Olohueli vialua vi popia okuti ka via siatele oku sapela calua, ndaño va kasi pamosi. Momo lie?

•  Oku kala pamosi, pole ocipãla—momo lie?

•  Ceci o sukila oku linga

•  Ceci olohueli vimue vi popia

•  Ono yoku sapela

•   Ekavo

   “Eci ame lulume wange tu sanda otembo yoku sapela, umue pokati ketu olonjanja viosi o popia hati wa kava. Nda nda kava, ovina viosi vi ndi lingisa ño onyeño ndaño muẽle vina vitito. Kuenje tu nõlapo oku tala o televisãu.”—Anna

•   O internet

   “Ca leluka oku pesila otembo yalua vo internet. Noke o limbuka okuti otembo ya pita kuenda kua sapelele lohueli yove. Nda oco, kavali ka va sesamẽla oku kala pocitumãlo cimuamue.”—Katherine

•   Ovisimĩlo via litepa

   “Eci ulume wange a tiuka kupange, o sole calua oku linga ovina a sole. Ndi sima okuti eye o sukila otembo yoku puyuka, momo o talavaya calua. Pole, ndi yongola okuti tu pita otembo yalua kavali.”—Jane.

•  Upange

   “Omo liuloño wa livokiya calua, tua siata oku talavaya calua ndaño muẽle ceci tu kasi konjo lepata. Olonjanja vialua ndi tambulula asapulo atiamẽla kupange okuti otembo yaco nda nda yi pesila koku kala lukãi wange.”—Mark.

•   Ivaluka okuti oku kala pamosi otembo yalua, ci panga onepa volohuela.

   Onumbi Yembimbiliya: “Vu kũlĩha ovina via velapo vali.”—Va Filipoi 1:10.

   Ovina o sukila oku sokolola: O lekisa hẽ okuti olohuela viove ovio via velapo vali okuti, upange kuenda ovina vikuavo o sole oku linga votembo yove yepuyuko vi sule? Anga hẽ o sanda lika oku kala lulume wove ale lukãi wove nda ku kuete cimue coku linga?

   Onumbi: Olonjanja viosi lingi esokiyo lioku kala otembo yalua pamosi okuti lacimue ci vu tateki.

   “Ndi sole calua eci ulume wange a sokiya oku linga cimue okuti cetu lika kavali. Eci eye a ci linga ndi liyeva okuti nda velapo kuenda ndi limbuka okuti eye o sanjukilavo oku kala lame. Eci ci vokiya ocisola cange kokuaye.”—Anna.

•    “Ku ka pesile” otembo yalua vo telefone.

   Onumbi Yembimbiliya: “Kuli otembo ya sokiyiwa oco ku tẽlisiwe ovina viosi.”—Ukundi 3:1.

   Ovina o sukila oku sokolola: Anga hẽ wa siata oku ecelela oku pesela otembo yalua poku tanga asapulo vo telefone yove okuti, otembo yoku kala lohueli yove yi sule?

   Onumbi: Seteki oku telekela kumosi eteke leteke kuenda otelefone yi kale pocitumãlo cikuavo. Vepuluvi liondalelo oyo onjila yimue yiwa yoku sapela ovina via pita vokuenda kueteke.

•   Nda citava lingi esokiyo lioku landela kumosi ovina, loku lingila kumosi ovopange okonjo.

   Onumbi Yembimbiliya: “Vavali va velapo okuti umosi o sule, momo ovo va kuete onima yiwa yupange wavo walua.”—Ukundi 4:9, etosi.

   Ovina o sukila oku sokolola: Anga hẽ vu kuete ocituwa coku litepela ovopange kuenda poku landa ovina vu sukila ale oku tetulula ovitangi, wa siati oku litepa?

   Onumbi: Lingili kumosi ovina ndaño muẽle upange waco u pondola oku lingiwa lomunu umosi.

   “Ku ka tende ovopange amue ndeci, oku landa ovina, oku sukula alonga, oku vaka uwalo kuenda oku yelisa onjo, ci lingiwa lekisika. Momo lie ku sokoluila okuti eli epuluvi limue liwa lioku kala pamosi?”—Nina

•    Kala ukuesunguluko

   Onumbi Yembimbiliya: “Esunguluko liene li kũlĩhĩwe lomanu vosi.”—Va Filipoi 4:5.

   Ovina o sukila oku sokolola: O kũlĩhã ndati okuti ku kasi oku kisika ohueli yove oku linga ovina vialua?

   Onumbi: Sapeli oco vu kuati elomboloko lieci omunu lomunu pokati kene a sukila. Sokiyi ndomo vu pesila kumosi otembo yene okuti, kavali kene vu kuata esanju.

   “Ulume wange o kuete ongusu yalua. Pole, omo liekambo liange liuhayele si kuete ongusu yalua. Olonjanja vialua ndi pinga kokuaye oco a linge ovina a sole loku u sapuila okuti eci a tiuka tu sanda otembo yoku kala pamosi. Omo liaco, osimbu a pindisa etimba, ame ndi puyukapo. Kuenje kavali ketu tu sanjuka, momo tua linga ovina tua sukilile.”—Daniela.

 Tete omunu lomunu, o sukila oku tambulula eye muẽle apulilo. Noke sapeli eci catiamẽla katambululo wa eci.

•    Vu sima hẽ okuti wa siati oku kala pamosi otembo yalua ale vu sukila oku linga apongoloko?

•   Ovina vipi ulume ale ukãi wove a siata oku linga oco vu kali pamosi otembo yalua okuti o sukila oku vi pandiya?

•   Nye o yongola okuti oco ulume wove ale ukãi wove a ku lingila?

•   Anga hẽ wa siata lika oku tiamisila utima kotelefone okuti ku yevelela ovina ulume ale ukãi wove a kasi oku popia?

•   Vu pondola ndati oku lekisa esunguluko komunu lukuavo?

•   Apongoloko api omunu lomunu a sukila oku linga vosemana yilo oco vu tẽli oku pita otembo yalua kavali, okuti ka vu tiamisila utima kovina vikuavo?