МОИСЕЙНИҢ хоойлузундан алырга, Иеговага өргүл кылдыр көге-бугаларны-даа, көгээзиннерни-даа эккеп болур турган. Өргүлге хамаарышкан айтыышкыннарда ол ийи кушту кезээде кады бижиир турган. Чүге дээрге көгээзин чок турган болза, орнунга көге-буганы өргүлге эккеп болур турган (Лев. 1:14; 12:8; 14:30). Кижи бодаарга, кандыг-даа ылгал чок ышкаш. Ынчалза-даа израильчилерге ол чүүл чугула турган, чүге дээрге көгээзинни тып алыры чамдыкта берге турган.

Көгээзиннер — соок айларда чылыг чурттарже чоруптар куштар-дыр. Ынчангаш олар Израильче чүгле чылыг айларда кээр. Октябрьда олар мурнуу чурттарже ужуп чоруптар, а дедир чүгле чазын эглип кээр (Сол. ыр. 2:11, 12; Иер. 8:7). Ынчангаш библейжи үелерде көгээзинни кыжын тып алыры берге турган.

А көге-бугалар Израильге бүдүн чыл ишти турган. Оон аңгыда, кижилер оларны азырап турган. (Деңнеңер: Иоанн 2:14, 16.) Бир номда мынча деп бижээн: «Көге-бугалар Палестинаның суурларында болгаш хоорайларында эңдере турган. Бажың бүрүзүнде улус көге-бугаларны азырап, хериминиң иштинде азы бажыңының ханаларында уяларны кылып ап турган» *. Көге-бугалар ханаларда тускай үттер иштинге чурттап турган. (Деңнеңер: Исайя 60:8.)

Израильчилер чылдың кайы-даа үезинде бар куштарны Иеговага өргүл кылдыр берип болур турган. Оон алырга, Иегова — ынакшылдыг болгаш улусту бодап билир Бурган.