“O kalela ka enda, pole umalẽhe umue okuti wo kofeka yo China wa siala!” Eci oco Alexandra a yeva eci a kala vokalela pongave yofeka yo Amerika do Sul oco a ende kofeka yikuavo. Eye wa katuka oco a kũlĩhise eci ca kala oku pita kuenje wa sanga umãlehe umue wo kofeka yo China, wa kala oku seteka oku vangula o Espanhol oco a lombolole ocitangi caye, kondavululi ukuakulava ponganve yofeka. Omo okuti Alexandra wa kala vekongelo limue Liolombangi Via Yehova kelimi lio chines, eye wa lieca olumue oco o kuatise oku lombolola.

Ulume waco wa popia hati, o kuete ovicapa viu wecelela oku kala vofeka pole, via nyaniwa kumosi lolombongo. Kefetikilo, kesongo ka tavele ulandu waco kuenda wa lundila Alexandra okuti wa kongeliwa vupange woku landisa omanu. Noke eye wa tava elomboluilo liulume waco, pole, ulume waco ndaño wa sumuile wa kisikiwa oku feta owombo omo okuti ka kuatele ovicapa via suapo. Omo okuti eye ka kuatele olombongo, Alexandra wo levalisako 20 kolodolare. Ulume waco ka kuatele ndomo a eca olopandu kuenje wa popia hati, poku tiula olombongo viaco, o vokiyako 20 kolodolare. Alexandra wo lomboluila okuti ka kaile oku ci linga locimãho coku fetiwa, pole wa sanjukila oku eca ekuatiso liaco omo a limbuka okuti oco ocina ca sunguluka a sukila oku linga. Eye wa eca kulume waco alivulu amue atiamẽla Kembimbiliya kuenda wo vetiya oco a lilongise Embimbiliya Lolombangi Via Yehova.

Ci sanjuisa oku yeva ovolandu atiamẽla koku kuatisa vana ka tua kũlĩhile, pole ovilinga viaco via siatavo oku lekisiwa lomanu vatavo alua kuenda vana okuti havakuetavoko. Anga hẽ o vetiyiwa oku eca lutima wosi? Epulilo eli li kuete esilivilo momo Yesu wa popia hati: “Esanju li tunda koku eca olio lia velapo, li tunda koku tambula li sule.” (Ovilinga 20:35) Handi vali, ca vetiya olonoño momo akonomuiso a lekisa okuti, oku eca ku panga ciwa komanu. Tu konomuisi ndomo tu linga ovina viaco.

Ovolandu a lekisa okuti oku eca kuenda esanju vi kuete elitokeko. Upostolo Paulu wa soneha okuti “Suku o sole u eca lesanju.” Eye wa kala oku tukula Akristão va eca olombanjaile lutima wosi oco vi eciwe ku vamanji va sukilile ekuatiso. (2 Va Korindo 8:4; 9:7) Paulu ka popele okuti ovo va eca omo va sanjukile. Pole, ovo va sanjuka omo okuti va tẽla oku eca.

Ekonomuiso limue lia lingiwa li lekisa okuti, oku eca “ku vetiya olonepa vimue viowoño vi tiamisiwila koku kuata esanju, ukamba loku likolela pokati.” Ekonomuiso likuavo lia lekisa okuti “oku eca olombongo komunu umue, ceca esanju komanu va vi tambula okuti u o vi eca ci sule.”

Anga hẽ, omo liekalo liove wa simile okuti ku kuete epondolo lioku linga cimue? Ocili ceci okuti, omanu vosi va pondola oku kuata onima yi tunda koku “eca lesanju.” Ombangi yimue ya Yehova ya tuma esapulo limue kuenda ombanjaile yaye ku vakuakusandeka orevista eyi loku popia  hati: “Vokuenda kuanyamo a sulako sia kuatele epondolo lioku eca ombanjaile Vonjango Yusoma.” Pole eye wamisako hati: “Yehova wa siata oku nyĩha ovina vialua okuti evi nda siata oku eca vi sule. . . . Ndi pandula calua omo a siata oku nyĩha epondolo lioku eca ombanjaile eyi, momo ci ndi pamisa.”

Oku eca ka ku sulila lika koku eca olombongo. Kuli olonjila vialua vioku eca.

Embimbiliya li popia hati: “Ukuahenda o lisumuluisa eye muẽle, ukuaviñali puãi o livalula eye muẽle.” (Olosapo 11:17) Omanu vakuahenda, va lieca ovo muẽle, otembo yavo, ongusu yavo, oku tata, kuenda ovina vikuavo. Ovina evi vi va kuatisa volonjila via litepa, kuenda ci panga ciwa kuhayele wavo.

Akonomuiso a lekisa okuti vana va lieca koku kuatisa vakuavo va siata oku kuata ovitangi vitito vioku yeva evalo ale esumuo lialua. Pole ovo va kuata uhayele uwa. Oku eca ci kuatisa vana va kuete uvei umue okuti ka u kayi ndeci, uvei wociteyateya ale o SIDA. Akonomuiso a lekisavo okuti, omanu vana okuti oloholua va kasi oku likolisilako oku siapo ocituwa caco kuenje va sanda oku kuatisa vakuavo, ci va teyuila kesumuo lialua kuenje ci va kuatisa oku yuvula oku kuata vali ocituwa caco coku nyua calua.

