Кызьы Библия асьме дырозь вуиз

Библиез гожтэм дырысен 1 900 арлэсь кемагес ортчиз ини. Со асьме дырозь воштӥськытэк вуиз шуыса, туж паймымон. Малы ке шуоно сое ӝог сисьмись материалъёс вылын гожъязы: папирус вылын (тростниклэсь лэсьтэм бумага) но пергамент вылын (посэм ку). Со сяна, туннэ туж ӧжытэз вераське со кылъёсын, кудъёсыныз Библия гожтэмын вал. Озьы ик Библиез вань кужмысьтызы кивалтӥсьёс быдтыны тыршизы.

КЫЗЬЫ Библия ваньзэ чидаз но дуннеын тужгес но вӧлмем книга луиз? Ойдолэ учкомы кык малпанъёсты.

Копиослэн пайдазы

Куд-ог израиль пиосмуртъёслы оскемын вал свитокъёс, кудъёсаз гожтэмын вал ивор, кудӥз берлогес Библие пыриз. Соос соосты туж утьыса возизы но выльысь но выльысь мукет интые гожъязы. Озьы трос копиос кылдӥзы. Кылсярысь, израиль эксэйёслы косэмын вал: «Левит священникъёс киын возиськись законэн книгаысь кылъёсты аслаз книгаяз со гожъяны кулэ» (Кыкетӥ Закон 17:18).

Израиль калык пӧлысь тросэз Священной Гожтэмъёсты Инмарлэн Кылыныз лыдъяло вал, соин ик туж ярато вал соосты лыдӟыны. Нимысьтыз дышетэм гожъясьёс священной гожтэмъёсты туж сак мукет интые гожтыса кельто вал. Одӥгез сыӵе гожъясьёс пӧлысь вал Инмарлэсь кышканэн улӥсь Ездра. Со сярысь Библиын верамын: «Со книга тодӥсь вал, Израильлэн Инмарезлэсь Кузё-Инмарлэсь Моисей пыр сётэм законзэ тодӥсь-валась мурт вал со» (Ездра 7:6). Масоретъёс а. в. VI—VII дауръёсы Еврей Гожтэмъёсты, яке «Вуж Сӥзёнэз», мукет интые гожъякузы, янгыш лэсьтонтэм вылысь, букваоссэ ик лыдъяллязы. Солы луыса, Библия асьме дырозь воштӥськытэк вуиз, сое быдтыны туж тыршизы ке но.

Кылсярысь, а. в. азьло 168-тӥ арын Сириялэн кивалтӥсез Антиох IV тыршиз быдтыны Еврей Гожтэмъёслэсь вань копиоссэ, кудъёссэ Палестинаысь шедьтӥз. Еврейёс сярысь одӥг книгаын верамын: «Законэн книгаосты, кудъёссэ шедьтӥзы, кесяллязы но тылын сутылӥзы». «Еврей энциклопедиын» верамын, кивалтӥсьёс туж чаклазы шуыса, кызьы со косонэз быдэсто, нош кинлэсь Священной Гожтэмъёсты шедьтылӥзы, соосты виылӥзы. Озьы ке но Палестинаын но мукет шаеръёсын улӥсь еврейёс Священной Гожтэмъёслэсь копиоссэ утьыны быгатӥзы.

Христиан Грек Гожтэмъёсты (Выль Сӥзёнэз) гожтэм бере кема ик дыр ӧз ортчы, соослэн копиоссы туж паськыт вӧлмемын вал ини. Кылсярысь, Иоанн аслэсьтыз Ӟеч Иворзэ гожтӥз Ефесын яке со котырын. Нош тодосчиос верамъя, Ӟеч Иворзэ гожтэмез бере 50 ар ортчыса но ӧз вуы, солэн копиез лэсьтэмын вал ини. Со копилэсь люкетсэ шедьтӥзы Египетын, кудӥз Ефес дорысь трос сю иськемъёс кемын интыяськемын вал. Со возьматэ, нырысетӥ даурын кыдёкысь музъемъёсын улӥсь христианъёслэн но Священной Гожтэмъёслэн копиоссы вал шуыса, кудъёсыз Священной Гожтэмъёсты гожтэм берегес ик лэсьтэмын вал.

Инмарлэн Кылыз паськыт вӧлмемын вал. Солы луыса, Христос бере трос дауръёс ортчыса но, со ӧз быры. Кылсярысь, а. в. 303-тӥ арын тулыспалэ, вазь ӵукна, рим император Диоклетиан лыктӥз черк доры. Солэн ас синмыныз адӟемез потэ вал, кызьы ожгарчиос черклэсь ӧссэ тӥяло но Священной Гожтэмъёсты суто. Диоклетиан малпа вал, христианъёслэсь священной книгаоссэс сутыса, со христиан религиез но быдтыны быгатоз шуыса. Мукетаз нуналэ со косӥз империысь вань Библиосты люканы но ваньмыз азьын сутыны. Но Библиослэн куд-ог копиоссы утемын но выльысь гожъямын вал. Асьме дырозь вуизы грек кылын гожтэм Библилэн кык копиосызлэн бадӟымез люкетъёссы. Соос гожтэмын вал, вылды, Диоклетиан Священной Гожтэмъёсты быдтыны косэм бере ик. Со копиос пӧлысь одӥгез али ке но возиське Римын, мукетыз — Британской библиотекаын, Лондонын.

