E ere i te mea tano ia manaˈo mai tera. Eaha mau na ta te Parau a te Atua e haapii ra? Mai te peu e parau noa Satani no te faataa i te ino, no te aha te Bibilia e faaite ai ia ˈna mai tei paraparau ia Iesu Mesia e te Atua Mana hope iho? E hiˈopoa anaˈe e piti hiˈoraa o tera mau aparauraa.

A haamata ˈi Iesu i ta ˈna taviniraa, ua faahema te Diabolo ia ˈna e toru taime. Na mua, ua tamata Satani i te faahepo ia Iesu ia faaohipa i to ˈna mana no ǒ mai i te Atua no to ˈna iho maitai ma te haamâha i to ˈna poia. I muri iho, aita te Diabolo i taiâ i te turai ia Iesu ia haafaufaa ore i to ˈna ora ma te rave i te tahi ohipa maamaa ia haapaohia o ˈna. I muri aˈe, ua pûpû Satani ia Iesu ia riro ei faatere i nia i te mau basileia atoa o te ao nei ia haamori râ oia ia ˈna. Ua patoi Iesu i na toru faahemaraa haavarevare ma te faahiti noa i te mau Papai.—Mataio 4:1-11; Luka 4:1-13.

O vai ta Iesu i paraparau? Te tahi anei huru ino i roto ia ˈna? Teie ta te mau Papai e parau ra no Iesu: “I ati atoa hoi oia i te mau mea atoa mai ia tatou atoa nei, aita roa râ e hara.” (Hebera 4:15) Te faataa atoa ra ia ˈna mai “tei ore roa i rave i te hara, e aore roa e haavare i itea i to ˈna vaha.” (Petero 1, 2:22) Aita Iesu i hara noa ˈˈe e ua faaite noa o ˈna i te haerea hapa ore. Aita roa oia i vaiiho hoê noa ˈˈe huru ino ia tupu i roto i to ˈna aau. Aita ïa Iesu i paraparau i te tahi huru ino i roto ia ˈna, i te tahi melahi mau râ.

Te vai ra te tahi atu haapapuraa e melahi mau Satani i roto i tera noa â aparauraa.

• A haamanaˈo na ua pûpû te Diabolo i te mau faatereraa o te ao nei ia Iesu, ia haamori atu râ o ˈna ia ˈna. (Mataio 4:8, 9) Eaha ïa te faufaaraa o teie pûpûraa ahiri e ere Satani i te mea mau! Hau atu â, aita Iesu i patoi e mana rahi to Satani i nia i tera mau faatereraa.

• Ua patoi Iesu i te mau faahemaraa e i muri aˈe, teie te parauhia no te Diabolo: “Haere iti ê atura oia, faarue maira ia ˈna.” (Luka 4:13) I tera taime, ua riro anei Satani ei huru ino i roto ia Iesu? Aore ra ei enemi i onoono mau.

• A tapao na i te faaitehia ra i roto i te Mataio 4:11, “e mau melahi tei haere mai e ua tauturu maira” ia Iesu. E ere anei e melahi mau ratou o tei faaitoito e tei tauturu ia Iesu? Oia mau. No te aha ïa e manaˈo ai e ere Satani i te melahi mau?

No nia ia Ioba te piti o te faatiaraa, e taata oia tei mǎtaˈu i te Atua. I roto i to ˈna aamu, te faaitehia ra e piti taime i paraparau ai te Diabolo i te Atua. I tera na taime, ua haapopou te Atua ia Ioba no to ˈna hapa ore. Ua pari Satani no te mau tumu miimii noa Ioba e tavini ai i te Atua. Ua parau hoi e ohipa ta te Atua i rave i tavini ai Ioba ia ˈNa ma te taiva ore. E au ra e ua manaˈo Satani o ˈna tei matau aˈe ia Ioba i te Atua. Ua vaiiho Iehova ia faaere Satani ia Ioba i ta ˈna mau faufaa, tamarii e to ˈna ea maitai. * Ua ite-mau-hia râ ua tano ta Iehova i parau no Ioba e ua hape Satani. Ua haamaitai te Atua ia Ioba no to ˈna hapa ore.—Ioba 1:6-12; 2:1-7.

