Библия воштэмын ӧй вал, солы оскыны луэ. Вашкала рукописьёсты эскерон возьматэ: Библиез оглом басьтоно ке, со воштэмын ӧй вал, сое трос сюрс аръёс ӵоже ӝог уродмись материалъёс вылэ гожъязы ке но.

 Шедьтэмын трос сюрс вашкала рукописьёс, кудъёсаз Библиысь книгаос гожтэмын. Соос пӧлысь куд-огъёсыз ог-огзылэсь пӧртэм луо. Со возьматэ, соосты гожъяку, янгышъёс лэсьтэмын вал шуыса. Тросэз сыӵе пӧртэмлыкъёс бадӟымесь ӧвӧл но Библиысь малпанъёсты уг вошто. Озьы ке но вань кӧня ке бадӟым пӧртэмлыкъёс. Соос пӧлысь куд-огъёсыз вашкала дыръя юри лэсьтэмын вал, вылды, Библиысь малпанъёсты воштон понна. Эскеромы кык учыръёсты.

1.   Библилэн куд-ог тужгес но вашкала берыктэмъёсаз 1 Иоаннлэн 5:7 таӵе кылъёс вань: «Инмын куинь шара Ивортӥсь: Атай, Кыл но Святой Дух. Соос куинез одӥг луо». Но оскымон рукописьёсысь адӟиське: нырысь ик та кылъёс гожтэмын ӧй вал, соосты берло ватсазы a. Соин ик Библилэн туала оскымон берыктэмъёсаз та кылъёс гожтэмын ӧвӧл.

2.   Библилэн вашкала рукописьёсаз Инмарлэн нимыз трос сюрс пол пумиське. Но Библилэн трос берыктэмъёсаз солэн нимыз интые мукет кылъёс гожтэмын, кылсярысь, «Кузё-Инмар» но «Инмар» кылъёс.

 Та дырлы шедьтэмын туж трос рукописьёс, кудъёсызлы луыса янгышъёсты шедьтыны капчигес b. Та рукописьёсты ог-огенызы ӵошатыса, мар вераны луэ туала Библия пумысен?

•   Уильям Грин тодосчи Еврей Гожтэмъёсысь («Вуж Сӥзёнысь») текст сярысь шуиз: «Юн осконэн вераны луэ, вашкала гожъямъёс пӧлысь одӥгез но сокем шонер гожтэмын ӧй вал».

•   Фредерик Брюс, Библиез эскерись тодосчи, Христиан Грек Гожтэмъёс («Выль Сӥзён») сярысь вера: «Ӵошатоно ке материалъёсын, кудъёсыз классической произведениослэсь зэм луэмзэс возьмато (нош соослы ваньзы оско), материалъёс, кудъёсыз Выль Сӥзёнлэсь зэм луэмзэ возьмато, тросгес луо».

•   Сэр Фредерик Кеньон, Библилэсь рукописьёссэ эскерон удысысь тодмо тодосчи, йылпумъян лэсьтӥз: «Христиан мурт, кудӥз Библиез лыдӟе, быдэсак оскыны быгатэ, со зэм но Инмарлэсь Кылзэ лыдӟе шуыса, кудзэ выжыысь выжые сётъязы но ми дырозь, сю аръёс ортчыса но, бадӟым воштӥськонъёстэк вуиз».

•   Соос, кинъёс Еврей Гожтэмъёслэсь но Христиан Грек Гожтэмъёслэсь копиоссэс гожъязы, воштытэк кельтӥзы со интыосты но, кытын Инмарлэн калыкезлэн бадӟым янгышъёсыз сярысь вераське c (Лыдпусъёс 20:12; 2 Эксэйлыкъёслэн 11:2—4; Галатъёслы 2:11—14). Озьы ик соос воштытэк кельтӥзы текстысь со интыосты но, кытын гожтэмын, кызьы Инмар иудейёсты судъяз кылзӥськымтэзы но зэмос луисьтэм дышетонъёссы понна (Осия 4:2; Малахия 2:8, 9; Матфей 23:8, 9; 1 Иоанн 5:21). Сыӵе учыръёсты воштытэк кельтыса, копиосты гожъясьёс возьматӥзы, соослы оскыны луэ но соос Инмарлэсь святой Кылзэ туж гажало шуыса.

•   Библия Инмарлэн кивалтэмез улсын гожтэмын вал бере, соин ик валамон: Инмар сюлмаськиз, со ми дырозь воштӥськытэк мед вуоз шуыса d (Исаия 40:8; 1 Пётр 1:24, 25). Со озьы, малы ке шуоно Инмарлэн потэ вал, адямиос Библиысь пайдаё визь-кенешъёсты мед шедьтозы шуыса, вашкала дыръя но, али но (1 Коринфъёслы 10:11). Библиын гожтэмын: «Ваньмыз, мар азьвыл гожтэмын вал, гожтэмын асьмемыз визьман-дышетон понна. Чидан пыр, Священной Гожтэм пыр мылкыддэс ӝутыса, асьмеос оскиськыса мед уломы шуыса» (Римъёслы 15:4).

•   Иисус но солэн дышетскисьёсыз Еврей Гожтэмъёслэн копиосысьтызы куд-ог интыоссэ уже кутӥзы но быдэсак оскизы, соос янгышъёстэк гожтэмын вал шуыса (Лука 4:16—21; Апостолъёслэн ужъёссы 17:1—3).