“MEA ora hoi te parau a te Atua, e te puai rahi.” (Heb. 4:12) Ma teie mau parau, ua faataa te aposetolo Paulo i te puai rahi o te parau a te Atua no te haaputapû i te aau e no te taui i te oraraa.

Ua faahuru-ê-roa-hia râ te manaˈo e e puai to te poroi Bibilia a parare ai te ohipa apotata i te poheraa te mau aposetolo. (Pet. 2, 2:1-3) Ua faariro atura te mau tia faaroo i te Parau a te Atua ei mea manamana. Ua papai te orometua haapii o Harry Gamble no nia i te faaohiparaa i te mau papai Kerisetiano no te mau peu tahutahu. Ua tapao o ˈna e i te senekele toru, ua manaˈo te Metua o te Ekalesia ra o Origène e “e maitaihia te taata o te faaroo i te mau parau moˈa: mai te peu e e mana to te mau parau i roto i te mau peu tahutahu a te mau etene, mea puai roa ˈtu â ïa te mau parau a te mau papai no ǒ mai i te atua ra.” Ua papai John Chrysostom o te hopea o te senekele maha e “eita te diabolo e tamata i te piri atu i te hoê fare te vai ra te Evanelia.” Ua faaite atoa o ˈna e i taamu na vetahi i te tahi mau tuhaa o te mau Evanelia i nia i to ratou aˈî ei taritoa. Ua tapao â o Harry Gamble e no Augustin, taata maimi i pae faaroo Katolika, “e nehenehe e tuu i te Evanelia a Ioane i raro aˈe i te turua a taoto ai ia mauiui te upoo”! Ua faaohipahia ïa te mau papai Bibilia no te mau tumu tahutahu. E no oe, ua riro anei te Bibilia ei taritoa o te nehenehe e paruru ia oe i te ino?

Peneiaˈe mea matau-aˈe-hia teie faaohiparaa hape i te Bibilia: E hohora i te hoê buka, e pinepine te Bibilia, a taio atu ai i te papai ta oe e ite na mua ma te tiaturi e e horoa mai tera mau parau i te aratairaa hinaarohia. Ei hiˈoraa, ia au i te orometua haapii o Gamble, ua faaroo Augustin i te reo o te hoê tamarii o te hoê fare tapiri i te parauraa: “A rave e a taio, a rave e a taio.” No Augustin, e faaueraa teie a te Atua e hohora i te Bibilia a taio atu ai i te irava matamua ta ˈna e ite.

Ua matau anei oe i te taata tei pure i te Atua i roto i te tupuraa fifi a hohora ˈtu ai i te Bibilia ma te tiaturi e e tauturu atu te irava matamua ta ratou e ite? Noa ˈtu e e manaˈo maitai paha to ratou, eiaha te mau Kerisetiano ia na reira no te imi i te aratairaa Bibilia.

Ua haapapu Iesu i ta ˈna mau pǐpǐ e e tono atu oia i ‘te faaaˈo, te varua maitai.’ Ua na ô â oia: “Na ˈna e haapii mai ia outou i te mau mea atoa; e e faaite faahou mai hoi ia outou i te mau parau atoa ta ˈu i parau atu ia outou na.” (Ioa. 14:26) Mea taa ê roa ïa te faaohiparaa i te Bibilia faahitihia i nia ˈtu o te ore e titau ra i te tahi ite o te mau Papai.

E peu matauhia tera mau huru faaohiparaa tano ore i te Bibilia. Te faahapa nei râ te Parau a te Atua i te imiraa i te tapao. (Lev. 19:26; Deut. 18:9-12; Ohi. 19:19) “Mea ora . . . te parau a te Atua, e te puai rahi.” E titauhia râ te aravihi no te faaohipa i te reira. E maitai mai te oraraa o te taata maoti te ite mau o te Bibilia, eiaha maoti te faaohiparaa i te buka no te mau tiaturiraa huru ê. Ua tauturu tera ite i te taata e rave rahi ia haamau i te mau ture aveia morare teitei, ia faarue roa i te hoê huru oraraa ino mau, ia haamaitai i to ratou oraraa utuafare e ia atuatu i te taairaa e te Fatu o te Bibilia.