КУКЕ вераськон потэ вӧсяськон сярысь, тросэзлэн юанзы кылдэ, кызьы вӧсяськоно: сылыса-а, пукыса-а, оло нош, пыдесъяськыса-а? Мар верано вӧсяськыку? Библия дышетэ милемыз, кызьы вӧсяськоно, Инмар мед кылоз шуыса.

Библиын трос вӧсяськонъёс гожтэмын. Отысь адӟиське, Инмарлэн оскымон ужась-тыршисьёсыз пӧртэм интыосын но пӧртэм сямен вӧсяськизы шуыса. Кылсярысь, кин ке шара вӧсяськиз, нош кин ке — ас понназ; кин ке инме учкыса вӧсяськиз, нош кин ке — йырзэ мыкыртыса. Соослэн вӧсяськонъёссы сюлмысьтызы пото вал. Инмарлэн ужась-тыршисьёсыз ӧз вӧсяське, мудор азе султыса, весьсузьетэз киязы кутыса яке молитваосын книгаосысь вӧсяськонъёсты лыдӟыса. Малы соку Инмар соослэсь вӧсяськемзэс кылӥз?

Кызьы верамын вал ини талэсь азьло статьяын, соос вӧсяськизы одӥг гинэ Инмарлы — Иеговалы. Но вань на эшшо мар ке, мае лыдэ басьтоно. Библиын, 1 Иоаннлэн 5:14, верамын: «Инмар азе кышкатэк лыктыны быгатӥськомы: Солэн эрикезлы тэрытскыса, мае гинэ ум куриське, Со асьмеды кылзэ». Милям вӧсяськонъёсмы Инмарлэн эрикезъя луыны кулэ. Кызьы сое валано?

Вӧсяськонъёсмы Инмарлэн эрикезъя мед луозы шуыса, милемлы тодыны кулэ, кыӵе эрикез Инмарлэн. Со понна Библиез дышетоно. Нош ми Библиез умой ум ке тодӥське, Инмар вӧсяськеммес кылоз-а? Кылоз. Но Инмар возьма, ми мед тыршомы шуыса солэсь эриксэ тодыны, валаны сое но соя улыны (Матфей 7:21—23). Милемлы вӧсяськонъёсамы пыртыны кулэ сое, мае ми выльзэ тодӥськомы Библиысь.

Иегова сярысь но солэн эрикез сярысь тросгес тодыса, милям осконмы юнма. Нош оскон со эшшо одӥгез, мар туж кулэ луэ. Иисус вераз: «Оскыса вӧсяськыкуды мае гинэ уд куре, ваньзэ басьтоды» (Матфей 21:22). Но осконмылэн юн инъетэз луыны кулэ. Ми быгатыны кулэ валэктыны, малы ми оскиськомы солы, мае ум но адӟиське (Еврейёслы 11:1). Кылсярысь, Библиын верамын, Иегова, кудзэ ми ум адӟиське, зэмзэ ик вань шуыса. Со юрттэ но вӧсяськонъёсмес кылэ, ми солы осконэн вӧсяськиськомы ке. Ми котьку быгатӥськомы курыны Иеговаез осконмес будэтыны, нош со куронмес одно ик быдэстоз (Лука 17:5; Иаков 1:17).

Вань на эшшо мар ке, мае лыдэ басьтоно, Инмарлы вӧсяськыкумы. Иисус вераз: «Мон пыр сяна нокин но Атай доры уг лыкты» (Иоанн 14:6). Озьыен, ми Атаймылы, Иеговалы, матэ кариськыны быгатӥськомы Иисус пыр гинэ. Соин ик Иисус дышетӥз аслэсьтыз дышетскисьёссэ солэн нимыныз вӧсяськыны (Иоанн 14:13; 15:16). Но со уг возьматы, ми Иисуслы вӧсяськиськомы шуыса. Ми вӧсяськиськомы Иисус пыр. Озьы возьматӥськомы, Иисуслы луыса гинэ ми быгатӥськомы шуыса святой Атаенымы кусыпъёсмес тупатыны.

Одӥг пол Иисуслэн дышетскисьёсыз куризы сое: «Кузё-Инмаре! Милемыз вӧсяськыны дышеты» (Лука 11:1). Дышетскисьёсыз Иисуслэсь ӧз юалэ, кызьы вӧсяськоно. Соослэн тодэмзы потэ вал, мар сярысь вӧсяськоно.