Ia pohe tei herehia

I te po Mahana piti 17 no Tiurai 2007, i te area hora hitu, ua hee te hoê manureva i rapae aˈe i te eˈa tauraa i te tauraa manureva taata roa ˈˈe o Beresilia, i ropu maitai ia São Paulo. Ua tere te manureva na nia i te hoê purumu rahi e ua û atu i nia i te hoê fare vairaa taihaa. Fatata e 200 taata tei pohe i roto i taua ati ra.

EITA roa ˈtu teie ati manureva faataahia ei mea ino roa ˈˈe i Beresilia e moehia e te feia ua pohe tei herehia. Tei rotopu Claudete i te feia tei faaruru i te reira. Te mataitai ra ïa oia i te afata teata i to ˈna faarooraa i te parau apî no te ati manureva. To roto ta ˈna tamaiti ra o Renato. E 26 noa to ˈna matahiti. Ua opua oia e faaipoipo i Atopa. Ua tamata Claudete ma te peapea i te taniuniu ia ˈna i nia i ta ˈna niuniu afaifai, aita râ e pahonoraa. Ua marua atura oia i raro e ua taˈi noa ma te nâ ore.

I Tenuare 1986, ua pohe te tane momoˈa a Antje i roto i te hoê ati pereoo ino mau. I to ˈna faarooraa i te parau apî, ua paruparu roa oia. “Aita vau i tiaturi vave. I to ˈu manaˈo, e moemoeâ ino tera e e ara taue mai au no te ite e e ere i te mea mau. Ua rurutaina vau e ua mauiui ino mau mai te huru ra e te tupai ra te hoê taata i to ˈu opu.” Ua hepohepo Antje i na matahiti e toru i muri aˈe. Noa ˈtu e ua hau atu i te 20 matahiti tei mairi mai taua ati ra, te rûrû noâ ra oia ia haamanaˈo i tei tupu.

Eita te parau noa e nehenehe e faataa i te huru aau paruparu, tiaturi ore, hopiipii, e hepohepo uˈana ta tera mau ereraa peapea roa e te manaˈo-ore-hia e nehenehe e faatupu. Noa ˈtu râ e ua tiaihia te pohe o tei herehia, mai i muri aˈe i te hoê maˈi maoro, e nehenehe te oto e rahi atu â. Aita e taata i ineine roa no te pohe o tei herehia. Ua pohe te metua vahine o Nanci i 2002 ra i muri aˈe i te hoê maˈi maoro. I te mahana râ i pohe ai to ˈna mama, ua parahi Nanci i raro i te fare maˈi ra, ma te paruparu roa ino. E au ra e aita e faufaa rahi faahou to te oraraa no ˈna. Ua mairi e pae matahiti, te taˈi noa ra râ oia ia manaˈo oia i to ˈna mama.

“Eita roa ˈtu e moehia e te taata te pohe o te hoê, e haamatau noa ratou i te ora e te reira,” ta te taote Holly Prigerson ïa i parau. Mai te peu e ua pohe tei herehia e oe, ma te manaˈo-ore-hia aore ra aita, e uiui paha oe: ‘E mea tano anei ia oto? E nafea ia faaruru ua pohe anaˈe tei herehia? E ite faahou anei au i tei herehia e au?’ E pahono te tumu parau i muri nei i te reira e i te tahi atu mau uiraa ta oe e uiui nei paha.

[Faaiteraa i te fatu o te hohoˈa i te api 3]

EVERTON DE FREITAS/AFP/Getty Images