Пукты син азяд таӵе югдурез: Юлия, ачиз шоры синучконэ учкыса, аслыз мултэс кӧй кадь потэ. Анай-атаез но эшъёсыз Юлия сярысь лы но ку кадь гинэ кылем ини шуыса верало ке но, ачиз со одно ик чиедмоно шуыса малпа.

Берло дыре со малпаськылӥз ас бордаз умой-умой кутскыны, «ог-кык килограммзэ» куштон понна. Со понна солы кӧня ке нунал гинэ сиськытэк улоно...

Тынад но со выллем малпанъёсыд луизы ке, мар карод тон?

Вылтус сярысь сюлмаськонын номыр сыӵеез ӧвӧл. Библиын нимысьтыз пусъемын, Сарралэн, Рахильлэн, Авигеялэн, Иосифлэн но Давидлэн вылтуссы чебер вал шуыса. Озьы ик, Библиын верамын Ависага нимо нылмурт сярысь, кудӥз «туж чебер вал» (3 Эксэйлыкъёслэн 1:4).

Тросэзлэн егитъёслэн вылтуссы сяна, номыр сярысь малпаськемзы уг луы ни, кадь. Со бадӟым шуг-секытъёсы вуттыны быгатэ. Лыдэ басьты:

• Одӥг эскерон возьматэмъя, 58 процент нылъёс малпало вал, соос туж куаемын шуыса, куке зэмзэ ик куаемын вал 17 процентэз гинэ.

• Мукетыз эскерон возьматӥз, 45 процент чиед кышномуртъёс малпало вал, соослы чиедмоно шуыса!

• Чиедмыны турттыса, куд-ог егитъёс анорексиен висьыны кутско. Со сыӵе висён, куке адями ассэ восьмон калэ вуттэ но солэн улонэзлы кышкытлык кылдэ.

 Ас вылад анорексилэсь яке сиськонэн герӟаськем мукет висёнлэсь тодметъёссэ шӧдӥськод ке, юрттэт кур. Вазиськы анаедлы, атаедлы яке мукет матысь адямиедлы, кудӥз быдэ вуэмын ини. Библиын верамын: «Эш эшсэ котькыӵе дыре но яратэ, шуге-леке сюрыку, агай-вын кадь со юрттыны лыктэ» (Мадёнъёс 17:17).

Адямиез зэмзэ ик чебер каре со, мар солэн сюлмаз. Кылсярысь, ойдолэ малпаськомы Давид эксэйлэн Авессалом пиез сярысь. Библиын верамын:

«Авессалом кадь чебер но ушъямон пиосмурт ӧй вал; пыдтышкысеныз йырйылозяз солэн шекез ӧй вал» (2 Эксэйлыкъёслэн 14:25).

Но та егит пиосмурт вылтӥяськись, данэз яратӥсь но кескич вал! Соин ик Библия сое умоен уг возьматы; отын верамын, со тушмон пала кариськись но туж лек йыруж лэсьтӥсь вал шуыса.

Библиын юнме сётэмын ӧвӧл таӵе визь-кенешъёс:

«Ялан выльдӥськись выль адями луонэн» дӥсяське (Колоссыослы 3:10).

«Тӥляд чеберъяськонды вылласянь медаз луы... Адямилэн сюлэм пушказ бырытэк мед улоз зӥбыт, востэм дух» (1 Пётр 3:3, 4).

Чебер вылтус сярысь сюлмаськонын номыр уродэз ӧвӧл ке но, нырысь ик сюлмаськоно со сярысь, кыӵе тон адями. Адямиез мукетъёсызлэн син азязы чебер уг кары веськрес мугор яке чебер вылтус, нош чебер каро солэн умой сямъёсыз! «Син шоры йӧтэ адямилэн чебер вылтусыз,— шуэ Анна нимо нылаш.— Нош йырамы кылё солэн умой сямъёсыз».

Ӵем-а тынад вылтусыд аслыд уг яра?

Малпаськылӥд-а тон, операция карыса яке диета возьыса, вылтусыдлэсь кыӵе ке шекъёссэ тупатон сярысь?

Вылтустэ воштыны быгатысалыд ке, мае тон воштысалыд? (Пусйы.)

• СИНЪЁСТЭ

• НЫРДЭ

• ЙЫРСИДЭ

• МУГОРДЭ

• СИНКАШЪЁСТЭ

• МУКЕТСЭ

Нырысетӥ кык юанъёсын тон соглаш кариськид ке, нош куинетӥяз юанын куинь яке тросгес кылъёсты пусйид ке, тани мар сярысь малпаськы: учко меда мукетъёсыз тон шоры озьы ик умойтэм, кызьы ачид учкиськод. Вылтусыд сярысь ортчыт трос сюлмаськид ке, со умойтэме вуттыны быгатоз (1 Эксэйлыкъёслэн 16:7).