Osimbu Yesu a lia vonjo ya umue u Fariseo, omanu valua va liongoluila kosamua. Ovo vo talamela ndeci omanu va enda oku linga ko Galilea. (Marko 1:33; 2:2; 3:9) Kaliye mulo vo Yudea valua va yongola oku u mola loku u yevelela okuti, ocituwa cavo ca litepa leci ca va Fariseo va kala oku lila kumosi.

Olondaka vi kuãimo Yesu a popia, vi kuete elomboloko limue lilikasi kolondonge viaye viokuti: “Lunguki letumbisa lia va Fariseo, okuti ombambe.” Yesu wa popele ale olondaka viaco, pole, ovina a mola osimbu va kala oku lia vio vetiya oku pitulula elungulo eli. (Luka 12:1; Marko 8:15) Citava okuti va Fariseo va seteka oku limbika evĩho liavo poku lekisa ombili kefendelo, pole, eci ocina cimue ci koka ohele ci sukila oku situluiwa. Yesu o lombolola hati: “Ka kuli lacimue ca salamisua okuti ka ci situluiwa kuenda lacimue ci kasi vuyombeki okuti ka ci kũlĩhĩwa.”—Luka 12:2.

Citava okuti omanu valua va liongoluila ku Yesu, va Yudea vana ka vo yevele ko Galilea. Kuenje eye o pitulula atosi a velapo kuenda o sapuila olonjeveleli viaye viosi hati: “Ko ka kuateli usumba ava vo wipayi, [pole, noke] ka va tẽla oku linga vali cimue.” (Luka 12:4) Ndeci a linga ale tete, eye o vetiya olondonge viaye oku kolela okuti Suku o ka va tata. Ovo va sukila oku limbuka Mõlomunu kuenda oku kolela okuti Suku o pondola oku va kuatisa.—Mateo 10:19, 20, 26-33; 12:31, 32.

Kuenje ulume umue powiñi o lekisa esakalalo liaye lia velapo eci a popia hati: “Olongisi, sapuila manjange oco tu litepele ocipiñalo.” (Luka 12:13) Ocihandeleko ci popia okuti, omõla uveli o tambula olonepa vivali viocipiñalo, omo liaco, ka citava okuti ku kala oku lihoya. (Esinumuĩlo 21:17) Pole, ci molẽha okuti ulume waco o yongola oku vokiyila kueci a kuete ale. Yesu lutate o likala oku litenga vocitangi caco. Kuenje o pula hati: “Olume, helie wa ndi nõla oco ndi linge onganji ale onepisi pokati kene?”—Luka 12:14.

Noke Yesu o lungula olonjeveleli viosi hati: “Yululi ovaso ene kuenda lilavi kocipululu, momo ndaño omunu o kuete calua, omuenyo waye ka u tundi kovina a kuete.” (Luka 12:15) Ndaño omunu una o kuete ovokuasi alua, eteke limue o fa kuenje o sia cosi. Yesu o lombolola etosi liaco poku tukula olusapo lumue lua velapo okuti lu lekisa esilivilo lioku kuata onduko yiwa kovaso a Suku.

Eye o popia hati: “Epia liulume umue ohuasi lia ima ciwa. Kuenje wa fetika oku sokolola vutima waye loku popia hati, ‘Omo cilo si kuete apa ndi unguila ovaima ange, nye ndi linga?’ Eye hati, ‘Ndinga ndoco: Ndi teya olosila viange kuenda nunga vinenepo vali kuenje ndongoluilamo olomema viange lovina viosi viwa, kuenje mopia lutima wange siti: “Otima wange, o kuete ovina vialua viwa wongolola anyamo alua; ku ka sakalale, lia, nyua kuenda sanjuka.”’ Pole, Suku wo sapuila hati, ‘Vuveke, uteke ulo va ku upa omuenyo wove. Helie o ka kala lovina wa soleka?’ Eci oco ci pita lomunu o li solekela ovipako pole, ohuasiko kovaso a Suku.”—Luka 12:16-21.

Olondonge via Yesu kuenda omanu vakuavo va kasi oku yevelela, citava okuti va kupukila vonjanjo yoku sandiliya, ale oku li solekela ovokuasi. Ale pamue asakalalo a pondola oku va tateka kupange wa Yehova. Kuenje Yesu o pitulula alungulo awa a tukula Vohundo yo Komunda okuti tunde eci a yi linga pa pita ale unyamo lolosãi epandu.

Eye o popia hati: “Ko ka sakalali lomuenyo wene okuti vu lia nye, ale latimba ene okuti vu wala nye. . . . Kũlĩhĩsi ovikuamanga: Ovio ka vi limi, ka vi ungula; kuenda ka vi kuete olosila; haimo lumue, Suku o vi tekola.  Ene ka wa velelipo hẽ okuti olonjila vi sule? . . . Kũlĩhĩsi olonelẽho ndomo vi kula: Ovio ka vi talavaya ndaño oku pota; pole ndu sapuili siti, ndaño Salomone vulamba waye, ka la liposuisa ndovio. . . . Ko ka tatayali leci vu lia, ale leci vu nyua kuenda ko ka kali lutima wa sakalala. . . . Isiene wa kũlĩha okuti vu sukila ovina viaco. . . . Puãi sandiliyi Usoma waye kuenje ovina evi viu vokiyiwi.”—Luka 12:22-31; Mateo 6:25-33.

Helie o ka sandiliya Usoma wa Suku? Yesu o situlula okuti etendelo limue litito ale “okacunda” komanu vakuekolelo, va ka ci linga. Noke etendelo liaco li ka situluiwa okuti li tẽla 144.000 komanu. Lipi elavoko liomanu vaco? Yesu o va likuminya hati: “Isiene wa [panga] oku wĩhi Usoma.” Ovo ka va tiamisila utima koku sanda ovokuasi a palo posi, kuna ovimunu vi pondola oku nyana. Pole, utima wavo va ka u tiamisila ‘kukuasi umue ka u pui kilu,’ kuna va ka viala la Kristu.—Luka 12:32-34.