Yesu noke yoku sakula ulume wa kala luvei wongunge, eye o kasi handi konjo yu Fariseo. Yesu o limbuka okuti omanu vakuavo va lalekiwa va nõla ovitumãlo via velapo kuenje o longisa esilivilo lioku lekisa umbombe.

Yesu o popia hati: “Eci o lalekiwa lomunu umue oku enda kocipito cuvala, ku ka tumãle kolomangu via velapo. Pamue kua lalekiwavo omunu umue wa kemãlapo vali okuti ove o sule. Noke omunu wa ku laleka iya, o ku sapuila hati, ‘Eca omangu komunu u.’ Kuenje ove enda losõi komangu yimue yi sule.”—Luka 14:8, 9.

Noke Yesu o popia hati: “Eci o lalekiwa, kuende ka tumãle komangu yi sule, okuti eci ulume wa ku laleka eya, o ku sapuila hati, ‘Akamba, kuende komangu ya velapo.’ Kuenje o sumbiwa kovaso yakombe vosi.” Voku lekisa ocituwa caco mua kongela ovina vialua okuti oku lekisa lika ovituwa viwa ci sule. Yesu o popia hati: “Momo wosi o likapa kunene, amisua kutito kuenda wosi o likapa kutito, amisua kunene.” (Luka 14:10, 11) Kuenje Yesu o vetiya olonjeveleli viaye oku lekisa ocituwa cumbombe.

Kuenje Yesu o longisa ulandu ukuavo ku va Fariseo vana vo laleka. Eye o lombolola ndomo ku eciwa okulia ku kuete esilivilo lia velapo kovaso a Suku, poku popia hati: “Eci o pongiya onanya yimue ale ondalelo, ku ka laleke akamba vove, vamanjove, vangandiove, ale vana o lisungue lavo okuti olohuasi. Momo pamue eteke limue va ku lalekavo oco va ku tiuwile kuenda ci kala ndofeto. Pole, eci o pongiya ocipito cimue laleka olohukũi, ovihata, ovilema kuenda olomeke; kuenje o sanjuka, omo ovo ka va kuete lacimue oco va ku tiuwile.”—Luka 14:12-14.

Yesu ka popele okuti ka ca sungulukile oku laleka akamba vetu, vangandietu, vana tu lisungue lavo oco va lie kumue letu. Pole, eye o lombolola okuti, vana va eca okulia komanu ndeci, olosuke, ovilema ale olomeke, va pondola oku sumũlũisiwa calua. Yesu o sapuila omunu wo laleka hati: “Va ka ku tiuwila kepinduko lia vakuesunga.” Umue wa lalekiwavo poku yeva olondaka viaco, o popia hati: ‘Una o lia Vusoma wa Suku, wa sumũlũha.’ (Luka 14:15) Eye o limbuka okuti, oku ci linga esumũlũho linene. Pole, ndeci Yesu a lombolola volusapo lu kuãimo, havosiko va ci sanjukila.

Eye o popia hati: “Ulume umue, wa pongiya ocipito cinene kuenda wa laleka valua. Eye wa tuma ukuenje waye . . . oku sapuila kuava va lalekiwa hati, ‘Enjui, momo ovina viosi via pongiyiwa ale.’ Pole vosi yavo va fetika oku li sandela esunga. Watete wo sapuila hati, ‘Nda landa usenge kuenje ndi sukila oku endako oku ka u tala; hu pinga okuti o ngecelela.’ Ukuavo hati, ‘Nda landa olongombe ekũi kuenda ngendako ha vi kũlĩhĩsa; hu pinga okuti o ngecelela.’ Handi ukuavo wa popia hati, ‘[Ndopo] nda kuela, omo liaco si pondola oku iya.’”—Luka 14:16-20.

Oku lisandela kuaco esunga, ka kua sungulukile! Ocili okuti omunu o landa epia ale olongombe, o sukila oku vi kũlĩhĩsa osimbu ka vi landele. Omo liaco, ka ci kuete onjanga oku ka vi tala noke yoku vi landa. Ulume watatu, ka kasi oku lipongiyila oku kuela. Eye wa kuela ale, omo liaco eci nda ka co tatekele oku tava kelaleko li kuete esilivilo lia velapo. Poku yeva asunga aco, cime o temela upika waye.

Eye o popia hati: “Kuende lonjanga volokololo [via velapo] lo pavindi olupale kuenje nena kulo olohukũi, ovihata, olomeke kuenda ovilema.” Eci upika a tiuka, vonjo handi muli evelo. Kuenje cime o sapuila upika hati: “Kuende vatapalo lo volokololo kuenda va [kisika] oku iya oco onjo yange yi yuke. Ndu sapuili siti, pokati komanu  [vana] va lalekiwa, lomue o [ka] maha kokulia kuange.”—Luka 14:21-24.

Ovina Yesu a popia vi lekisa ciwa ndomo Yehova Suku a tuma Kristu oco a laleke vana va ka panga onepa Kusoma wo kilu. Va Yudea, ca piãla enene asongui vetavo, ovo va lalekiwa tete. Valua pokati kavo, ka va tavele kelaleko lia Yesu vokuenda kupange waye woku kunda. Pole, vakuavo va laikelevo oku lalekiwa. Yesu o lombolola okuti kovaso yoloneke ku ka lingiwa elaleko lia vali ku va Yudea olosuke kuenda olomongoloke. Noke ku ka lingiwa elaleko liatatu hailio lia sulako komanu vana va tendiwa la va Yudea okuti, ka va sesamẽla oku taviwa la Suku.—Ovilinga 10:28-48.

Ocili okuti ovina Yesu a popia vi likuata lolondaka via umue wa lalekiwa wa popia hati: “Una o ka lia Vusoma wa Suku, wa sumũlũha..”