Yesu wa vetiya omanu volonepa viñi viñi, oco va sokolole kukamba wavo la Suku. Noke yombangulo a kuata lomanu kosamua yonjo yu Fariseo, ku molẽha epuluvi likuavo.

Vamue va lombolola ocilunga cimue ci sumuisa. Ovo va lombolola eci catiamẽla “ku va Galilea vana okuti osonde yavo [Nguluvulu yo ko Roma Pondiu] Pilato wa yi tenga lovilumba viavo.” (Luka 13:1) Nye va yongola oku popia?

Citava okuti va Galilea yaco vana va pondiwa eci omanu valua va Yudea va lingila Pilato usuanji omo opa olombongo vionembele oco a tunge olekua yi nena ovava vo Yerusalãi. Pamue Pilato wopa olombongo viaco lekuatiso liasongui vonembele. Omanu vana va sapuila Yesu ulandu waco, pamue va sima okuti va Galilea va pita locilunga caco omo liovilinga viavo vĩvi. Pole, Yesu ka tava kocisimĩlo caco.

Eye o pula hati: “Vu sima hẽ okuti va Galilea vaco akandu avo a piãlele okuti va Galilea vakuavo va sule, omo va tala ohali yaco?” Yesu o popia hati sio kuenje o tukula ocilunga eci oco a lungule va Yudea poku va sapuila hati: “Nda ka vu likekembela, vu nyõliwavo.” (Luka 13:2, 3) Noke Yesu o tukula ocilunga cikuavo ca pita ndopo okuti, ci kuete elitokeko loku tungiwa kuolekua yaco.

Eye o pula hati: “Ale vu sima okuti omanu vana 18 okuti osapalalo yo ko Siloama ya va kupukila kuenje va fa, va kuata eko lia piãla okuti olonungi vikuavo vio vo Yerusalãi vi sule?” (Luka 13:4) Pamue owiñi wa sima okuti omanu vaco va fa omo liocina cimue cĩvi va linga. Lopo Yesu ka tava kondaka yaco, momo wa kũlĩha okuti ovina evi via pita omo “cosi ciya ño ci veta ño.” (Ukundi 9:11) Pole, omanu va ci yevelela va pondola oku lilongisila kulandu waco. Yesu o popia hati: “Nda ka vu likekembela, vu nyõliwavo ndomanu vaco.” (Luka 13:5) Momo lie cilo a tukuila vali olondaka evi?

Yesu wa ci lingila omo liekalo liotembo a sangiwile kupange woku kunda. Kuenje eye o ta olusapo lumue hati: “Ulume umue wa kuatele uti ukuyu vocumbo caye cayuva kuenje weya oku kũlĩhĩsa nda kuli epako, pole, ka sangeleko lalimue. Kuenje wa sapuila olonalavayi viocumbo cayuva hati, ‘Ndeyaeya oku sandiliya epako vuti owu ukuyu anyamo atatu, pole, sia la sangako limue. U timbula! Momo lie uti waco u kavisila vali osi?’ Eye wo tambulula hati, ‘A Cime, u kale vali unyamo ulo, toke eci ndi fẽla kolonele loku u kapa otulumu. Nda wa ima epako kovaso yoloneke, ciwa; nda ka wa imile, o u timbulapo.’”—Luka 13:6-9.

Vokuenda kueci ci pitahãla anyamo atatu, Yesu wa seteka oku kuatisa va Yudea oku kuata ekolelo. Pole, vatito va linga olondonge okuti va tendiwa ndepako liupange waye. Cilo vunyamo wakuãla wupange waye woku kunda, o talavaya vali calua. Poku kunda loku longisa vo Yudea lo vo Perea, ci sokisiwa loku fẽla kuenda oku kapa otulumu kukuyu wa va Yudea. Lonima yipi? Etendelo litito lia va Yudea va tava. Omanu valua ka va tavele oku likekembela kuenje va laikele oku nyõliwa.

Noke yoloneke vimue Kesambata, omanu lopo ka va pongolola ekalo liavo. Yesu o kasi oku  longisa vosunangonga. Kuenje ku molẽha ukãi umue o kuatiwe londele yo kokisa oku vela ci soka 18 kanyamo. Yesu u kuatela ohenda poku u sapuila hati: “Okãi, wa yovuiwa kuvei wove.” (Luka 13:12) Yesu o lamba ukãi leka liaye kuenje vonjanja yaco haico a miuha kuenda o sivaya Suku.

Kuenje usongui wosunangonga o fungula kuenda o popia hati: “Kuli oloneke epandu ku lingiwa upange; enjui voloneke viaco oku sakuiwa, pole, ka ci ka lingiwe keteke Liesambata.” (Luka 13:14) Usongui ka kasi oku patãla okuti Yesu ka kuete unene woku sakula, pole, eye o pisa omanu omo lioku iya keteke Liesambata oco va sakuiwe! Yesu u tambulula lonjila yimue yi vetiya oku sokolola hati: “Vukuambambe, siti omunu lomunu pokati kene Kesambata o kutulula ongombe yaye ale ocimbulu vocimanga kuenda o cĩha cimue coku nyua? Ka ca sungulukile hẽ okuti ukãi u, omõla a Avirahama wa kutiwa la Satana ci soka 18 kanyamo o kutuluiwa kupika waco keteke Liesambata?”—Luka 13:15, 16.

Ovanyãli va kutisiwa osõi, pole, owiñi u sanjuka poku mola ovina vi komõhisa Yesu a kasi oku linga. Cilo, Yesu o kasi vo Yudea kuenje o va ivaluisa alusapo avali ocitumasuku atiamẽla Kusoma, ana eye a tukula osimbu a kala vowato Vokalunga ko Galilea.—Mateo 13:31-33; Luka 13:18-21.