TE FIFI: E rave rahi feia mana e aratai haapaoraa o tei patoi i te poroi a te Bibilia. Ua faaohipa pinepine hoi i to ratou tiaraa ia ore te taata ia fanaˈo i te Bibilia, ia papai aore ra ia huri i te reira. Teie e piti hiˈoraa:

• Matahiti 167 hou te Mesia: Ua imi te arii Antiochus IV (Épiphane) i te ravea ia haamori te mau ati Iuda i te mau atua a to Heleni. Ua faaue o ˈna ia taninahia te mau Papai Hebera. Ua faaite te taata tuatapapa Heinrich Graetz, “ia itehia te mau otaro o te Ture e tumahae e e tutui [to ˈna mau taata] i te reira i te auahi. E haapohe atoa i te feia o te imi i te faaitoitoraa e te tamahanahanaraa i roto i tera mau papai.”

• Matahiti 500 e tae atu 1500: Ua riri vetahi aratai haapaoraa Katolika a faaite ai to ratou mau taata i ta te Bibilia e haapii ra. I faarirohia na ei orure hau te taata atoa o tei rave i te tahi atu buka Bibilia, taa ê atu i te buka Salamo reo Latino. Aita te mau tia faaroo o te tahi haapaoraa i faaea noa i ǒ, ua faaue hoi i to ratou mau taata “itoito, haapao maitai ia imi tamau i te feia o tei faarirohia ei orure hau . . . na roto i te mau fare atoa e te mau piha hamanihia i roto i te fenua, o ta ratou e manaˈo ra ua hunahia te mau buka Bibilia i reira. . . . E vavahihia te fare ua itehia te taata orure hau i roto.”

Ahiri te mau enemi o te Bibilia i manuïa, eita ta ˈna poroi e tae roa mai ia tatou.

UA TAE ROA MAI IA TATOU: Ua tamata te arii Antiochus IV i te taui i te haapaoraa a te mau ati Iuda i Iseraela, e rave rahi râ amuiraa i te tahi atu mau fenua. Ia au i te mau aivanaa, tei rapae ia Iseraela hau atu 60 i nia i te hanere o te mau ati Iuda i te senekele matamua. Ua vaiiho ratou i te mau papai o te Bibilia i roto i ta ratou mau sunago ta te mau uˈi i muri aˈe i faaohipa, mai te mau Kerisetiano matamua.—Ohipa 15:21.

Mai 500 e tae atu 1500, ua tamau te feia o tei hinaaro i te Bibilia i te huri e te papai i te Parau a te Atua noa ˈtu te hamani-ino-raa. I 1450, ua huri-ê-na-hia te tahi mau tuhaa o te Bibilia na roto 33 reo. E tena, na mua ˈˈe a itehia ˈi te ravea neneiraa matamua! I muri aˈe, ua hurihia e ua piahia te Bibilia na roto e rave rahi atu â reo.

I TEIE MAHANA: Noa ˈtu te patoiraa a te feia mana e aratai haapaoraa, o te Bibilia te buka opere-roa ˈˈe-hia e huri-roa ˈˈe-hia na te ao mai te tau mai â. Ua haafaufaahia te Bibilia i roto i te mau ture e te reo i te tahi mau fenua. E mirioni atoa taata tei vaiiho i te reira ia aratai i to ratou oraraa.