TUMU PARAU HAAPIIRAA 6
HIMENE 18 Mauruuru no te hoo
E faaore Iehova i te hara: No te aha ia mauruuru tatou no te reira?
“No to ˈna here rahi i to te ao i horoa mai ai te Atua i ta ˈna Tamaiti otahi.”—IOA. 3:16.
MANAˈO FAUFAA
E haapii mai tatou eaha ta Iehova i rave e faaorehia ˈi ta tatou mau hara, a rahi atu â ˈi to tatou mauruuru ia ˈna.
1-2. No te aha e nehenehe ai e faaau i to tatou tupuraa i to te tamaiti o te paratarafa matamua?
A FERURI na i te hoê tamaiti mea rahi ta to ˈna na metua faufaa. I te hoê râ mahana, ua pohe raua i roto i te hoê ati. Ua oto roa te tamaiti. E ere râ tera anaˈe. E itea mai ia ˈna e ua hue pauroa to ˈna na metua i ta raua faufaa, e mea rahi atoa te tarahu. E tarahu noa ïa ta raua i vaiiho mai na ˈna. Mea titauhia ia aufau oioi o ˈna i tera rahiraa tarahu, eita râ e pee ia ˈna.
2 Mai tera atoa to tatou tupuraa. Mea tia roa to tatou na metua o Adamu raua Eva i te omuaraa e i ora na raua i roto i te hoê paradaiso nehenehe mau. (Gen. 1:27; 2:7-9) Ua nehenehe hoi raua e ora e a muri noa ˈtu. Ua tupu râ te tahi ati, inaha ua hara raua. Ua ere ïa raua i to raua nohoraa paradaiso e te tiaturiraa o te ora mure ore. Eaha ïa ta raua i vaiiho mai na to raua huaai? Te parau ra te Bibilia: “Mai te hara i ô mai i te ao nei na roto i te taata hoê ra [o Adamu] e te pohe na roto i te hara, e ua raea roa te mau taata atoa i te pohe no te mea ua hara ratou paatoa.” (Roma 5:12) Ta Adamu i vaiiho mai na tatou, o te hara ïa e te pohe. E au teie hara i te hoê tarahu rahi, eita e pee ia tatou.—Sal. 49:8.
3. No te aha ta tatou mau hara e faaauhia ˈi i te “tarahu”?
3 Ua faaau Iesu i te hara i te “tarahu.” (Mat. 6:12; Luka 11:4) Ia hara tatou, mai te huru ra e ua tarahu tatou ia Iehova. O te pohe te utua o te hara. Ia pohe ïa tatou e pee ai taua tarahu ra. Ua rave râ Iehova i te tahi faanahoraa e faaorehia ˈi ta tatou mau hara.—Roma 6:7, 23.
4. (1) Ahani aita Iehova, eaha te tupu no te feia hara atoa? (Salamo 49:7-9) (2) Eaha te “hara” i roto i te Bibilia? (A hiˈo i te tumu parau tarenihia “ Te hara.”)
4 E fanaˈo anei tatou i ta Adamu raua Eva i ere? E, eiaha râ maoti tatou. (A taio i te Salamo 49:7-9.) Ahani aita Iehova, aita e tiaturiraa to tatou e ora e a muri noa ˈtu aore ra e tia faahou mai. E au ïa to tatou tupuraa i to te animara inaha ia pohe ratou, aita e tiaturiraa e tia faahou mai ratou.—Koh. 3:19; Pet. 2, 2:12.
5. Mea nafea Iehova i te tautururaa mai ia pee ta tatou tarahu o te hara? (A hiˈo i te hohoˈa.)
5 A haamanaˈo na i te tamaiti o te paratarafa matamua. Eaha to ˈna huru ia aufau te hoê taata moni pauroa ta ˈna tarahu? Papu roa e mauruuru roa o ˈna, a farii atu ai i teie ô horoa noa. Ua horoa atoa mai to tatou Metua î i te here o Iehova i te tahi ô ia pee ta tatou tarahu oia hoi, te hara ta Adamu i vaiiho mai. Ua faataa Iesu: “No to ˈna here rahi i to te ao i horoa mai ai te Atua i ta ˈna Tamaiti otahi ia ore ia mou te taata atoa o te faatupu i te faaroo ia ˈna, ia roaa râ ia ratou te ora mure ore.” (Ioa. 3:16) Maoti atoa teie ô e nehenehe ai tatou e riro ei hoa no Iehova.