I na taime e piti, ua paraparau anei Iehova i te tahi huru ino i roto ia ˈNa? Te na ô ra te Bibilia: “O te Atua ra, e parau-tia ta ˈna.” (Samuela 2, 22:31) Teie atoa ta te Parau a te Atua e faahiti ra: “E moˈa, e moˈa, e moˈa, to te Fatu ra to te Atua Mana hope.” (Apokalupo 4:8) Mea viivii ore, moˈa e mea faataa-ê-hia i te hara te auraa o tera parau. Mea tia roa o Iehova e aita hoê aˈe mea ino i roto ia ˈNa. Aita hoê noa ˈˈe huru ino to ˈna.

E parau vetahi e ere Ioba i te taata mau e mea manaˈo-noa-hia ïa tera faatiaraa. Mea tano anei râ tera manaˈo? Te faaite ra te tahi atu mau irava Bibilia e taata mau iho â Ioba. I roto i te Iakobo 5:7-11, ua riro Ioba ei hiˈoraa no te faaitoito i te mau Kerisetiano ia faaoromai i te ati e no te haamanaˈo mai e haamaitai Iehova tei na reira. Ahiri e ere Ioba i te taata mau e mea manaˈo-noa-hia ta Satani mau pariraa, eaha ïa te faufaaraa ia faaitoito ia pee i to ˈna hiˈoraa? Hau atu â, i roto i te Ezekiela 14:14, 20, e taata parau-tia atoa Ioba mai ia Noa e Daniela. Mai na tavini e piti o te Atua, e taata mau ïa Ioba e te faaroo puai. E ere anei tei hamani ino ia ˈna i te mea mau atoa?

Ia au i te Bibilia, mea papu maitai e melahi mau Satani. Te feruri ra paha oe, ‘E nehenehe anei oia e haafifi ia ˈu e to ˈu utuafare i teie nei mahana?’

A feruri na eaha te tupu ia puhapa taue noa te tahi pǔpǔ taata hamani ino i to oe oire. E ino roa iho â to oe oraraa e to te feia tapiri! I teie nei, a feruri na i to muri nei tupuraa: E melahi mau Satani e ta ˈna mau demoni tei orure hau i te Atua e ua huri-taue-hia mai ratou i te fenua nei. Eaha ïa te tupu? A feruri na i ta oe e ite ra i roto i te mau vea i ǒ nei e na te ao:

• Noa ˈtu te mau ravea e ravehia ra na te ao, aita anei oe e ite ra te ino noa ˈtura te taata e ua rahi roa te mau ohipa hamani-ino-raa?

• Noa ˈtu te haapeapearaa a te mau metua e rave rahi, aita anei oe e ite ra ua rahi roa te peu tahutahu i roto i te mau faaanaanataeraa?

• Noa ˈtu te mau tutavaraa maitai a te taata, aita anei oe e ite ra te ino noa ˈtura te fenua?

• Aita anei oe e ite ra ua ino roa te oraraa o te taata mai te huru ra, te vai ra te hoê o te faatupu ra i te mau mauiui o te huitaata?

A hiˈo na i ta te Bibilia e parau ra no nia i tei faatupu ra i te reira: “Hurihia ˈtura hoi te teni rahi i rapae, o taua ophi tahito ra ïa, o tei parauhia o te diabolo ra, e o Satani hoi, o tei haavare i to te ao atoa nei; i hurihia oia i rapae i nia iho i te fenua nei, e ta ˈna mau melahi atoa ua huri-atoa-hia . . . E ati ra hoi to te fenua e to te tai, tei raro atu na hoi te diabolo ia outou na; e riri rahi hoi to ˈna, no te mea ua ite oia e maa taime poto to ˈna e toe nei.” (Apokalupo 12:9, 12) I to ratou hiˈopoaraa i te reira, e rave rahi tei farii e melahi ino mau Satani e te faaohipa ra oia i to ˈna mana no te haavî i te ao e haaati ra ia tatou.

Te na ô ra paha oe, ‘Eaha te rave ia paruruhia vau?’ Ua tano oe i te haapeapea. E faaite atu to muri nei tumu parau i te tahi mau manaˈo e tauturu atu.