Библиез гожъясьёслэн асьсэ киынызы гожъямъёссы шедьтэмын ӧвӧл ке но, асьме дырозь соослэн трос сюрс копиоссы вуизы. Куд-огез соос пӧлысь туж вашкала. Нош Библилэсь копиоссэ гожъяку, воштӥськиз-а солэн пуштросэз? Тани мар вераз Еврей Гожтэмъёс сярысь тодосчи Уильям Грин: «Юн оскыса вераны луоз, одӥгез но вашкала ужлэн копиез сокем шонер гожтыса кельтэмын ӧй вал». Нош мар вераны луоз Христиан Грек Гожтэмъёс сярысь? Священной Гожтэмъёсты эскерись Фредерик Кеньон верамъя, Библиез гожъясьёс, Священной Гожтэмъёсты ас киынызы гожтэм дырысен соослэсь копиоссэ лэсьтон дырозь туж ӧжыт дыр ортчемын, соин ик Выль Сӥзёнлэн кыӵе ке люкетэз ышиз яке пуштросэз воштӥськиз шуыса малпаны муг ӧвӧл. Озьы ик, Фредерик Кеньон верамъя, Библилэн одӥг люкетэз но ыштэмын ӧвӧл, мае вераны уг луы мукет вашкала книгаос сярысь.

Библиез берыктон

Со сяна, Библия тужгес но тодмо книга луиз, малы ке шуоно со трос пӧртэм кылъёсы берыктэмын вал. Сыӵе вал Инмарлэн малпанэз. Солэн потэ, пӧртэм калыкъёсысь, пӧртэм кылын вераськись адямиос асьсэлэсь Кылдытӥсьсэс мед тодозы шуыса но солы «духен но зэмлыкен» мед йыбыртъялозы шуыса (Иоанн 4:23, 24; Михей 4:2).

Нырысь Еврей Гожтэмъёсты грек кылэ берыктӥзы. Сое берыктӥзы Иисус лыктэмлэсь ог 200 арлы азьлогес. Со берыктэмез Септуагинта шуыса нимазы. Сое берыктӥзы грек кылын вераськись еврейёслы, кудъёсыз пӧртэм шаеръёсын улӥзы. Христиан Грек Гожтэмъёсты гожтыса быдтэм бере кӧня ке даур гинэ ортчиз — быдэс Библия трос пӧртэм кылъёсы берыктэмын вал ини. Но берлогес эксэйёс, озьы ик священникъёс но, кудъёсыз адямиослы Библиез валэктыны кулэ вал, люкетӥзы Библиез огшоры адямиослы валамон кылэ берыктыны.

Священникъёс но кивалтӥсьёс люкетыны тыршизы ке но, вал адямиос, кудъёсыз, улонзэс жалятэк, Библиез асьсэ кылэ берыктӥзы. Кылсярысь, 1530-тӥ арын Уильям Тиндал, кудӥз дышетскиз Оксфордын, Еврей Гожтэмъёслэсь нырысетӥ вить книгаоссэ берыктӥз. Со вал нырысетӥез берыктӥсь, кудӥз Библиез еврей кылысь англи кылэ берыктӥз, солы люкетӥзы ке но. Озьы ик Тиндал вал нырысетӥез англи кылэ берыктӥсь, кудӥз Инмарлэсь нимзэ, Иегова нимез, аслаз берыктэмаз кутӥз. Эшшо одӥгез Библиез берыктӥсь вал Касиодоро де Рейна. Со Библиез испан кылэ берыктӥз, со понна католикъёс сое виыны но быгато вал. Аслэсьтыз ужзэ быдэстон понна, солы пӧртэм шаеръёсын улоно луиз: Англиын, Германиын, Голландиын, Франциын но Швейцариын *.

Туннэ Библиез тросгес но тросгес кылъёсы берыкто но трос миллион тиражен потто. Библия асьме дырозь вуиз но дуннеын тужгес но тодмо книга луиз. Со возьматэ, апостол Пётрлэн таӵе кылъёсыз зэм луо шуыса: «Турын куасьмиз но, солэн сяськаез усьылӥз; нош Кузё-Инмарлэн кылыз пумтэм дауръёс улэ» (1 Пётр 1:24, 25).

[Сноска]

[Рамка но суредъёс]

БИБЛИЛЭСЬ КЫӴЕ БЕРЫКТЭМЗЭ ЛЫДӞОНО?