Ua poro Iesu i te parau apî oaoa no nia i ta Iehova i rave e faaorehia ˈi ta tatou mau hara. (Ioa. 3:16) E ua ineine o ˈna i te horoa i to ˈna ora ei hoo no ta tatou mau hara (A hiˈo i te paratarafa 5)
6. Eaha te tahi mau taˈo Bibilia ta tatou e hiˈopoa, e no te aha?
6 E nafea tatou e faufaahia ˈi i teie ô faahiahia a faaorehia ˈtu ai ta tatou mau hara aore ra “tarahu”? No te pahono i teie uiraa, e hiˈopoa tatou e rave rau taˈo Bibilia e te auraa o te reira: te faahauraa, te tapoˈiraa i te hara, te hoo, te faatiamâraa e te parauraahia ei taata parau-tia. A feruriruri ai i ta Iehova i rave e faaorehia ˈi ta tatou mau hara, e rahi atu â to tatou mauruuru ia ˈna.
TE FA: TE FAAHAURAA
7. (1) Eaha atoa ta Adamu raua Eva i ere? (2) Ei huaai no Adamu raua Eva, e hinaaro mau â tatou i te aha? (Roma 5:10, 11)
7 Hau atu i te ereraa i te tiaturiraa o te ora mure ore, ua ere atoa Adamu raua Eva i to raua auhoaraa piri e to raua Metua o Iehova. Hou raua a hara ˈi, e mero raua no te utuafare o te Atua. (Luka 3:38) No to raua râ faaroo ore, ua ere raua i taua haamaitairaa ra hou a fanau mai ai Eva i te tamarii. (Gen. 3:23, 24; 4:1) Ei huaai no Adamu raua Eva, e titauhia te faahauraa i rotopu ia tatou e o Iehova. (A taio i te Roma 5:10, 11.) Oia hoi mea titauhia ia faatupu tatou i te auhoaraa piri e o ˈna. Ia au i te hoê faahororaa, te auraa o te taˈo Heleni tei hurihia ei “faahau,” e “faariro ïa i te hoê enemi ei hoa.” Na Iehova i rave i teie faanahoraa. Mea nafea ïa?
TE RAVEA: TE TAPOˈIRAA I TE HARA
8. Eaha te tapoˈiraa i te hara?
8 Te tapoˈiraa i te hara, e faanahoraa teie ta Iehova i rave no te faahoˈi mai i te auhoaraa piri i rotopu ia ˈna e te taata hara. Ua faanaho oia i te hoê ravea tei aifaito i ta Adamu i ere. Te faahiti atoa ra te mau Papai Heleni i te ravea ta Iehova i faanaho a nehenehe atu ai te hoê taata e riro ei hoa no ˈna.—Roma 3:25, nota.
9. Eaha te faanahoraa ta Iehova i haamau ia nehenehe te hara a te ati Iseraela e faaorehia?
9 Ia nehenehe te nunaa Iseraela e fanaˈo i te auhoaraa piri e o ˈna, ua haamau Iehova no te hoê taime i te hoê faanahoraa e faaorehia ˈi ta ratou mau hara. O te Mahana faahauraa ïa o te haapaohia pauroa te matahiti. I taua mahana ra, e pûpû te tahuˈa rahi i te tusia animara no te nunaa. Parau mau, eita tera mau tusia e tapoˈi roa i te mau hara. No te aha? Eita hoi te ora o te animara e aifaito i te ora o te taata. A pûpû noa ˈi râ te ati Iseraela tatarahapa i te tusia mai ta Iehova i titau atu, ua ineine oia i te faaore i ta ratou mau hara. (Heb. 10:1-4) Hau atu, ia pûpû ratou i te tusia i taua mahana ra e i te tahi atu mau taime, e haamanaˈo noa ïa te ati Iseraela e e taata hara ratou e e hinaaro mau â ratou i te tahi ravea o te tapoˈi roa i ta ratou mau hara.
