Иегованың Херечилери шагдан бээр янзы-бүрү библейжи школаларны тургузуп келген. Чагырга дугайында медээни суртаалдаарынга хөй үезин чарып турар кижилерге тускай школалар көрдүнген. Ооң ачызында суртаалчылар бодунуң бараан болуушкунун эчизинге чедир күүседип турар (2 Тимофейге 4:5).

Эгелекчилерниң бараалгал школазы. Бир чыл дургузунда бараалгаан эгелекчини чоокку Хурал залынга болур 6-хонуктуң өөредилгезинче чалаар. Ол школа эгелекчиге Иеговага оон-даа артык чоокшулаарынга, бараалгалдың шупту талаларынга экижииринге болгаш Бурганга моон-даа соңгаар шынчы бараалгаарынга дузалаар.

Чагырга медээчилериниң школазы. Бо ийи ай иштинде эртип турар школада, дуза херек черлерге бараалгаарынга белен, дуржулгалыг эгелекчилер өөренип турар. Олар, өндүр улуг Суртаалчы чораан, Иисус Христосту өттүнүп: «Мени айбылап чорудуп көрем!» деп чугаалап турар (Исайя 6:8; Иоанн 7:29). Олар өскээр көшкеш, бөдүүн кылдыр чурттап өөрениринге белен болур ужурлуг, чүге дизе культура, агаар-бойдус болгаш аъш-чем кижиниң чаңчыга бергенинден ылгалып болур. Безин чаа дылды өөренир апаар чадавас. Ол школаже 23-тен 65 харга чедир бот болгаш ашак-кадай улусту чалап турар. Ол школа бараалгаарынга херектиг шынарларны сайзырадып, арга-мергежилди чедип алырынга дузалап турар. Ынчан Иегова болгаш Ооң организациязы оларны долузу-биле ажыглап болур.

Таңныыл Суургазының Галаад деп библейжи школазы. «Галаад» деп сөс «хорум-херечилел» дээн уткалыг. Ол школа 1943 чылда тургустунган. Оон бээр 8000 ажыг доозукчуларны «чер-делегейниң ужу-кыдыынга» чедир суртаалдазын дээш, миссионерлер кылдыр томуйлаан (Ажыл-чорудулга 13:47). Ол школаның ажыктыы түңнелинден көскү. Чижээ, кажан бирги доозукчулар Перуже чедип кээрге, аңаа чаңгыс-даа хурал чок турган, а ам оларның саны 1000 ажа берген! Бистиң миссионерлеривис Японияга бараалгап эгелеп турда, ында Херечилерниң саны 10 безин четпес турган, а ам оларның саны 200000 ажа берген. Ол 5 ай уламчылаар өөредилге дургузунда сургуулдар Бурганның Сөзүн ханы өөренип турар. Ол школаже тускай эгелекчилерни, миссионерлерни, ол ышкаш салбырның ажылдакчыларын болгаш кожуун хайгааракчыларын чалап турар. Ол өөредилге оларны бүгү делегейде Бурганның организациязын быжыктырарынга белеткеп турар.

• Эгелекчилерниң бараалгал школазының сорулгазы кандыгыл?

• Чагырга медээчилериниң школазынга кым өөренип болурул?