Omanu vosi va kuete onduko. Ka ca sungulukile hẽ okuti Suku o kuatavo onduko? Oku kuata onduko, ocina cimue ca velapo voku linga ukamba lomanu umue. Anga hẽ oku kuata ukamba la Suku ca litepa?

 Vembimbiliya Suku wa popia hati: “Ame Yehova, oyo onduko yange.” (Isaya 42:8) Ndaño okuti Suku o kuete olonduko vialua viekemãlo, ndeci: “Suku Ukuonenewosi,” “Ombiali Yoluali luosi” kuenda “Ululiki”, eye wa kapako afendeli vaye poku va vetiya oku tukula onduko yaye.—Efetikilo 17:1; Ovilinga 4:24; 1 Petulu 4:19.

 Vambimbiliya alua kelivulu Lietundilo 6:3, ku sangiwa onduko ya Suku. Ocinimbu eci ci popia ndoco: “Nda tukuluka ku Avirahama kuenda ku Isake lo ku Yakoba nda Suku Ukuonenewosi. Puãi sia lisituluile kokuavo londuko yange Yehova.”

 Yehova, oyo onduko ya Suku yina ya siata oku tukuiwa kelimi Liumbundu tunde kosimbu. Ndaño okuti olonoño vialua via nõlapo oku tukula viti “Yawe,” Yehova oyo onduko ya kũlĩhĩwa vali calua. Embimbiliya liatete ka lia sonehĩwile kelimi Liumbundu, olio lia sonehĩwa kelimi lio Heveru. Kelimi liaco onduko ya Suku ya sonehĩwile lolondimbukiso evi, יהוה. Olondimbukiso viaco vikuãla vi lomboloka okuti, YHWH kuenda via kũlĩhĩwa okuti, o Tetragrama.