Eaha te manaˈo o ta oe haapaoraa i te mau faaueraa tumu Bibilia no nia i te haerea maitai e ino?
Te na ô ra Sylvia, te tahi rave ohipa o te hoê fare ruau: “I te fare haapiiraa, mea rahi tei parau e e haapaoraa ta ratou. Noa ˈtu râ, i te hiˈopoaraa, e punu na ratou a rave atu ai i te raau taero. Aita ratou e tâuˈa ra i te haapaoraa i roto i te oraraa.”
Ua parau te tahi taata o Lionel te iˈoa: “E haavare noa to ˈu mau hoa rave ohipa. Aita anaˈe ratou i maˈihia, e parau ïa ratou e ua maˈihia ratou. E haapaoraa ta ratou, no te faaiteite noa râ te reira.”
Noa ˈtu e e haapaoraa ta te rahiraa, eita te taata e haapao i te reira i roto i te oraraa. E rave rahi i teie mahana e “hohoˈa paieti hoi to ratou, te puai râ o te reira ra, ua hunahia ïa ia ratou.” (Timoteo 2, 3:5) Aita to ratou mau tia faaroo e horoa ra i te hiˈoraa maitai e e faaite ra i te mau aˈoraa Bibilia no nia i te haerea maitai i to ratou mau taata. Eita ïa tatou e maere e e rave rahi o te tiaturi ra e aita te Atua e haapao ra i te huru o to ratou oraraa.
EAHA TA TE BIBILIA E HAAPII RA?
Ia au i te Bibilia, e oaoa aore ra e oto te Atua. No ˈna, e mea faufaa roa to tatou haerea. I to Iseraela i tahito ra orure-hau-raa i te Atua, ‘ua faariri ratou ia ˈna.’ (Salamo 78:40) Tera râ, e “oaoa rahi to nia i te raˈi” ia taui te hoê taata i to ˈna haerea. (Luka 15:7) Ia haafaufaa te hoê taata i te mau huru maitatai o to tatou Metua i te raˈi, e rahi mai to ˈna here ia Iehova e e turai te reira ia ˈna ia hinaaro i ta te Atua e au e e haapae i ta ˈna e ore e au.—Amosa 5:15.
EAHA TE HAEREA O TE MAU ITE NO IEHOVA?
No nia i te mau Ite no Iehova, te faataa ra te hoê vea i Salt Lake City i Utah: “E taairaa maitai roa to ratou e te mau melo o te utuafare e e taata rave ohipa, tauturu ia vetahi ê e te maitai.” Te na ô faahou ra te vea: “Te pee nei te mau melo i te mau faaueraa tumu no nia i te haerea. No ratou, e haafifi te puhipuhiraa i te avaava, te inu-hua-raa i te ava, te raveraa i te raau taero, te pere moni, te ohipa taiata e mahu i te taairaa e te Atua.”—Deseret News.
Te tauturu ra anei te mau tia faaroo i to ratou mau taata ia faaohipa i ta te Atua mau ture aveia?
Nafea te haapiiraa no nia i te huru o te Atua e tauturu ai i te mau Ite? Te parau ra o Sylvia tei faahitihia na, “Mea matauhia te haavare i roto i te fare ruau, e mea ohie ia apiti atu. Ua tauturu râ te iteraa eaha te manaˈo o Iehova * no nia i te reira ia rave i te mea maitai, e ua fanaˈo vau te oaoa e te hau o roto mai.” Ua papu ia Sylvia e ia pee oia i ta ˈna mau tiaturiraa faaroo, e maitai to ˈna oraraa.
^ I roto i te Bibilia, o Iehova te iˈoa o te Atua.
