OVIPAMA VIA PITA, via lekisa okuti ovitangi vialua komuenyo, vi pondola oku koka okuti ka ci leluka oku pandikisa. Osimbu o pandikisa kovitangi viove, citava okuti o lipula nda omuenyo u kuete esilivilo ale nda kuli omunu umue wa ku kapako. Kolela okuti Suku o ku kuatisa oku liyaka lovitangi viove. Ove o kuete esilivilo kokuaye.

Usonehi Wosamo 86, wa situlula ekolelo a kuatele ku Suku poku popia hati: “Eteke liohali yange hu vilikiya momo o nambulula.” (Osamo 86:7) O pondola oku lipula ndoco: ‘Suku o ka nambulula ndati eci “ndi tala ohali?”’

Ndaño Suku ka maliko ovitangi viove vonjanja yimosi, Embimbiliya li lekisa okuti eye o ku ĩha ombembua yovutima, oco yi ku kuatise oku pandikisa. Olio liti: “Ko ka sakalali locina cimue, pole, kovina viosi lolohutililo kuenda alombelo kumue lolopandu, apingilo ene a kũlĩhĩwe la Suku; kuenje ombembua ya Suku yina ya piãla olondunge viosi, yi lava ovitima viene kuenda ovisimĩlo viene vu Kristu Yesu.” (Va Filipoi 4:6, 7) Kulĩhĩsa ndomo ovinimbu Viembimbiliya vikuãimo vi ku vetiya oku kolela okuti Suku o ku kuatisa.

“Layimue [Ongungu] yi ivaliwa la Suku. . . . Ene wa velipo okuti olongungu vialua vi sule.”​—Luka 12:6, 7, petosi

KŨLĨHĨSA: Olongungu vi mõleha okuti ka vi kuete esilivilo, pole, Yehova o vi tata. Omanu va kuete esilivilo lialua kovaso a Suku okuti olongungu vi sule. Omanu ovo oviluvo via Suku vi kuete esilivilo lialua palo posi momo, va lulikiwa “lesetahãlo” liaye kuenda va pondola oku kuata loku lekisa ovituwa vi komõhĩsa via Suku.—Efetikilo 1:26, 27.

“A Yehova, ove wa ñulĩhisa, wa ñuliha muẽle. . . . Wa limbuka ovisimilo viange tunde kupãla. . . . Ñulĩhise, a Suku. Kũlĩha utima wange. Seteke. Kũlĩha ovisimĩlo viange.—Osamo 139:1, 2, 23.

KŨLĨHĨSA: Suku wa ku kũlĩha ciwa. Eye wa kũlĩha ovisimĩlo viove kuenda asakalalo. Citava okuti omanu ka va kuata elomboloko liovitangi kuenda asakalalo wa siata oku liyaka lavio, pole, Suku o ku tata kuenda o yongola oku ku kuatisa. Omo liaco, omuenyo wove u kuete esilivilo.

“Yeva ohutililo yange, a Yehova. Uteto wange u pitile kokuove. . . . Mbonguile etui liove. Eteke mbilikiya nambulule lombili. . . . O yeva ohutililo yolosuke.”—Osamo 102:1, 2, 17.

KŨLĨHĨSA: Tunde kefekilo Yehova o lete asuẽlela osi omanu va siata oku lolula omo liohali. (Osamo 56:8) Mua kongela asuelela ove. Suku ivaluka ovitangi viosi wa siata oku liyaka lavio kuenda asuẽlela ove, momo o kuete esilivilo kokuaye.

“Ku ka yokoke, momo ndi Suku yove! Ame hu kolisa, hu kuatisa. . . . Momo ame Yehova, Suku yove. . . . Ame muẽle mopia love siti, ‘Ku ka kuate usumba, hu kuatisa.’”—Isaya 41:10, 13.

KŨLĨHĨSA: Suku o pondola oku ku kuatisa. Nda wa kupuka, eye o ku votola.

“Omo Suku a sola calua oluali, wa eca Omõlaye wongunga, okuti wosi o kolela kokuaye ka nyõliwa, o kuata omuenyo ko pui.” —Yoano 3:16.

KŨLĨHĨSA: Ove o soliwe calua la Suku okuti wa e ca Omõlaye, Yesu, ndocilumba kokuove. Ocilumba caco ca ecelela okuti o kuata omuenyo umue wesanju otembo ka yi pui. a