ULOÑO WOKU KŨLĨHĨSA OLOMBUNGULULU: Omanu vamue va tava okuti, onjila ndomo olombungululu vi sangiwa eci omunu a citiwa, oyo yi situlula ovituwa omunu a ka kuata kuenda ekalo liaye kovaso yoloneke. Ovo va sanda vakuovoloño oku tãha lolombungululu, ale olomapa vioku tãha oco va kũlĩhe eci ci ka pita lavo, kuenje va linga cimue, oco va liteyuile, ale oku kuata onima yiwa.

ONJILA YOKU TÃHA YO KO CHINA: Vakuavo va tava okuti, oku tunga olonjo viavo lonjila yimue, ci va nenela esanju. Ulume umue o tukuiwa Lo Wing, * o kasi kofeka yo Hong Kong, wa popia hati: “Onoño yimue yi tava konjila yoku tãha yo ko China, ya ndi sapuila siti, nda nda kapa ewe limue liyela lilikasi pocitumãlo cimue covenda yange, ca laikele oku ndi kuatisa oku kuata olombongo vialua.”

OKU FENDELA VAKUKULULU VA FA: Handi vakuavo va tava okuti, va sukila oku fendela vakukululu yavo va fa, ale olosuku via liyekala oco va kuate eteyuilo kuenda asumũlũho. Ukãi umue o tukuiwa okuti Van, o kasi kofeka yo Vietname wa popia hati: “Ndi tava okuti, poku fendela vakukululu yange va fa, nda ca ñuatisa oku kuata omuenyo wa velapo cilo, loku nyĩha ekalo lia kolapo kuenda komãla vange kovaso yoloneke.”

OKU CITIWILA VETIMBA LIKUAVO: Valua va tava okuti, eci omunu umue a fa, o citiwila vetimba likuavo okuti, ci pituluiwa olonjanja vialua. Ovo va tavavo okuti, cilo nda ku pita ovina viwa ale vĩvi, onima yi tunda kulandu womuenyo va kuatele kosimbu.

Pole, valua va tenda alongiso aco ndovihilahila. Ndaño omanu valua va popia hati ka va lingi ovina viaco, pole, va siata oku tãha peka, oku talavaya lolomapa vioku tãha, avaya Ouija^®, ovikanda vioku tãha kuenda ovina vikuavo. Ovo va sima okuti, pamue ovilinga viaco vi pondola oku va kuatisa oku kũlĩha eci ci laika oku iya kovaso yoloneke.

Vana va kolela kalongiso aco, lo kovilinga viaco, va siata hẽ oku sanga omuenyo uwa kuenda ekalo lia kolapo lio kovaso yoloneke?

Kũlĩha ulandu wulume umue o tukuiwa hati, Hào, o kasi vofeka yo Vietname. Eye wa talavaya luloño woku tãha olombungululu, lonjila yoku tãha yo ko China kuenda wa fendela vakukululu vaye va fa, oco ovina viaco viu songuile. Anga hẽ wa kuata onima yiwa? Hào wa popia hati: “Nda pumba olombongo vialua, nda kuata olofuka vialua, nda liyaka lovitangi vepata kuenda nda kuatele esumuo lialua.”

Ulume umue o tukuiwa okuti Qiuming, wo kofeka yo Taiwan, wa tavelevo kuloño woku tãha lolombungululu, kelongiso lioku citiwila vetimba likuavo, kosande, konjila yoku tãha yo ko China kuenda kefendelo lia vakukululu va fa. Noke yoku konomuisa lutate alongiso a tukuiwa ndeti, eye wa popia hati: “Nda limbuka okuti, alongiso aco lovihilahila viaco, ka vi kuete elitokeko kuenda ka via lombolokele. Nda limbuka okuti, ovina vi lekisiwa luloño woku tãha lolombungululu, otembo yosi ka via suilepo. Catiamẽla kelongiso lioku citiwila vetimba likuavo, nda ku ivaluka omuenyo wa kuatele osimbu, o pondola oku pongoloka ndati loku linga ciwa ovina komuenyo ukuavo?”

Omanu ndeci, Hào, Qiuming kuenda vakuavo, va lilongisa okuti, ekalo lietu lio kovaso yoloneke, ka lia tambele kosande, kuloño woku kũlĩhĩsa olombungululu, kefendelo lia vakukululu, ale koku citiwila vetimba likuavo. Eci hẽ ci lomboloka okuti ka tu kuete ndomo tu mioñolola ekalo lietu lio kovaso yoloneke?

Valua va sima okuti, onjila yimue yoku kuata ekalo lia kolapo kovaso yoloneke, oku lilongisa kolosikola via velapo kuenda oku sanda ovokuasi. Vana va nõla olonjila viaco, onima yipi va kuata?