Omo liaco oku “lekisa ohenda, oku linga uwa kuenda ocali, ci kuatisa oku yuvula ocitangi cuhayele.” Oku eca ku kuatisavo oku tepulula esumuo lialua kuenda uveyi wovutima. Kuenda omanu vana okuti va fisa ohueli yavo, va limbuka okuti esumuo li tepuluka nda va lieca koku kuatisa vakuavo.

Kakuli atatahãi atiamẽla kondaka yaco. Oku eca ku pondola oku kuatisa.

Yesu wa vetiya olondonge viaye hati: “Ecaeci kuenje omanu vo wĩhivo. Ovo va ka yukisa onjongo yene, loku yi lamela kuenda oku supoka. Momo onjongo vu yonga layo haiyo vo yongelivo.” (Luka 6:38) Eci ove eca, omanu va vetiyiwa oku eca olopandu kuenda va vetiyiwavo oku kuata ocituwa coku eca. Oku eca ci kuatisa oku likuata omunga kuenda ukamba.

Vana vakuakulilongisa ekalo “liomanu va limbuka okuti vana va likolisilako oku lianja lavosi va vetiyavo vakuavo.” Ocili okuti “oku tanga ovolandu atiamẽla koku lekisa ohenda ci vetiya omanu oku kuatavo ocituwa coku eca.” Citava okuti “omunu o pondola oku vetiya omanu valua, okuti vamue ka va kũlihile kuenda lalimue eteke va li sangele.” Volondaka vikuavo, elinga limosi lioku eca li pondola oku vetiya omunu lomunu vimbo limue. Ku sanjukila hẽ oku kala pocitumãlo cimue pali omanu va kuete ocituwa coku eca? Ocili okuti kuli onima yiwa nda omanu valua va kuete ocituwa coku eca.

Ulandu umue u lekisa onima yaco, u tunda ko Florida, kofeka  yo Estado Unidos. Ocimunga cimue Colombangi Via Yehova ca lieca olumue noke yoku pita ocilunga cimue oco va talavaye. Omo okuti va kala oku lavoka ovimãleho vioku semulũla onjo yimue, ovo va limbuka okuti ocitali conjo yi kasi ocipepi ca nyõleha kuenje va pinga oco va ci semulule. Muẽleanjo wa sonehela kombala Yolombangi Via Yehova voluali luosi poku popia hati: “Nda pandula calua. Nda sanga omanu vaco oco va kale kulala womanu vawa nda kũlĩha.” Olopandu vio vetiya oku eca ombanjaile yi kuatisa kueci eye a tukula okuti upange u komõhisa Wolombangi Via Yehova.

Ekonomuiso limue lia lingiwa lolonoño lieli okuti, “citava okuti kuli ocina cimue ci vetiya omunu oku kuatisa vakuavo.” Ulandu waco wa lombolola hati: “Omãla va lekisa ovituwa viwa ndaño ceci ka va fetikile handi oku vangula.” Momo lie? Embimbiliya li eca etambululo poku popia okuti omanu va lulikiwa ‘lesetahãlo lia Suku,’ ci lekisa okuti omanu va pondola oku lekisa ovituwa ndevi via Suku.—Efetikilo 1:27.

Cimue pokati kovituwa vi komõhisa Viululiki wetu Yehova Suku, ocituwa coku eca. Eye wa tu ĩha omuenyo kuenda ovina viosi tu sukila oco tu kuate esanju. (Ovilinga 14:17; 17:26-28) Tu pondola oku kũlĩha ocipango ca Isietu wokilu poku lilongisa Ondaka yaye, Embimbiliya. Elivulu liaco li sitululavo okuti Suku wa linga eliangiliyo oco tu kuate esanju kovaso yoloneke. * (1 Yoano 4:9, 10) Omo okuti Yehova Suku eye ono yoku eca kuenda ove wa pangiwa lesetahãlo liaye, ka ci komõhisa okuti oku kuata ocituwa coku eca poku setukula Suku ci ku kuatisa kuenda o pondola oku kuata ukamba laye.—Va Heveru 13:16.

Ivailuka ulandu wa Alexandra wa tukuiwa kefetikilo liocipama cilo? Ulandu waye wa sulila ndati? Ndaño okuti omunu umue a kala oku linga laye ungende wo sapuila okuti wa pesela olombongo viaye, pole ulume una eye a kuatisa, wa sandiliya akamba vaye volupale lumue okalela ka talama, kuenje wa feta ofuka yeci ci soka 20 kolodolare. Kuenje, ulume waco wa tava kocisimĩlo ca Alexandra kuenda wa fetika oku lilongisa Embimbiliya. Eye wa kuata esanju poku lisanga vali lulume waco noke liolosãi vitatu eci a endele kohongele yofeka Yolombangi Via Yehova kelimi lio Chines kofeka yo Peru. Oco a lekise olopandu viaye omo liekuatiso Alexandra owihĩle, ulume waco wo laleka kuenda wa lalekavo vakuavo veyilila kumosi kohongele yofeka oco va kalie vo Bare yaye.

Oku eca kuenda oku kuatisa vakuetu, ci nena esanju lialua. Handi vali, ove o ka kuatisa omanu oku kũlĩha ciwa Ono yolongavelo viosi viwa, Yehova Suku! (Tiago 1:17) O kasi hẽ oku kuatisiwa lonima yi tunda koku eca?