MEA faufaa roa te upaupa no te nunaa Iseraela. Pinepine te Bibilia i te faahiti i te mau taata o te hauti i te upaupa e o te himene. E rave rahi tuhaa o te Bibilia, e himene ïa mai te Salamo, te Sire a Solomona e te Oto o Ieremia. Ia au i te tahi buka, te faaite maitai ra te Bibilia i faaohipa na te nunaa Iseraela i te upaupa i roto e rave rahi tuhaa o to ratou oraraa.

Te upaupa i te mau mahana atoa. I hauti na te nunaa Iseraela i te upaupa no te faaite i to ratou huru aau. (Isa. 30:29) I hauti na te mau vahine i te tariparau ma te oaoa e te himene e te ori i te taime e faaariihia ˈi te hoê taata, i te mau oroa e ia upootia te mau faehau i te tamaˈi. (Tav. 11:34; Sam. 1, 18:6, 7; Arii 1, 1:39, 40) I himene atoa na te nunaa Iseraela no te faaite i to ratou oto ia pohe te hoê taata. (Par. 2, 35:25) Papu maitai, mea au roa na ratou te upaupa, ia au i te buka a McClintock e a Strong.

Te upaupa i te aorai. Mea au roa na te mau arii no Iseraela i te upaupa. Ua ani te arii Saula ia Davida ia haere mai i to ˈna aorai no te hauti i te kinura. (Sam. 1, 16:18, 23) I muri mai, riro mai nei Davida ei arii. Ua papai o ˈna i te tahi mau himene nehenehe mau, ua hamani i te tahi mau mauhaa faataˈi upaupa, e ua faanaho i te tahi pǔpǔ no te hauti i te upaupa i te hiero o Iehova. (Par. 2, 7:6; Am. 6:5) I rave na te arii Solomona i te tahi mau tane e vahine no te himene i to ˈna aorai.—Koh. 2:8.

Te upaupa i roto i te haamoriraa. Te mea faufaa roa ˈtu â, ua faaohipa te mau Iseraela i te upaupa no te haamori ia Iehova. E 4 000 hauti upaupa i te hiero i Ierusalema. (Par. 1, 23:5) I hauti na ratou i te sumebalo, te upaupa taura, te kinura e te pu. (Par. 2, 5:12) E ere râ o ratou anaˈe tei haamori ia Iehova na roto i te upaupa. E rave rahi Iseraela tei himene i te Himene paumaraa ia haere ratou i Ierusalema no na oroa rahi e toru o te matahiti. (Sal. 120-134) E ia au i te mau papai ati Iuda, ua himene te mau Iseraela i te mau Salamo Hallel a i te roaraa o te oroa Pasa.

E tuhaa faufaa noa â te upaupa no te nunaa o te Atua. (Iak. 5:13) E tuhaa to te reira i roto i ta tatou haamoriraa. (Eph. 5:19) E tahoê te upaupa ia tatou e to tatou mau hoa Kerisetiano. (Kol. 3:16) E e faaitoito mai te reira ia faaruru tatou i te fifi. (Ohi. 16:25) E ravea nehenehe roa te upaupa no te faaite i to tatou tiaturi e here ia Iehova.