10. Eaha ta Iehova i rave ia nehenehe te hara a te huitaata e faaorehia?
10 Eaha ta Iehova i rave ia nehenehe te hara a te huitaata e faaorehia? Ua pûpû oia i ta ˈna Tamaiti here “ei tusia hoê roa pûpûraa no te amo i te mau hara a te taata e rave rahi.” (Heb. 9:28) Ua horoa Iesu i “to ˈna ora ei hoo no te taata e rave rahi.” (Mat. 20:28) Tera râ, eaha te hoo?
TEI TITAUHIA: TE HOO
11. (1) Ia au i te Bibilia, eaha te hoo? (2) Eaha te titauhia no te aufau i te hoo?
11 Ia au i te Bibilia, ua faaoti Iehova ia aufauhia te hoo ia tapoˈihia ta tatou mau hara e ia faahoa tatou ia ˈna. O te ravea ïa ta ˈna i faanaho ia nehenehe te taata e fanaˈo faahou i ta Adamu i ere. A haamanaˈo, ua ere Adamu raua Eva i to raua ora tia roa, oia atoa te tiaturiraa e ora e a muri noa ˈtu. No reira e titauhia ia aifaito te hoo i tei erehia e Adamu. (Tim. 1, 2:6) No te aufau i te hoo, ua titauhia te hoê taata (1) tia roa, (2) o te nehenehe e ora e a muri noa ˈtu i nia i te fenua e (3) o te ineine i te horoa i to ˈna ora no tatou. O te ora anaˈe ïa o taua taata ra te nehenehe e horoahia ei hoo no te fanaˈo i tei erehia.
12. No te aha Iesu i nehenehe ai e aufau i te hoo?
12 Teie mai e toru tumu i nehenehe ai Iesu e aufau i te hoo. (1) E taata tia roa o ˈna, “aita oia i rave i te hara.” (Pet. 1, 2:22) (2) E nehenehe ta ˈna e ora e a muri noa ˈtu i nia i te fenua. (3) Ua ineine o ˈna i te horoa i to ˈna ora no tatou. (Heb. 10:9, 10) E taata tia roa Iesu mai ia Adamu hou oia a hara ˈi. (Kor. 1, 15:45) No reira, maoti to ˈna pohe, ua tapoˈi Iesu i te hara a Adamu, te auraa ua aufau oia i te hoo no te faahoˈi mai i ta Adamu i ere. (Roma 5:19) Ua riro ïa Iesu ei “Adamu hopea.” Aita i titau-faahou-hia te tahi atu taata, inaha ua pûpû Iesu i to ˈna ora “hoê roa pûpûraa.”—Heb. 7:27; 10:12.
13. Eaha te taa-ê-raa i rotopu i te tapoˈiraa i te hara e te hoo?
13 Eaha te taa-ê-raa i rotopu i te tapoˈiraa i te hara e te hoo? Te tapoˈiraa i te hara, o te faanahoraa ïa ta te Atua i rave ia nehenehe te huitaata e fanaˈo faahou i te auhoaraa piri e o ˈna. Te hoo, o te titauhia ïa e tapoˈihia ˈi te hara a te huitaata. O te toto tia roa hoi o Iesu tei haamaniihia no tatou.—Eph. 1:7; Heb. 9:14.
TE FAAHOPEARAA: TE FAATIAMÂRAA E TE PARAURAAHIA EI TAATA PARAU-TIA
14. Eaha ta tatou e hiˈopoa i teie nei e no te aha?
14 E nafea tatou e faufaahia ˈi i ta Iehova i rave? No te pahono i teie uiraa, e hiˈopoa tatou i te auraa o e piti parau itehia i roto i te Bibilia. E tauturu te reira ia tatou ia taa eaha ta Iehova i rave e faaorehia ˈi ta tatou mau hara.
15-16. (1) I roto i te Bibilia, eaha te “faatiamâraa”? (2) No te aha mea faufaa te reira no tatou?
15 I roto i te Bibilia, te faatiamâraa, o te faaoreraa ïa i te hara maoti te hoo. Ua faataa te aposetolo Petero i te reira ma te parau: “Ua ite hoi outou e e ere na te mau mea e ino noa, na te ario aore ra te auro, i faatiamâ [Heleni: “hoo mai”] ia outou i to outou huru oraraa faufaa ore no ǒ mai i to outou mau tupuna. Tera râ, na te toto faufaa roa, mai to te arenio ino ore e te viivii ore, te toto o te Mesia.”—Pet. 1, 1:18, 19.