Трос кылъёсын Библиосты пӧртэм сямен берыктылӥзы. Куд-ог берыктэмъёсты валаны секыт, малы ке шуоно соос вуж но секыт кылын гожтэмын. Нош куд-огъёссэ валаны капчи, но юан кылдэ: шонер-а со берыктэмын? Вань сыӵе берыктэмъёс но, кудъёсаз котькуд кылыз берыктэмын.

Англи кылэ берыктэм «Священной Гожтэм — Выль дуннелэн берыктэмез», кудӥз поттэмын вал Иеговалэн Адӟись-Ивортӥсьёсыныз, вашкала еврей но грек кылъёсысь берыктэмын вал. Берыктӥсьёслэн нимъёссы гожтэмын ӧвӧл. Со берыктэм вылэ пыкиськыса, Библиез трос пӧртэм кылъёсы берыктӥзы на. Нош берыктыкузы ӵем учкылӥзы, мар гожтэмын вашкала еврей кылын Гожтэмъёсын но вашкала грек кылын Гожтэмъёсын. «Выль дуннелэн берыктэмез» вылын ужасьёс тыршизы луэмезъя берыктыны ваньзэ озьы, кызьы гожтэмын вал вашкала еврей но грек кылъёсын, одӥг малпанзэ но воштытэк. Берыктӥсьёслэн потэ вал, Библия туала лыдӟисьлы но валамон мед луоз шуыса, кызьы со валамон вал вашкала дыръя улӥсь адямиослы.

Куд-ог тодосчиос Библилэсь туала берыктэмъёссэ эскеризы, озьы ик «Выль дуннелэсь берыктэмзэ» но. Соослэн валамзы потэ вал, шонер-а соос берыктэмын, ӧвӧл-а. Одӥгез сыӵе тодосчиос пӧлысь — со Джейсон Бедун, Уйпал Аризонаысь Университетын ужась (США). 2003-тӥ арын со 200 бамъем книга поттӥз, кудаз ӵошатӥз укмыс англи кылэ берыктэм Библиосты. Со эскериз Библиысь куд-ог кылбуръёсты, кудъёсыз пумысен тодосчиос споръясько. Со юри бырйиз сыӵе кылбуръёсты, малы ке шуоно ӵапак сыӵе интыосын берыктӥсьёс шонертэм берыктыны быгатысалзы. Англи кылэ берыктэм Библиысь со кылбуръёсты пыр-поч эскерыса, со вашкала Грек Гожтэмъёсын ӵошатӥз. Кыӵе йылпумъян со лэсьтӥз та англи кылэ берыктэм Библиос пумысен?

Джейсон Бедун вера, тросэз адямиос но Библиез эскерисьёс малпамъя, «Выль дуннелэн берыктэмез» мукет берыктэмъёслэсь пӧртэм луэ шуыса, малы ке шуоно берыктӥсьёс сое асьсэ осконзыя тупатыса гожтӥзы. Но вераны кулэ, «Выль дуннелэн берыктэмез» пӧртэм луэ, малы ке шуоно со туж шонер берыктэмын но матын луэ вашкала еврей но грек кылъёсын Гожтэмъёслы. Тодосчилы уг кельшы ке но, кызьы «Выль дуннелэн берыктэмаз» куд-ог кылбуръёс берыктэмын, со вера, быдэсыз та берыктэм эскерем Библиос пӧлысь «тужгес но шонер луэ» шуыса. Та берыктэмез со «тужгес но умой берыктэмен» нима.

Профессор Биньямин Кедар, еврей кылъя тодосчи, «Выль дуннелэн берыктэмез» сярысь Джейсон Бедун выллем малпа. 1989-тӥ арын со вераз: «Адӟиське, сое берыктӥсьёс туж тыршизы шуыса шонер валаны но шонер берыктыны. [...] ...Мон нокытысь но ӧй адӟы, сое берыктӥсьёс асьсэлэсь малпанъёссэс отчы гожтӥзы шуыса».

Юалэ асьтэлэсь: «Малы мон Библиез лыдӟисько? Мар мыным кулэгес луэ: сое лыдӟыны капчи мед луоз шуыса, учкытэк, шонер-а со берыктэмын, ӧвӧл-а, яке мыным кулэгес, Библия туж шонер берыктэмын мед луоз шуыса?» (2 Пётр 1:20, 21). Та юанъёслы валэктонъёс сётӥды ке, тӥ бырйыны быгатоды, кыӵе берыктэмез лыдӟоно.

[Суред]

«Священной Гожтэм — Выль дуннелэн берыктэмез» трос кылъёсы берыктэмын

[Суред]

Масоретъёслэн гожъямъёссы

[Суред]

Татын гожтэмын Лукалэсь 12:7 кылбурлэн люкетэз: «Эн кышкалэ: тӥ тросэзлэсь векчи тылобурдоослэсь дуноесьгес»

[Суредъёс сярысь]

Foreground page: National Library of Russia, St. Petersburg; second and third: Bibelmuseum, Münster; background: © The Trustees of the Chester Beatty Library, Dublin