OCIPAMA 44
Anga hẽ Ovipito Viosi vi Sanjuisa Suku?
Yehova o yongola okuti, tu sanjukila omuenyo loku linga ovipito olonjanja vimue. Anga hẽ ovipito viosi kuenda ateke owusa viu sanjuisa? Tu lekisa ndati ocisola cetu ku Yehova catiamẽla kondaka eyi?
1. Momo lie ovipito vimue ka vi sanjuisila Yehova?
Citava okuti o komõha poku lilongisa okuti, vialua pokati kovipito, ka via kunamẽlele kalongiso Embimbiliya, pole, kalongiso esanda. Ovipito viaco vi kuete elitokeko letavo liesanda. Pamue vi kuete elitokeko lumbanda ale locisimĩlo cokuti, vetimba liomunu muli cimue ka ci fi. Ovipito vimue via kunamẽla koku tãha ale kelongiso liosande. (Isaya 65:11) Yehova o lungula afendeli vaye hati: “Litepi lavo, . . . kuenda liwekipo oku lamba kocina ca vĩha.”—2 Va Korindo 6:17. a
2. Yehova o liyeva ndati catiamẽla kovipito vi eca esivayo komanu?
Yehova o tu lungula oku yuvula oku kupukila veyonjo lioku “kolela komanu vaño.” (Tanga Yeremiya 17:5.) Ateke amue owusa a eca esivayo kolombiali kuenda kasualali. Ateke akuavo a sambiliya olondimbukiso ale oku yovuiwa kuofeka. (1 Yoano 5:21) Handi vali, ateke akuavo, a vetiya oku kuatisa kopulitika ale kovitundo. Yehova o liyeva ndati nda tu eca esivayo komunu umue, ale kocisoko cimue ca piãla enene nda omunu waco o vetiya oku linga ovina ka vi litava locipango Caye?
3. Nye ci lingisa okuti ovipito vimue ka vi taviwa?
Embimbiliya li pisa ‘uholua, ayele [kuenda oku] nyua calua.’ (1 Petulu 4:3) Kovipito vimue omanu ka va tẽla oku likandangiya kuenda va linga ovina via vĩha. Oco tuamameko oku kala akamba va Yehova, tu sukila oku yuvula ovituwa viaco via vĩha.
LILONGISA ONDONGOSI
Kũlĩha ndomo o sanjuisa Yehova poku nõla lolondunge onjila yimue yatiamẽla kateke owusa kuenda kovipito.
4. Yuvula ovipito ka vi eci esivayo ku Yehova
Tanga Va Efeso 5:10, noke konomuisa apulilo a kuãimo:
-
Nye tu sukila oku kũlĩhĩsa poku nõla nda tu linga ale sio ocipito ceteke liowusa?
-
Posongo o kasi, ateke api owusa a kũlĩhĩwa calua?
-
O sima okuti, ateke aco owusa a sanjuisa Yehova?
Ndeci, o kuete hẽ atatahãi kueci Suku a sima catiamẽla kovipito vieteke lioku citiwa? Embimbiliya lalimue eteke lia tukuile catiamẽla kufendeli umue wa Yehova wa linga ocipito ceteke lioku citiwa, pole, olio li tukula ovipito vivali vieteke lioku citiwa viomanu ka va fendela Yehova. Tanga Efetikilo 40:20-22 kuenda Mateo 14:6-10. Noke konomuisa apulilo a kuãimo:
-
Ovipito evi vivali vieteke lioku citiwa vi kuete elitokeko lipi?
-
Catiamẽla kovolandu a tukuiwa ndeti Vembimbiliya, o sima okuti Yehova o tenda ndati ovipito vieteke lioku citiwa?
Handi vali, pamue o lipula: ‘Nda nda panga onepa kocipito ceteke lioku citiwa, ale kocipito cikuavo ka ca kunamẽlele Vembimbiliya, Yehova o ci kapako?’ Tanga Etundilo 32:1-8. Kuenje tala OVIDEO noke konomuisa apulilo a kuãimo.
-
Momo lie tu sukilila oku kũlĩhĩsa ovina vi taviwa la Yehova?
-
Tu ci linga ndati?
Ndomo tu kũlĩha nda ocipito cimue ka ci sanjuisa Suku
-
Ca kunamẽla hẽ kalongiso esanda? Oco o ci kũlĩhe, konomuisa ono yaco.
-
Anga hẽ ovio vi vetiya oku sivaya omanu, ovisoko, ale olondimbukiso viofeka? Etu tu sivaya lika Yehova kuenda tua kolela okuti, eye o ka malako ovitangi violuali.