16 Maoti te hoo e tiamâ ˈi tatou i te hara e te pohe. (Roma 5:21) Mea tano ïa ia faaite tatou i to tatou mauruuru rahi ia Iehova e Iesu no te faatiamâraa ia tatou maoti te toto aore ra te ora o Iesu.—Kor. 1, 15:22.
17-18. (1) Eaha te auraa te parauraahia ei taata parau-tia? (2) Eaha te auraa no tatou?
17 Te parauraahia ei taata parau-tia. Ia au i te Bibilia, e parauhia te mau tavini a Iehova ei taata parau-tia. Te auraa eita o ˈna e titau mai ia aufau i te tahi noa ˈˈe mea no ta tatou mau hara. Ma te na reira, aita Iehova e ofati ra i ta ˈna mau ture aveia parau-tia. E ere na tatou e faaoti ia parau oia e taata parau-tia tatou, eita atoa Iehova e farii i te hara. Maoti râ to tatou tiaturi papu i te faanahoraa o te tapoˈiraa i te hara e te hoo, e nehenehe ai Iehova e faaore i ta tatou mau hara.—Roma 3:24; Gal. 2:16.
18 Eaha te auraa no tatou? Ua parauhia ê na te mau Kerisetiano maitihia no te faatere e o Iesu i te raˈi ei taata parau-tia e ei tamarii na te Atua. (Tito 3:7; Ioa. 1, 3:1) Ua faaorehia hoi ta ratou mau hara. Mai te huru ra ïa aita roa ˈtu ratou i rave aˈenei i taua mau hara ra. E nehenehe ïa ratou e fatu i te Faatereraa arii a te Atua. (Roma 8:1, 2, 30) No te mau Kerisetiano o te tiaturi ra e ora i te fenua, ua parauhia ratou ei taata parau-tia e ei hoa no te Atua e ua faaorehia ta ratou mau hara. (Iak. 2:21-23) No te nahoa rahi o te ora ˈtu i Aramagedo, e tiaturiraa ïa to ratou e ora e a muri noa ˈtu. (Ioa. 11:26) E faatiahia mai te feia “parau-tia” e te feia “parau-tia ore” tei pohe. (Ohi. 24:15; Ioa. 5:28, 29) Pauroa ïa te mau tavini haapao maitai a Iehova te fanaˈo i “te tiamâraa hanahana o te mau tamarii a te Atua.” (Roma 8:21) Auê ïa haamaitairaa rahi ta tatou e fanaˈo maoti te faanahoraa o te tapoˈiraa i te hara, e riro tatou ei tamarii tia roa na Iehova!
19. Mea nafea to tatou tupuraa i te maitairaa mai? (A hiˈo atoa i te tumu parau tarenihia “ Eaha te auraa no tatou?”)
19 Parau mau, hoê â tupuraa to tatou e to te tamaiti faahitihia i te omuaraa. Ua ere oia i ta ˈna faufaa e ua amo i te tarahu rahi a to ˈna na metua. Aita râ i pee ia ˈna tera rahiraa tarahu. No to Iehova râ hamani maitai rahi, ua taui to tatou tupuraa maoti te faanahoraa o te tapoˈiraa i te hara e te hoo. Maoti to tatou faaroo ia Iesu Mesia e faatiamâhia ˈi tatou i te hara e te pohe. E faaore-atoa-hia ta tatou mau hara, mai te huru ra ïa aita roa ˈtu tatou i rave aˈenei i taua mau hara ra. Te mea faufaa roa ˈˈe, e nehenehe tatou e faatupu i te auhoaraa piri e to tatou Metua here i te raˈi ra o Iehova.
20. Eaha ta tatou e hiˈopoa i to muri nei tumu parau haapiiraa?
20 E î to tatou aau i te mauruuru rahi a feruriruri ai i ta Iehova e Iesu i rave no tatou. (Kor. 2, 5:15) Maoti ta raua tauturu i fanaˈo ai tatou i te hoê tiaturiraa papu. E faaore Iehova i ta tatou mau hara, eaha râ te auraa no tatou? Tera ïa ta tatou e hiˈopoa i to muri nei tumu parau haapiiraa.
HIMENE 10 Arue ia Iehova to tatou Atua!
