Иегова — со зэмос Инмар, кудӥз сярысь Библиын вераське. Со — ваньзэ Кылдытӥсь (Усьтӥськон 4:11). Солы йыбыртъязы Авраам но Моисей пророкъёс, озьы ик Иисус Христос но (Улон-вылон 24:27; Потон 14:31б; 15:1, 2; Иоанн 20:17). Иегова одӥг калыклэн гинэ Инмарез ӧвӧл, «Со быдэс музъем выллы быдӟым эксэй луэ» (Псалтирь 46:3).

 Библия верамъя, Иегова — со Инмарлэн нимыз (Улон-вылон 22:14; Потон 17:15; Судьяос 6:24). Та ним кылдэ еврей глаголлэсь, кудӥз берыктӥське «луыны» шуыса. Куд-ог тодосчиослэн малпамзыя, та ним возьматэ «Со ваньмызлы луыны сётэ» верамез. Та нимлэн сыӵе пуштросэз возьматэ, Иегова — со Кылдытӥсь но аслэсьтыз кылзэ быдэсъясь шуыса (Исаия 55:10, 11). Библия милемлы тодматскыны юрттэ соин, кин Иегова нимез нуллэ, тужгес но тодыны юрттэ солэсь валтӥсь сямзэ, яратонзэ (Потон 34:5—7; Лука 6:35; 1 Иоанн 4:8).

 Инмарлэсь нимзэ удмурт кылын «Иегова» шуыса верало. Еврей кылын сое гожто ньыль букваосын יהוה (ЙХВХ яке ИГВГ), кудъёссэ тетраграмматон шуо. Кызьы Инмарлэсь нимзэ вашкала еврей кылын веразы, пыр-поч тодмо ӧвӧл.

Малы тодмо ӧвӧл, кызьы вашкала еврей кылын Инмарлэсь нимзэ веразы?

 Вашкала еврей кылын ӧй вал букваос, кудъёсыз гласной куараосты возьматъязы. Со дыре гожъязы со букваосты гинэ, кудъёсыз согласной куараосты возьматъязы. Лыдӟиськыкузы адямиос кулэ луись гласной куараосты малпаськытэк пуктылӥзы. Нош куке Еврей Гожтэмъёс (Вуж Сӥзён) гожтэмын вал ини, иудейёс малпаны кутскизы, Инмарлэсь нимзэ шара вераны уг яра шуыса. Отын, кытын тетраграмматон пумиськылӥз, Инмарлэн нимыз интые, соос «Кузё-Инмар» яке «Инмар» шуыса веразы. Дыр ортчемъя, адямиос та кылъёсты сокем ӵем кутыны кутскизы, со, кызьы вашкала дыръя Инмарлэсь нимзэ веразы, чылкак вунэтэмын вал a.

 Куд-огъёсызлэн верамзыя, Инмарлэсь нимзэ «Яхве» шуыса веразы. Нош куд-огъёсыз мукет сямен верало. Кулэм зарезь котырысь шедьтэм одӥгаз свитокын вань Левит книгалэн люкетэз, кудӥз грек кылын гожтэмын. Отын Инмарлэн нимыз Иао́ шуыса гожтэмын. Вашкала грек кылын Инмарлэсь нимзэ гожъязы Иаэ́, Иабэ́ но Иауэ́ шуыса. Но номыр уг возьматы, Инмарлэн нимыз вашкала еврей кылын озьы кутӥськиз шуыса b.

Инмарлэн нимыз сярысь шонертэм малпанъёс

 Шонертэм малпан.Инмарлэн нимыз Библиын гожтэмын луыны кулэ ӧвӧл, малы ке шуоно нокин уг тоды, кызьы сое еврей кылын веразы.

 Зэмлык. Сыӵе адямиослэн малпамзыя, Инмарлэн потэ, солэсь нимзэ вань кылъёсын одӥг сямен мед вералозы шуыса. Нош Библия верамъя, вашкала дыръя Инмарлэн ужась-тыршисьёсыз, кудъёсыз пӧртэм кылъёсын вераськизы, нимъёсты пӧртэм сямен веразы.

 Кылсярысь, эскеромы Иисус Навинлэсь нимзэ, кудӥз Израильын судья вал. Асьме вакытысь нырысетӥ даурын улӥсь христианъёс, кудъёсыз еврей кылын вераськизы, та нимез Йехошу́а шуыса веразы. Нош христианъёс, кудъёсыз грек кылын вераськизы, Иесу́с шуыса веразы. Библиын гожтэмын, кызьы та еврей нимез грек кылын веразы. Озьыен, христианъёс веразы со нимез, кудзэ соос асьсэ кылынызы вераны дышемын вал (Апостолъёслэн ужъёссы 7:45; Еврейёслы 4:8).

 Озьы ик Инмарлэсь нимзэ но пӧртэм кылъёсын пӧртэм сямен верало. Нош кызьы гинэ медаз вералэ, тужгес но валтӥсез: Библиын Инмарлэн нимыз гожтэмын котькытын, кытын со нырысь ик сылэ вал.