Yesu wa laleka olondonge vikuãla okuti, Petulu, Andereu, Tiago, kuenda Yoano oco va linge anyanga vomanu. Cilo, eteke Liesambata kuenje vosi yavo va enda vosunangonga ko Kafarinau. Yesu o longisa vosunangonga kuenje omanu va komõha vali omo lioku longisa kuaye. Eye o va longisa ndomunu o vangula lunene wa tunda ku Suku, ka ci lingi nda vakuavisonehua.

Keteke liaco, Kesambata vosunangonga mua kala ulume umue wa kuatiwile londele. Vepuluvi liaco, ulume o kaluka hati: “A Yesu u Nasara, o tu sakalasaila nye? Anga weya oku tu nyõla? Ame nda ku kũlĩha ciwa, ove o Kola ku Suku!” Pole, Yesu o pisa ondele yi kasi vetimba liulume hati: “Ũhako, tunda vokuaye!”—Marko 1:24, 25.

Noke ondele yaco, ya kupuila ulume posi loku u tanyisa kuenje ya kaluka lolukandi. Ondele yo tunda, pole, “ka yo lemehele.” (Luka 4:35) Omanu va kala vo sunagonga va komõha! Kuenje va pula vati: “Eci nye? . . . Eye o kuete unene woku handeleka olondele kuenje vi pokola kokuaye.” (Marko 1:27) Ka ci tu komõhisa okuti, esapulo liaco li yevala ko Galilea yosi.

Yesu kumue lolondonge viaye, va tunda vosunangonga kuenje va enda konjo ya Simono haeye Petulu. Eci va pitĩlako, va sanga okuti ndatembo ya Petulu o vela calua kuenda o kuetiwe lombambi. Kuenje va pinga ku Yesu oco o kuatise. Yesu wa enda kokuaye, wo kuata peka kuenje wo votola. Vowola yaco wa sakuiwa kuenje wa fetika oku pongiya oku lia kua Yesu kumue lolondonge viaye.

Eci ekumbi lia iñila, omanu vo kolonepa viosi veya konjo ya Petulu, va nena omanu va vela. Ka pa pitile otembo yalua ca kala ndu okuti omanu vosi vo volupale veya pepito lionjo ya Petulu. Momo lie? Ovo va yongola oku sakuiwa. Omo liaco, ‘vana va kasi lava va vela ovovei aiñi aiñi va va nena kokuaye. Wa kapa ovaka komunu lomunu kuenje wa va sakula.’ (Luka 4:40) Ndomo ca popiwile vocitumasuku, Yesu o kuatisa omanu poku sakula ovovei avo osi. (Isaya 53:4) Eye o sakulavo omanu va kuetiwe lolondele. Eci olondele viaco vĩvi vi tunda vi kaluka viti: “Ove Vumõla a Suku.” (Luka 4:41) Yesu o vi pisa kuenda ka ecelela okuti ovio vi vangula. Ovio via kũlĩha okuti Yesu eye Kristu kuenda eye ka yongola okuti olondele vi li lekisa komanu ndafendeli va Suku yocili.