Мындыг байдалды сагыштаалап көр даан: Саяна бодун көрүнчүкке топтап көргеш, бичии семирий бергенин эскерип каан. Ооң ада-иези болгаш эштери ону «арган сен» деп чугаалап турда-ла, ол: «Арар болзумза эки-дир» — деп боданып турар.

Чоокта чаа Саяна «ийи борбак кил» октаптар дээш, шыңгыы хемчеглер алырының дугайында боданып турган. Аңаа чүгле каш хүн чем чивези херек...

Бир эвес сээң бажыңга база ындыг бодалдар кирип кээр болза, канчаар сен?

Дүрзү-хевириниң дугайында сагыш човаарында багай чүве чок. Солун чүүл, Библияда Сарраны, Рахилди, Авигеяны, Иосифти болгаш Давидти чараш турган деп бижээн. Оон аңгыда Библияда «кедергей чараш» турган Ависаганың дугайында база бижээн (3 Хааннар 1:4).

Ынчалзажок хөй элээдилер бодунуң дүрзү-хевиринден өске чүнү-даа бодап шыдавас ышкаш апарган. Ол чүүл багай түңнелдерге чедирип болур. Дараазында чүүлдерни херекке ап көр:

• Бир шинчилел-биле алырга, элээди кыс уругларның 58 хуузу боттарын семис деп санап турар, а херек кырында оларның чүгле 17 хуузу артык килдиг бооп турар!

• Өске шинчилелдиң түңнелинден алырга, кили четпес херээженнерниң 45 хуузу боттарын арып алыр болза эки деп санап турар.

• Чамдык элээдилер арып алыр дээш, кеш биле сөөк артып каарынга чедир, чем чивейн, боттарын «анорексия» деп амы-тынга айыылдыг байдалга чедирип турар.

 Бир эвес сен анорексия азы өске бир аарыгның демдектерин бодуңга эскерип каар болзуңза, дузадан диле. Аваңга, ачаңга азы чоок улузуңнуң бирээзинге ооң дугайында чугаала. Библияда: «Эжиң сеңээ кандыг-даа үелерде ынак болур; ха-дуңмаң айыыл-халап үезинде дузалаар дээш төрүттүнер» — деп бижээн (Чугаалар 17:17).

Кижиниң ёзулуг чаражы иштики бүдүжүнде. Чижек кылдыр Давидтиң оглун, Авессаломну, ап көрээлиңер. Библияда мынча дээн:

«Авессаломга чедер чараш эр кижи чок турган. [...] Тейинден таваңгайынга чедир ооң четпес чүвези черле чок турган» (2 Хааннар 14:25).

Ынчалзажок ол аныяк кижи улуургак, алдарга ынак болгаш кара сагыштыг турган! Ынчангаш Библияда Авессаломну эки кижи кылдыр эвес, а саттыныкчы болгаш каржы-дошкун кижи кылдыр бижээн.

Библияда мындыг сүмелерни бергени анаа эвес:

«Чаа кижиниң бүдүжүн кедип ал[ыңар]» (Колосчуларга 3:10).

«Чаражыңар... [«даштыкы хевириңерде», ЧД] эвес. Бурган харын кижиниң... иштики чаражын аажок үнелээр» (1 Пётр 3:3, 4).

Чараш болуксаарында багай чүве чок. Эң кол чүүл — сен кандыг кижи сен деп чүве чугула. Улус дөмей-ле сээң шыңганнарлыг мага-бодуң азы чараш дурт-сының дээш эвес, а эки шынарларыңны үнелээш, сенче чүткүүр. «Чараш дүрзү-хевир кичээнгейни хаара тудуп болур. Ынчалза-даа улустуң сагыш-сеткилинге колдуунда сээң иштики бүдүжүң болгаш шынарларың артып каар» — деп, Анна үлежип турар.

үрзү-хевириңге бо-ла таарзынмайн баар-дыр сен бе?

Дүрзү-хевириңде бир-ле четпестерни эдер дээш, даштыкы хевириңни чараштаар кезиишкинниң (пластическая операция) азы кадыг негелделиг чемненилге чурумунуң (диета) дугайында боданган сен бе?

Болдунар турган болза, дүрзү-хевириңде чүнү өскертиксээр сен? (Адаан шыйывыт.)

• УЗУНУҢНУ

• ДЕҢЗИҢНИ

• БАЖЫҢНЫҢ

• ДҮГҮН

• ДУРТ-СЫНЫҢНЫ

• АРЫН-ШЫРАЙЫҢНЫ

• АРНЫҢНЫҢ КЕЖИН

Бир эвес баштайгы ийи айтырыгга «ийе» деп харыылааш, үш дугаар айтырыгга үштен хөй сөстү шыйып алган болзуңза, мооң дугайында боданып көр: өскелер «бо кижиниң дүрзү-хевиринде кандыг четпестер бар ирги?» дээш каяа-ла топтап туруп бээр деп. Бодунуң дүрзү-хевиринче хөлүн эрттир сагыш салыр болза, бодунче шын эвес көрүш сайзырай берип болур (1 Хааннар 16:7).