Yesu handi o kasi ocipepi lo Yerusalãi, eci va Yudea vamue va enda kokuaye. Vamue va yongola oku lilongisa eci catiamẽla kokuaye, vakuavo va yongola oku u nyika. Ulume umue Ukuavihandeleko u pula hati: “Olongisi, ocina cipi ndi sukila oku linga oco ñuate omuenyo ko pui?”—Luka 10:25.

Yesu o limbuka okuti ulume ka kasi oku pula oco a kũlĩhe onumbi yimue. Eye pamue o yongola okuti Yesu o tambulula lonjila yimue yi sumuisa va Yudea. Yesu o limbuka okuti ulume o kuete ocisimĩlo cimue cĩvi. Kuenje Yesu lutate o tambulula lonjila yimue yi kokisa ulume oku situlula eci eye a kasi oku sima.

Yesu u pula hati: “Nye ca sonehiwa Vocihandeleko? O tanga ndati?” Omo okuti ulume wa lilongisa Ocihandeleko ca Suku, eye o tambulula ndomo ca sonehiwa. Eye o tukula olondaka vi sangiwa kelivulu Liesinumuĩlo 6:5 kuenda Ovisila 19:18, ku popia hati: “‘Sola Yehova Suku yove lutima wove wosi, lomuenyo wove wosi, longusu yove yosi, lolondunge viove viosi’ kuenda ‘sola ukuẽle ndeci o lisole ove muẽle.’” (Luka 10:26, 27) Anga hẽ eli olio etambululo liaco?

Yesu o sapuila ulume hati: “Wa tambulula ciwa; amamako oku ci linga kuenje o kuata omuenyo ko pui.” Anga hẽ ombangulo opo ya sulila? Ulume ka yongola lika etambululo li teta onimbu. Eye o yongola “oku litenda okuti ukuesunga,” loku lekisa okuti ocisimĩlo caye ca sunguluka kuenda o kasi oku tata vakuavo ndomo va sesamẽla oku tatiwa. Kuenje o pula hati: “Ukuetu waco helie?” (Luka 10:28, 29) Epulilo eli li molẽha ndu okuti lia leluka, pole, li kuete elomboloko limue linene. Ndamupi?

Va Yudea va tava okuti ondaka “ukuetu” yi tiamisiwila lika komanu vana va kuãi oviholo via va Yudea kuenda ci kasi ndu okuti ci likuata leci ci sangiwa kelivulu Liovisila 19:18. Omunu umue u Yudea citava okuti o popia hati “ka citava” umue oku kuata ukamba lomunu una okuti Huyudeako. (Ovilinga 10:28) Kuenje ulume waco kuenda olondonge vimue via Yesu, citava okuti va litenda ndu okuti vakuesunga poku tata locisola vamanjavo va Yudea. Pole, citava okuti ovo va sepula una okuti Huyudeako, momo hayeko o ‘lisungue lavo.’

Yesu o pisa ndati ocisimĩlo caco okuti, ka sumuisa ulume waco kuenda va Yudea vakuavo? Eye o ci linga poku ta olusapo lumue ndoco: “Ulume umue wa tunda ko Yerusalãi oku enda ko Yeriko kuenda wa lisanga lovingumba okuti vio punda, vio tipula, noke va enda kuenje vo sia okuti wa ambuka.” Yesu amisako ndoco: “Vepuluvi liaco ocitunda cimue ca kala oku lokila ketapalo liaco, pole, eci a mola ulume waco, wa ñualela konele yikuavo. Cimuamue haico u Lewi, okuti eci a pita vonjila yaco, wo mola kuenje wa ñualela konele yikuavo. Pole, ulume umue u Samaria poku pita ketapalo liaco eci o mola, wo kuatela ohenda.”—Luka 10:30-33.

Ulume o kasi oku yevelela olusapo lua Yesu wa kũlĩha okuti, ovitunda vialua kuenda va Lewi va siata oku kuatisa vonembele, va tunga vo Yeriko.Poku tunda konembele va sukila oku linga ungende u soka 23 kolokilometulu. Citava okuti onjila yaco yi koka ohele, momo ovingumba via siata oku salama konele yetapalo. Nda ocitunda cimue kuenda u Lewi va sanga manji umue u Yudea locitangi cimue, va sukila oku u kuatisa. Pole, volusapo olu Yesu o lombolola okuti ovo ka va ci lingi. Omunu wo kuatisa u Samaria, okuti ulumue umue wa tiamẽla kepata limue li sepuiwa la va Yudea.—Yoano 8:48.

U Samaria o kuatisa ndati u Yudea wa lemehiwa? Yesu amisako hati: “[Eye] wa amela kokuaye wa kuta apute aye, wo sieketa ulela lovinyu. Noke wo londisa kocinyama caye, yu wo wambata konjo yolongende kuenje wo tata. Keteke lia kuamamo, wopa olodenariu vivali yu wa vieca ku muẽleanjo loku popia hati: ‘U tata kuenda cosi o pesela, eci ndi tiuka ndu ku ci tiuwila.’”—Luka 10:34, 35.

Yesu Ulongisi wa Velapo, noke yoku lombolola olusapo, o linga epulilo limue lia tatama kulume hati: “Pokati kalume ava vatatu helie  wa linga ndu o lisungue lulume wa kuatiwa lovingumba?” Citava okuti ulume waco o kuata osõi yoku popia hati “u Samaria,” kuenje o tambulula hati: “Yuna wa lekisa ohenda kokuaye.” Noke Yesu u sapuila ndomo olusapo luaco lu kapiwako poku popia hati: “Kuende, ka lingevo ndoco.”—Luka 10:36, 37.

Onjila eyi yoku longisa yiwa calua! Nda Yesu wa popele lika kulume okuti vana ka va tiamẽlele ku va Yudea omanu va lisungue lavo, anga hẽ ulume waco kuenda va Yudea vakuavo va kala oku u yevelela, nda va tava kondaka yaco? Pamue nda ka va tavele. Poku ta olusapo lumue lua leluka loku tukula ovina via kũlĩhĩwa lolonjeveleli viaye, ca ecelela oku sanga etambululo liepulilo liokuti: ‘U o lisungue letu helie?’ Omunu o lisungue letu yuna o lekisa ocisola, ohenda, ndomo Ovisonehua vi tu handeleka.