Ӟеч ивор, кудӥз вера, адямиос музъем вылын пырак дауръёс ӵоже улозы шуыса, гожтэмын Библиын (Псалтирь 36:29). Библие пыро 66 пичи книгаос. Сое 40 пала Инмарлы оскымон пиосмуртъёс гожтӥзы. Библилэсь нырысетӥ вить книгаоссэ гожтӥз Моисей пророк ог 3 500 ар талэсь азьло. Нош солэсь берпуметӥ книгазэ гожтӥз апостол Иоанн. Со дырысен 1 900 арлэсь тросгес ортчиз ини. Кинлэн малпанъёсыз гожтэмын Библиын? Аслэсьтыз малпанъёссэ Инмар святой дух пыр аслаз пророкъёсызлы вераз (2 Эксэйлыкъёслэн 23:2). Соос Инмарлэсь малпанъёссэ гожъязы, асьсэлэсь ӧз. Озьыен, Библилэн Авторез — Иегова. (Лыдӟе 2 Пётрлэсь 1:20, 21; 2 Тимофейлы 3:16.)

Учке «Кин Библилэн Авторез?» видеороликез.

Библиын шонер но пыр-поч верамын, мар луоз азьланяз. Одӥг адями но уг быгаты сое вераны. Соин ик Библия — со Инмарлэн книгаез (Иисус Навин 23:14). Ваньзэ Быгатӥсь Инмар гинэ зэмзэ вераны быгатэ, мар возьма адямиосты. (Лыдӟе Исаиялэсь 42:9; 46:10.)

Библия Инмарлэн книгаез бере, соин ик со аспӧртэмлыко книга луыны кулэ. Со зэмзэ но сыӵе ик луэ. Туннэ нуналлы трос миллион Библиос печатламын ини. Библия 450-лэсь тросгес кылъёсы берыктэмын. Со туж вашкала книга, озьы ке но со наукаен быдэсак соглаш луэ. Сое 40 пӧртэм адямиос гожъязы ке но, соослэн гожъямзы ог-огзылы пумит ӧвӧл. Библиез лыдӟыса, валаны луэ, Инмар милемыз яратэ шуыса. Со книга туннэ но юрттэ адямиослы улонзэс умой пала воштыны. Ваньмыз, мар вылӥын верамын вал, трос миллион адямиосты оскытэ, Библия — Инмарлэн Кылыз шуыса. (Лыдӟе 1 Фессалоникаослы 2:13.)

Учке «Кытысь ми тодӥськомы, Библиын зэмлык гожтэмын шуыса?» видеороликез.

Библиын бадӟым инты басьтэ ӟеч ивор, Инмар адямиосты яратэ но вуонояз соослы умой улон дасяз шуыса. Библия вера, кызьы нырысетӥ адямиос музъем вылын райын улыны луонлыксэс ыштӥзы но кызьы рай выльысь тупатэмын луоз. (Лыдӟе Усьтӥськонэз 21:4, 5.)

Озьы ик Библиын законъёс, возетъёс но визь-кенешъёс гожтэмын. Со сяна, отын гожтэмын трос учыръёс, кудъёсыз милемлы Инмарлэсь сямъёссэ усьто. Ваньмыз со юрттэ милемлы Кылдытӥсьмес умойгес тодыны. Библиын валэктэмын, кызьы ми Инмарен эшъёс луыны быгатомы. (Лыдӟе Псалтирез 18:8, 12; Иаковлэсь 2:23; 4:8.)

Библиез валаны тӥледлы юрттоз та брошюра. Та брошюраын кутэмын сыӵе ик дышетон амал, кудзэ уже кутӥз Иисус Христос. Иисус Библиысь пӧртэм кылбуръёсты вера вал но собере соосты валэктэ вал. (Лыдӟе Лукалэсь 24:27, 45.)

Инмарлэсь ӟеч ивор сяна, номыр умоез ӧвӧл ни! Озьы ке но куд-огъёсызлы со нокыӵе ик уг поты, нош кинлэсь ке но со вожзэ но поттэ. Но со тӥледыз медаз дугдыты, малы ке шуоно Инмар сярысь тодон-валанэн герӟаськемын пырак улонды. (Лыдӟе Иоаннлэсь 17:3.)