Yesu noke yoku pongoluiwa kuenda oku tundisa ondele ya kala vetimba liukuenje umue, volupale luo Kaisarea ka Filipu, eye enda kolupale luo Kafarinau. Eye o linga lika ungende lolondonge viaye oco omanu ka va ka ‘kũlĩhe eci a linga.’ (Marko 9:30) Omo liaco, Yesu o kuete epuluvi lioku sapuila olondonge catiamẽla kolofa viaye kuenda oku va pongiyila upange va laikele oku linga kovaso yoloneke. Eye o va sapuila hati: “Mõlomunu o laika oku [eciwa] peka liomanu, kuenda va ko ponda kuenje keteke liatatu o pinduiwa.”—Mateo 17:22, 23.

Olondaka viaco, ka via sukilile oku kala viokaliye kolondonge viaye. Momo vepuluvi limue Yesu wa popele ale catiamẽla kolofa viaye, pole, Petulu ka tavele okuti ovina viaco vi pita laye. (Mateo 16:21, 22) Ovapostolo vatatu va mola oku pongoluiwa kua Yesu kuenda va yeva ombangulo yatiamẽla “kungende” waye. (Luka 9:31) Cilo olondonge via Yesu vi ‘sumua calua’ ndaño ka vi kuete elomboloko liwa liolondaka viaye. (Mateo 17:23) Pole, ovio vi kuete usumba woku pula Yesu ovina viatiamẽla kondaka yaco.

Noke va pitĩla vo Kafarinau volupale luna Yesu a lingila upange walua, haluo olupale mua kala ovapostolo vaye valua. Alume vamue vakuakutambula elisimu vonembele vamela ku Petulu. Citava okuti va seteka oku lundila Yesu okuti ka fetele elisimu kuenje va pula vati: “Ulongisi wene hẽ ka feti elisimu [liolodracma vivali vonembele]?”—Mateo 17:24.

Petulu o tambulula hati: “O feta.” Eci Petulu a tiukila konjo, Yesu wa kũlĩhĩle ale ovina via pita. Omo liaco, osimbu handi Petulu ka popele ondaka yimue, Yesu u pula hati: “Nye o sima a Simono? Kulie olosoma violuali vi tambula ulambu ale elisimu? Komãla vavo, ale komanu vaiñi?” Petulu o tambulula hati: “Komanu vaiñi.” Omo liaco, Yesu o sapuila Petulu hati: “Ocili, puãi omãla ka va sukila oku feta elisimu.”—Mateo 17:25, 26.

Isia ya Yesu eye Soma yoluali luosi kuenda eye lika o fendeliwa vonembele. Omo liaco, Omõla a Suku ka kisikiwa oku feta elisimu lionembele. Yesu o popia hati: “Pole, oco ka tu ka va kokele ocilondokua, kuende kokalunga, imba onjolo, kuata ombisi yatete, asamisa omela yayo kuenje o sangamo ocingangu cimosi copalata [okuti olotetradracma vikuãla]. Noke ceca kokuavo oco o fete elisimu liange leli liove.”—Mateo 17:27.

Noke yotembo yimue, olondonge vi liongolola kuenje vi yongola oku pula ku Yesu nda pokati kavo helie wa velapo Vusoma. Ka pa pitile otembo yalua tunde eci olondonge via kuata usumba woku pula catimẽla kolofa via Yesu vi kasi ocipepi. Pole, cilo ka vi kuete usumba woku pula catiamẽla kovina vi ka pita lavo kovaso yoloneke. Yesu wa kũlĩha eci ovo va kasi oku sima. Ovo va lihoyisa ale catiamẽla kondaka eyi, eci va kala oku linga ungende woku tiukila ko Kafarinau kuenje Yesu wa kala naito kovaso yavo. Eye o pula hati: “Nye wa kali oku lihoyisa vonjila?” (Marko 9:33) Omo liosõi olondonge ka vi tambulula cimue, momo via kala oku lihoyisa nda pokati kavo helie wa velapo. Omo liaco, olondonge vi pula Yesu eci catiamẽla kondaka va kala oku lihoyisa viti: “Helie wa velapo Vusoma wo kilu?”—Mateo 18:1.

Ci komõhisa oku mola okuti, ndaño olondonge via Yesu via pita anyamo atatu oku mola loku yeva ovina Yesu a linga, pole, handi vi kasi  oku lihoya catiamẽla kondaka yoku kala omunu wa velapo. Pole, ovio ka via lipuile kuenda via kulila pokati komanu va vetiya calua oku livelisapo kuenda oku kuata ovikele via velapo. Handi vali, Petulu ndopo a yeva eci Yesu o likuminya “olosapi” Viusoma. Hanga hẽ eye o kasi oku litenda okuti wa velapo omo liocikele caco? Citava okuti Tiago kuenda Yoano va kuetevo ovisimĩlo viaco, omo lioku mola oku pongoluiwa kua Yesu.

Ndaño va kuata esunga ale sio, Yesu o pisa ovisimĩlo viavo ka via sungulukile. Eye o vilikiya okamõla kamue, o ka talamisa pokati kavo kuenje o sapuila olondonge viaye hati: “Nda ka wa pongoluili ovisimĩlo viene loku kala ndomãla, ka vu iñila Vusoma wo kilu. Omo liaco, wosi o liketisa ndokamõla aka, eye wa velapo Vusoma wo kilu; kuenda wosi o yekisa umue pokati komãla ava vonduko yange, o njekisavo ame.”—Mateo 18:3-5.

Onjila Yesu a kuama yoku longisa yi komõhisa! Yesu ka temela olondonge viaye kuenda ka va tukula okuti vakuacipululu ale va kasi oku sanda ekemãlo. Pole, eye o va longisa ongangu yimue yiwa, momo omãla ka va sandi ekemãlo ale oku livelisapo. Yesu o sapuila olondonge viaye esilivilo lioku liketisa. Omo liaco, o malusula loku sapuila olondonge viaye hati: “Momo wosi o likapa kutito pokati kene, eye wa velapo.”—Luka 9:48.