Akristão va tava okuti Yesu wa fila akandu omanu. (1 Petulu 3:18) Pole, voku popeliwa mua kongela ovina vikuavo okuti, oku tava lika ku Yesu Ndupopeli ci sule. Olondele via kũlĩha okuti Yesu ‘Omõla a Suku,’ pole, ovio vi ka nyõliwa, ka vi ka popeliwa.—Luka 4:41; Yuda 6.

•  Nye ndi sukila oku linga oco ndi popeliwe?

•  Nye ci popiwa “Kohutililo Yukuekandu”?

•  “Ohutililo Yukuekandu” ya Tunda pi?

•   Ove o sukila oku kolela okuti, Yesu wa eca omuenyo waye omo liakandu etu. (Ovilinga 16:30, 31; 1 Yoano 2:2) Mua kongela oku kolela okuti, Yesu wa kala muẽle omunu kuenda cosi Embimbiliya li popia catiamẽla kokuaye, cocili.

•   Oku lilongisa eci Embimbiliya li popia. (2 Timoteo 3:15) Embimbiliya li popia okuti, upostolo Paulu kuenda Sila va sapuila ukuakayike hati: “Kolela Ñala Yesu kuenje o popeliwa.” Noke ovo va fetika oku longisa “ondaka ya Yehova” a kukuakayike. (Ovilinga 16:31, 32) Eci ci lekisa okuti, ukuakayike ka ponduile oku kolela muẽle ku Yesu, te lika nda wa kuatele elomboloko Liondaka ya Suku. Eye wa sukilile oku kuata ukũlĩhĩso wa suapo wa kunamẽla Kovisonehua.—1 Timoteo 2:3, 4.

•   Oku likekembela. (Ovilinga 3:19) Ove o sukila oku likekembela, ale oku livela ovina vĩvi ove wa sima, pamue wa linga kosimbu. Oku likekembela kuove ku limbukiwa lomanu osimbu o liwekapo oku linga ovina Suku a nyãle kuenda oku “linga ovina vi lekisa oku likekembela” kuove.—Ovilinga 26:20.

•   Oku papatisiwa. (Mateo 28:19) Yesu wa popele okuti, vana va linga olondonge viaye va sukila oku papatisiwa. Ukuakayike una wa tukuiwa kefetikilo, wa papatisiwa. (Ovilinga 16:33) Cimuamue haico, eci upostolo Petulu a longisa owiñi ocili catiamẽla ku Yesu, “vana va tava kondaka yaye lutima wosi, va papatisiwa.”—Ovilinga 2:40, 41.

•   Oku pokola kolonumbi via Yesu. (Va Heveru 5:9) Vana va “linga ovina viosi” Yesu a handeleka, va lekisa kekalo liomuenyo wavo okuti, ovo olondonge viaye. (Mateo 28:20) Ovo va linga “vakuakutẽlisa ondaka, okuti vakuakuyeva lika . . ., hacoko.”—Tiago 1:22.

•   Oku pandikisa toke kesulilo. (Marko 13:13) Olondonge via Yesu vi “sukila oku kuata epandi” oco vi popeliwe. (Va Heveru 10:36) Ndeci, upostolo Paulu a pokola ciwa kalongiso a Yesu, wamamako lekolelo ku Suku kuenda wa pandikisa tunde keteke a linga Ukristão toke eci a fa.—1 Va Korindo 9:27.

 Vatavo amue omanu va siata oku linga olohutililo ndevi, “Ohutililo Yukuekandu” kuenda “Ohutililo Yepopelo.” Vana va likutilila va limbuka akandu avo kuenda va lekisa ekolelo liokuti Yesu wa fila akandu avo. Ovo va pingavo oco Yesu a iñile vovitima viavo ale vomuenyo wavo. Pole, Embimbiliya ka li tukula ale oku vetiya oku linga “Ohutililo Yukuekandu.”

 Omanu vamue va sima okuti, noke yoku linga “Ohutililo Yukuekandu,” omunu o kolela okuti, o ka popeliwa. Pole, lomue o popeliwa omo lioku linga ohutililo. Omo ka tua lipuile, tu amamako oku lueya. (1 Yoano 1:8) Eli olio esunga lieci Yesu a longisila olondonge viaye oku likutilila olonjanja viosi, oku pinga ongecelo yakandu. (Luka 11:2, 4) Handi vali, Akristão vamue va laikele oku popeliwa, va pumba esumũlũho liaco omo va liwekapo oku vumba Suku.—Va Heveru 6:4-6; 2 Petulu 2:20, 21.

 Vakuakukonomuisa va kuete ovisimĩlo via litepa viatiamẽla oku kua tunda “Ohutililo Yukuekandu.” Vamue va popia okuti, ociholo caco ca fetika vokuenda kuepongoloko lia pita vetavo lio Protestante. Vakuavo va tava okuti, omanu va linga “Ohutililo Yukuekandu” eci atavo okaliye a fetika kocita 18 kuenda 19. Ndaño ndoco, elinga liaco ka li tukuiwa Vovisonehua, li li patãla lalongiso Embimbiliya.