Kũlĩhĩsa ulando u kuãimo ndoco: Olonjali via Júlia kumue lakamba vaye, va siata oku u sapuila vati: “Wa kopa calua.” Pole, eci Júlia a litala volumuĩlo, o sima okuti, wa lẽla. Kuenje, osima ndoco: “Ndi sukila oku kopa lonjanga!”

Júlia wa linga esokiyo lioku tepuluka lika “olokilu vivali.” Omo liaco, wa linga esokiyo lioku kala onjala vokuenda kuoloneke vimue . . .

Nda ove o kuete ovisimĩlo ndevi via Júlia nye o sukila oku linga?

Omanu vosi va siata oku sakalala leposo lietimba liavo, kuenda ca sunguluka oku ci linga. Embimbiliya li tukula afendeli vamue va Yehova va posokele calua ndeci: Sara, Rahele, Avigaile, Yosefe, kuenda Daviti. Embimbiliya li tukulavo ukãi umue o tukuiwa hati, Avisiage okuti, ‘wa posokele calua.’—1 Olosoma 1:3, 4.

Koloneke vilo, kuli amalẽhe valua va siata oku sakalala calua leposo lietimba liavo. Kuenje, esakalalo liaco lia siata oku va nenela ovitangi vialua. Konomuisa ulandu u kuãimo ndoco:

• Omo okuti amalẽhe vamue va siata oku sandiliya onjila yoku kopa, va kuatiwa luvei umue u tuala kolofa.

• Ekonomuiso likuavo lia lingiwa lia lekisa okuti, ndaño kuli afeko valua va kopa, pole, va popia vati va lẽla calua. Pole, pokati kavo ka va luile va lẽla.

• Kua lingiwavo ekonomuiso likuavo lia lekisa okuti, akãi vana va kopa,  va sima okuti, va lẽla calua!

 Nda o sima okuti, wa kuatiwa luvei omo lioku yuvula oku lia, sandiliya ondotolo oco yi ku kuatise! Helie ove o sukila oku sapela laye tete, oco a ku kuatise? Sapela lolonjali viove, ale lukulu umue wa kolela. Embimbiliya li popia hati: “Ekamba li sola olonjanja viosi, kuenje li linga manjove koloneke viohali.”—Olosapo 17:17.

Ekalo liutima womunu olio liecelela oku soliwa lomanu vakuavo okuti, eposo lio ketimba li sule. Kũlĩhĩsa ulandu wa pita la Avisalome omõla wa Soma Daviti. Embimbiliya li popia hati:

‘Vo Isareli yosi ka mua kaile omunu ukuavo wa pandiyiwa omo lieposo liaye. . . Tunde kolomãhi toke konumbutue letondelo ka kua kaile.’—2 Samuele 14:25.

Pole, catiamẽla kovituwa viaye, Embimbiliya ka li lekisa okuti, Avisalome wa kala omunu umue uwa. Eye, wa kala umalẽhe umue ukuacipululu, ka kalele ukuesunga, wa suvukile omanu vakuavo, kuenda wa kala omondi.

Embimbiliya li kuete esunga poku popia hati:

Ove o sukila oku ‘wala omunu wokaliye.’—Va Kolosai 3:10.

“Ko ka velisipo oku liposuisa luwalo wokilu, . . . puãi oku liposuisa kuomunu ku kale kuovutima.”—1 Petulu 3:3, 4.

Ndaño okuti ca sunguluka oku kuata eposo lio ketimba, pole, eposo lio vutima olio li kuete esilivilo lia velapo. Ovituwa viwa o lekisa, ovio vi vetiya omanu oku kala akamba vove vocili. Pole, ka va vetiyiwa omo lietimba linene o kuete, ale ocipala cimue ca fina. Ufeko umue o tukuiwa hati Phylicia, wa popia hati: “Ndaño okuti omanu va pondola oku komõha omo lieposo lietimba liove, pole, va ku ivaluka lika omo liekalo liwa o lekisa, kuenda ovituwa via sunguluka o kuete.”

Anga hẽ kua siatele oku sanjukila eposo lietimba liove?

Ove hẽ wa siata oku kuata ovisimĩlo vioku pelaliwa ale oku yuvula oku lia oco o pongolole eposo lietimba liove?

Tukula ovina o yongola oku pongolola vetimba liove.

• UTUNGA

• OLOKILU

• ESINGA

• ETIMBA

• OCIPALA

• EKOVA

Nda wa tambulula okuti “oco” kapulilo avali atete, kuenje kepulilo liatatu wa kapako ondimbukiso ale ovina vikuavo, citava okuti omanu va kuata ovisimĩlo via litepa levi viove, catiamẽla kekalo liove. Omo liaco, yuvula oku sakalala calua leposo lietimba liove.—1 Samuele 16:7.