-
Ovihilahila kuenda ovilinga viaco vi likuata hẽ lolonumbi Viembimbiliya? Tu sukila oku amamako oku liyelisa kovituwa.
5. Kuatisa vakuene oku sumbila ovina o lilongisa
Ka ci leluka oku tamalãla eci vakuene va ku kisika oku panga onepa kocipito cimue ka ci sanjuisa Yehova. Lombolola lepandi kuenda lutate onjila wa nõlapo. Oco o kũlĩhe ulandu umue u ku kuatisa kuenda ndomo o ci linga, tala OVIDEO.
Tanga Mateo 7:12, noke konomuisa apulilo a kuãimo:
-
Ndomo ca lekisiwa vocinimbu eci, citava hẽ okuti o sapuila epata liove oco ka va ka linge ocipito cimue ceteke liowusa?
-
Nye o linga oco o kavuluise epata liove oku kuata ovisimĩlo viokuti ndaño ku pangi lavo onepa kocipito cimue, handi o va sole kuenda wa va kapako?
6. Yehova o yongola okuti tu sanjuka
Yehova o yongola okuti otembo yosi tu sanjukila kumue lepata lietu kuenda akamba. Tanga Ukundi 8:15, noke konomuisa epulilo li kuãimo:
-
Ocinimbu eci ci lekisa ndati okuti, Yehova o yongola okuti tu sanjuka?
Yehova o yongola okuti, afendeli vaye va linga olomapalo kuenda oku sanjukila kumosi vapuluvi awa. Tala OVIDEO oco o limbuke ndomo eci ca siata oku muiwa calua kolohongele vietu violofeka.
Tanga Va Galatia 6:10, noke konomuisa apulilo a kuãimo:
-
Anga hẽ tu sukila oku linga ovipito viateke owusa oco tu linge “eci ciwa” ku vakuetu?
-
Nye nda ca ku sanjuisa vali: Ceci o kisikiwa oku eca cimue keteke liowusa, ale ceci weca lutima wosi?
-
Olombangi vialua Via Yehova olonjanja vimue, vi sokiyila omãla vavo oku linga ocina cimue cilikasi kuenda oku va ĩha olombanjaile. Ove nda o kuete omãla, ovina vipi vilikasi o pondola oku va lingila?
OMANU VAMUE VA POPIA VATI: “Efetikilo lieteke liowusa, ka li kuete esilivilo. Ocina ci kuete esilivilo oku kala kumosi lepata kuenda lakamba.”
-
Nda wa popia nye??
NYE WA LILONGISA?
Yehova o yongola okuti otembo yosi tu sanjukila kumue lepata lietu kuenda akamba. Pole, eye o yongola okuti tu yuvula ovipito ka viu sanjuisa.
Oku Pitulula
-
Nye tu sukila oku lipula oco tu kũlĩhĩse nda ocipito cimue ka ci sanjuisa Yehova?
-
Tu kuatisa ndati epata lietu kuenda akamba oku kuata elomboloko lionjila tua nõlapo yatiamẽla kateke owusa?
-
Wa kũlĩha ndati okuti Yehova o yongola okuti tu kuata esanju kuenda tu linga olomapalo?
OCO O KŨLĨHE OVINA VIKUAVO
Kũlĩha ateke amue owusa okuti, ka a sambiliyiwa Lakristão.
Tala asunga akuãla lieci tu tavela okuti, ovipito vieteke lioku citiwa ka vi sanjuisa Suku.
Tala ndomo kafeko umue o sole Yehova a pondola oku u sanjuisa vokuenda kuoloneke viowusa.
Akristão valua vocili, va siata oku nõlapo oku yuvula oku linga ocipito Conatale. Ovo va liyeva ndati omo lionjila va nõlapo?
“Ovo va Sanga Cimue ca Velapo” (Utala Wondavululi 1 wa Cembanima 2012)
a Tala Etosi 5 kesulilo oco o kũlĩhe eci o linga poku liyaka lovitangi vimue eci omanu vakuavo va linga ocipito ceteke liowusa.
Ove o ka ci Sola
APULILO A SIATA
Elilongiso Liembimbiliya li Lingiwa Lolombangi Via Yehova li Lomboloka Nye?
Lekuatiso lielilongiso li lingiwa ocali Lolombangi Via Yehova, o pondola oku kuama Lembimbiliya liosi o yongola. Lianja poku laleka epata liove liosi ale akamba vove, oco vu lilongisili kumosi.
