Anga hẽ eteke limue wa kuatele ale ocisimĩlo cokuti ku tẽla oku eca ekuatiso komunu umue wa sumua omo lioku fisa ukuepata liaye? Pamue tu sima okuti ka tu tẽla oku vangula ale oku lingila cimue komunu waco, kuenje ka tu u kuatisa. Pole, kuli ovina vimue tu pondola oku linga oco tu kuatise omunu wa fisa.

Olonjanja vimue tu sukila lika oku kala ponambi yaco, loku popia olondaka via leluka viokuti: “Ca vala calua.” Kapata amue oku lama peka, onjila yimue yoku lekisa okuti tua kapako omunu waco. Nda omunu wa fisa o yongola oku vangula, u yevelela lutate. Handi vali, kuatisa kovopange ana okuti, vana va fisa ka va pondola oku a linga vepuluvi liaco ndeci: Oku teleka okulia, oku va tatelako omãla, kuenda kaliangiliyo akuavo nda ci sukiliwa. Oku eca ekuatiso liaco, ci kuete esilivilo lia velapo okuti, oku popia lika olondaka via fina ci sule.

Citava okuti o pondola oku sapela catiamẽla kovituwa viwa omunu wa fa a enda oku lekisa, loku tukula ovolandu a sanjuisa. Ombangulo yaco yi pondola oku sanjuisa omunu wa fisa. Ukãi umue o tukuiwa hati Pam, okuti tunde eci ulume waye a fa pa pita ale epandu kanyamo wa popia ndoco: “Olonjanja vimue, omanu va siata oku ndi sapuila ovina  viwa ulume wange Ian a enda oku linga okuti sia la vi yeva, kuenje ci ndi sanjuisa calua.”

Akonomuiso a lingiwa a lekisa okuti, omanu vana va fisa vakuepata liavo, kefetikilo va tambula ekuatiso lialua. Pole, eci akamba va tiukila kolonjo viavo, omo liovopange avo, ka va eci vali ekuatiso omunu una wa fisa a sukila. Omo liaco, likolisilako oku nyula ekamba lia fisa ngandiaye. * Omanu valua va fisa vangandiavo, va sole apuluvi aco, momo ci va kuatisa oku tepulula esumuo.

Kũlĩhĩsa ulandu wufeko umue o tukuiwa hati, Kaori wo kofeka yo Japãu. Eye, wa sumuile calua eci inaye a fa, kuenje eci pa pita unyamo umosi lolosãi vitatu, wa fisa vali huvaye ukãi. Noke wa pandula calua omo liekuatiso a tambula kakamba vaye. Umue pokati kakamba vaco o tukuiwa hati, Ritsuko okuti, wa kala ukulu waye. Ovo va likuatela ukamba. Kaori wa popia hati: “Kefetikilo sia sanjukilile ocisimĩlo caco. Momo sia yonguile okuti omunu umue o piñainya ina yange. Omo okuti Ina Ritsuko wa kala oku ndi tata ciwa, tua linga akamba. Olosemana viosi tua enda oku kundila kumosi, loku enda kolohongele. Wa endavo oku ndi laleka oco tu yuvile o chá, oku ndi nenela okulia, loku ndi sonehela ovikanda olonjanja vialua. Ocituwa ciwa ina Ritsuko a lekisa, ca ndi vetiya oku lekisavo ovituwa viwa.”

Tunde eci ina ya Kaori a fa pa pita ale ekũi la vali kanyamo kuenda cilo eye kumue lulume waye akundi votembo yosi. Kaori wa popia hati: “Toke cilo ina Ritsuko, wa ndi kapako. Eci ngenda konjo koloneke viepuyuko, nda siata oku u nyula oco ukamba wetu u pamisiwe.”

Omunu ukuavo wa kuatisiwa, ukãi umue o tukuiwa hati Poli, okuti Ombangi ya Yehova kofeka yo Kupro. Ulume wa Poli o tukuiwa hati Sozos, wa kuatele ovituwa viwa, kuenda omo okuti wa kala ukulu wekongelo, wa enda oku laleka olosiwe, lovimbumba, oco veye konjo yaye oku lia. (Tiago 1:27) Pole, eci Sozos a tẽlisa 53 kanyamo wa fa luvei wotumore vowoño. Poli wa popia hati: “Nda fisa ulume wange okuti, tunde eci tua kuela pa pita ale 33 kanyamo.”

Noke yonambi, Poli kumue lomõlaye Daniel o kuete 15 kanyamo, va ilukila kofeka yo Kanada. Eci va pitĩla kofeka yaco va fetika oku linga ukamba la vamanji vekongelo. Poli wa popia hati: “Akamba vetu vekongelo tua ilukila, ka va kũlĩhĩle lacimue catiamẽla kokuetu, lovitangi tua liyaka lavio. Pole, eci ka ca va tatekele oku linga ukamba letu loku tu sapuila olondaka viwa kuenda oku tu kuatisa. Ekuatiso liaco lieya votembo yiwa ca pĩala enene eci omõlange a sukilile calua isiaye! Vamanji va songola ekongelo, va lekisa onjongole yoku kuatisa Daniel. Umue pokati kavo poku kala lakamba ale poku tasula ombunje wa enda oku laleka Daniel.” Kuenje toke cilo, ina kumue lomõlaye va kasi oku amamako oku linga ovina viwa.

Ocili okuti, kuli olonjila vialua tu pondola oku kuama oco tu kuatise vana va fisa vakuepata liavo loku va lembeleka. Embimbiliya li tu lembelekavo lelavoko liepinduko kovaso yoloneke.