Oku citiwa kuoñaña ku pondola oku nena esanju kuenda esakalalo kolohueli. Ene ulonjali viokaliye vu ka komoha poku limbuka okuti otembo yene yosi kuenda ongusu u ka yi pesila koku tata oñaña yene. Oku pumba otulo kuenda asakalalo akuavo ci pondola oku tepulula ukamba wene. Ove kumue lohueli yove vu ka sukila oku linga apongoloko amue oco utate oñaña yene kuenda oku teyuila olohuela viene. Alungulo Embimbiliya a pondola oku ku kuatisi ndati poku liyaka lovitangi viaco?

CECI EMBIMBILIYA LI POPIA: “Ocisola ci pandakaisa.” Ocisola “ka ci kuete onya, ocisola ka ci lipandiya.” (1 Va Korindo 13:4, 5) Omo okuti, unjali yokaliye yukãi, citava okuti o tiamisila lika ovisimĩlo viove koku tata oñaña yene. Omo liaco, ulume wove o fetika oku sima okuti, kuo kapeleko. Pole, epandi lumbombe, vi ku kuatisa oku lekisa kulume wove okuti, wa kapiwako, kuenda oku u kongela vupange woku tata oñaña yene.

“Ene alume, kali lakãi vene lolondunge.” (1 Petulu 3:7) Kuata elomboloko liokuti, ukãi wove o ka pesila calua ongusu yaye koku tata oñaña yene. Omo okuti o kuete ovikele viokaliye, o pondola oku tema lonjanga, oku sakalala, kuenda oku sumua. Vokuenda kuotembo yaco eye o pondola oku tema love, pole lekisa umbombe momo, “u o livala konyeño wa velapo.” (Olosapo 16:32) Lekisa olondunge kuenda u kuatisa kovina viosi a sukila.—Olosapo 14:29.

CECI O SUKILA OKU LINGA:

• Olonjali vialume: Kuatisa ukãi wove oku tata oñaña, ndaño kuteke. Tepulula otembo wa enda oku pesila koku linga ovopange akuavo oco o kale otembo yalua lukãi wove kuenda oñaña yene

• Olonjali viakãi: Nda ulume wove o lekisa onjongole yoku ku kuatisa oku tata oñaña, tava kekuatiso liaye. Nda ka ci lingile ndomo ci sukiliwa, ku ko vetele evelo, pole, lekisa kokuaye ndomo a pondola oku ci linga

CECI EMBIMBILIYA LI POPIA: “Va linga etimba limuamue.” (Efetikilo 2:24) Ndaño vepata liove mu citiwa oñaña, ivaluka okuti, ove lohueli yove ‘wetimba limuamue.’ Likolisiliko oku pamisa ukamba wene.

Akãi, sanjukila ekuatiso lieciwa lulume wove. Olondaka viove vioku eca olopandu vi “sakula.” (Olosapo 12:18) Alume, sapuila ukãi wove okuti u kuetele ocisola, kuenda wo kapako. Eca olopandu kokuaye omo a siata oku likolisilako oku tata epata.—Olosapo 31:10, 28.

“Lomue ka ka sande eci caye, te eci cukuavo.” (1 Va Korindo 10:24) Olonjanja viosi li kolisilako oku lingila eci ciwa ohueli yove. Sandi otembo yoku sapela, loku eca olopandu, kuenda oku liyevelela pokati. Ku ka li sokolole lika ove muẽle catiamẽla koku tẽlisa onjongole yoku lipekela. Kapako ovina ohueli yove yi sukila. Embimbiliya li popia ndoco: “Ulume a lingainge lukãi eci co sesamela, lukãi haico la veyaye.” (1 Va Korindo 7:3-5) Sapeli eci catiamẽla kondaka yaco kavali kene. Epandi liene kuenda oku kuata elomboloko liovina li pamisa ukamba wene.

CECI O SUKILA OKU LINGA:

• Ko ka ivaliko oku sokiya otembo yoku kala pamosi

• Linga ovina vitito vi vetiya ohueli yove oku limbuka okuti, yi soliwe ndeci oku u sonehela okokanda, ale oku u nenela ombanjaile yimue

CECI EMBIMBILIYA LI POPIA: “Tunde kuñaña, wa kũlĩha ovisonehua vi kola, haivio vi tẽla oku ku longisa ndomo o tẽla oku popeliwa.” (2 Timoteo 3:15) Sokiyi eci u ka linga oco vu pindisi oñaña yene. Oyo yi kuete epondolo likomõhisa lioku lilongisa osimbu handi ka ya citiwile. Osimbu oñaña yi kasi vimo, yi pondola oku limbuka ondaka yove, kuenda esanju liove.Yi tangela ovolandu osimbu ka ya kulile. Ndaño okuti ka yi kuata elomboloko liovina viosi o yi tangela, pole ci pondola oku yi kuatisa oku sola oku tanga eci yi linga ukulu.

Ku ka sime okuti, oñaña yene yitito calua okuti ka yi pondola oku yevelela ovina viatiamẽla ku Suku. Ecelela okuti yi ku yevelela poku likutilila ku Yehova. (Esinumuĩlo 11:19) Eci u papalela kumosi, vangula eci catiamẽla kovina Suku a panga. (Osamo 78:3, 4) Osimbu omõlove a kula, o limbuka ocisola o kuetele Yehova, kuenda o ka lilongisavo oku u sola.

CECI O SUKILA OKU LINGA:

• Likutilila loku pinga olondunge vioku pindisa oñaña yene

• Pitulula olondaka kuenda ovisimĩlo koñaña yene, oco yi lilongise lonjanga