Orometua ia papai John i te perepitero no te tatarahapa. Papai atura John:

“Ua ani mai ta ˈu Orometua ia faaore mai na i ta ˈu hapa. E tatarahapa iho â vau mai te peu e farii oe e mea hape ta oe e haapii nei.”

Hitimahuta roa te Orometua e ani atura: “Blankson, tera iho â ta oe e hinaaro e papai?”

“E. Tera noa.”

“E tiavaruhia oe i te fare haapiiraa. Eita ta oe e nehenehe e faaea mai mai te peu e faaino oe i te perepitero o te hoê haapaoraa ta te hau fenua e turu nei.”

“Orometua, . . . ia haapii mai oe ia matou e aita matou i taa maitai te tahi ohipa, eita anei matou e uiui ia oe?”

“Oia.”

“Hoê â huru i roto i tera tupuraa. Ua haapii mai tera taata i te Bibilia ia matou e ua ui atu vau te tahi mea. Inaha aita i haere ia ˈna ia pahono mai, no te aha ïa vau e papai ai i te hoê nota no te tatarahapa ˈtu?”

Aita Blankson i tiavaruhia e aita hoê aˈe rata tei haponohia.

No nia i te ohipa tei ravehia i te matahiti 1924, te faataa ra Te Pare Tiairaa: “E nehenehe iho â tatou e parau mai ia Davida: ‘Ua tatua mai oe ia ˈu i te puai i te aroraa.’ (Salamo 18:39, Te Bibilia Moˈa ra) Ua itoitohia mau â matou i taua matahiti ra, ua ite hoi matou i te rima o te Fatu. . . . Ua poro ta ˈna mau tavini taiva ore . . . i te parau apî ma te oaoa.”

I muri aˈe, ua haamau te mau taeae i te tahi atu pu radio i pihai iho i Chicago. Ua piihia taua pu radio apî ra WORD. Ua faaohipa ïa ratou i te mau taihaa haapurororaa e faaroo ai to te atea ê roa, tae roa ˈtu i te pae apatoerau i Kanada, i te parau apî oaoa.

I te matahiti 1925, ua tauturu Iehova i te mau taeae ia taa i te mau tatararaa faahiahia no nia i te Apokalupo pene 12. No teie mau faataaraa apî, ua faaea vetahi i te tavini ia Iehova. Area te tahi atu, ua oaoa ïa i te taa-maitai-raa ia ratou te mau mea i tupu i te raˈi e te faahopearaa o te reira i nia i te mau tavini a te Atua i te fenua nei.