Библия валаны юрттэ, 1914-тӥ арын инмын Инмарлэн Эксэйлыкез кылдытэмын вал шуыса. Тае адӟыны луэ азьпалзэ ивортонысь, кудӥз гожтэмын Библиын, Данииллэн книгаяз 4-тӥ люкетын.

 Азьпалзэ ивортон. Навуходоносорлы, Вавилонлэн эксэезлы, Инмар возьматӥз бадӟым писпу сярысь азьпалзэ ивортӥсь уйвӧт. Со писпу погыртэмын вал. Кылем лӥяллэн будонэз «сизьым дыр-вапумъёслы» дугдытэмын вал, собере писпу нош ик будыны кутскиз (Даниил 3:98, 4:7—13).

 Азьпалзэ ивортонлэн нырысетӥ быдэсмонэз. Туж бадӟым писпу возьматӥз Навуходоносор эксэез (Даниил 4:17—19). Вераны луоз, та эксэй погыртэмын вал шуыса, куке огдырлы визьзэ ыштӥз но сизьым арлы кивалтон ужезлэсь палэнтэмын вал (Даниил 4:22). Куке Инмар Навуходоносорлы визьзэ берыктӥз, со выльысь кивалтыны кутскиз но Инмарлэсь кивалтэмзэ данъяз (Даниил 4:31—33).

 Азьпалзэ ивортонлэн бадӟымез быдэсмонэз. Та азьпалзэ ивортонлэн ужпумез: «улӥсьёс мед тодозы, Вылысь Инмар адями эксэйлыкез киулаз возе шуыса, сое сётэ солы, кинлы сётэмез потэ, солы кузёе пуктэ адямиос пушкын ултӥям муртэ» (Даниил 4:14). Потэ вал-а Инмарлэн аслэсьтыз кивалтэтсэ вылтӥяськись Навуходоносорлы сётэмез? Уг поты вал, малы ке шуоно солэсь азьвылгес Инмар сётӥз солы азьпалзэ ивортӥсь мукет уйвӧтэз, кытысь валаны луэ, Навуходоносорлы но, дунне вылысь мукет кивалтӥсьёслы но сыӵе дан сётэмын уз луы шуыса. Со интые, Инмар «пумтэм вапумъёсы куашкасьтэм эксэйлык ӝутоз» (Даниил 2:31—44).

 Кӧня ке дауръёс солэсь азьло Инмар кылдытӥз эксэйлык, кудӥз возьматӥз музъем вылын кивалтэмзэ. Со эксэйлык — вашкала Израиль. Инмар та эксэйлыкез куашканлэсь ӧз утьы, малы ке шуоно солэн кивалтӥсьёсыз оскымонэсь ӧй вал. Со дыре ик Инмар азьпалзэ ивортыса вераз, та эксэйлыкез сётоз шуыса солы, кинлэн Кузё луыны законъя правоез вань (Иезекииль 21:25—27). Библия верамъя, Иисус Христослэн ӵапак сыӵе правоез вань та эксэйлыкын кивалтыны, кудӥз пумтэм дауръёс ӵоже сылоз (Лука 1:30—33). Навуходоносорен ӵошатыса, Иисус «востэм, зӥбыт сюлэмо» вал (Матфей 11:29).

 Мае возьматэ писпу, кудӥз сярысь вераське Данииллэн книгаяз 4-тӥ люкетын? Куддыръя Библиын писпуос возьмато кивалтэтэз, яке эксэй луонэз (Иезекииль 17:22—24; 31:2—5). Динииллэн книгаысьтыз 4-тӥ люкетысь туж бадӟым писпу бадӟымаз быдэсмонын возьматэ Инмарлэсь кивалтэтсэ.

 Мае возьматэ писпуэз погыртон? Нырысетӥ быдэсмонын со возьматӥз, Навуходоносорлэн кивалтэмез огдырлы дугдытэмын вал шуыса. Озьы ик быдӟымаз быдэсмонын но со возьматӥз, Инмарлэн музъем вылын кивалтэмез огдырлы дугдытэмын луоз шуыса. Со озьы луиз, куке Навуходоносор куашкатӥз Иерусалимез, кудаз Израильлэн эксэйёсыз «Кузё-Инмарлэн престолэз вылын» пукизы но Инмарлэсь кивалтэтсэ возьматӥзы (1 Паралипоменон 29:23).

 Мае возьмато «сизьым дыр-вапумъёс»? «Сизьым дыр-вапумъёс» возьмато вакытэз, куке Инмар калыкъёслы музъемен кивалтыны лэзиз, нош солэн пуктэм кивалтэтэз адямиослэн ужъёсазы ӧз пыриськы. «Сизьым дыр-вапумъёс» кутскизы асьме вакытлэсь азьло 607-тӥ арын коньывуон толэзе, куке, Библия валэктэмъя, Иерусалимез вавилон ожгарчиос куашкатӥзы a (4 Эксэйлыкъёслэн 25:1, 8—10).

 Кӧня кыстӥськизы «сизьым дыр-вапумъёс»? Навуходоносорен луэм учырын кадь ик, со сизьым ар гинэ луыны уг быгаты. Иисус тае валэктӥз, куке вераз, «язычникъёслэн дырзы бырытозь, Иерусалимез язычникъёс лёгаса возёзы» шуыса (Лука 21:24). «Язычникъёслэн дырзы», яке вакыт, куке Инмар калыкъёслы аслэсьтыз кивалтэтсэ «лёганы» лэзиз, возьматэ со ик дырез, кудӥз Данииллэн книгаяз 4-тӥ люкетын «сизьым дыр-вапумъёс» шуыса нимаське. Озьыен, Иисус музъем вылын дыръя «сизьым дыр-вапумъёс» йылпумъяськемын ӧй вал на.

 Библия валаны юрттэ, кӧня кыстӥськизы «сизьым дыр-вапумъёс». Отын гожтэмын, куинь но ӝыны «дыр» 1 260 нунал кыстӥське шуыса. Нош «сизьым дыр-вапумъёс» кык поллы тросгес луо но 2 520 нунал кыстӥсько (Усьтӥськон 12:6, 14). Библиысь «одӥг нунал интые одӥг ар» веранэз уже кутыса, ми валаськомы, 2 520 нунал 2 520 ар луэ шуыса. Озьыен, «сизьым дыр-вапумъёс», яке 2 520 ар, йылпумъяськизы 1914-тӥ арын коньывуон толэзе b (Лыдпусъёс 14:34; Иезекииль 4:6).