Omanu valua voluali, va tava okuti o Natale ocipito cimue coku sambiliya eteke liokucitiwa kua Yesu Kristu. Pole, anga hẽ wa lipulile ale nda Akristão vokocita catete va enda oku linga ocipito Conatale? Wa kũlĩha hẽ eci Embimbiliya li popia catiamẽla kovipito vioku sambiliya eteke lioku citiwa? Oku sanga atambululo kapulilo a-a, ci ku kuatisa oku limbuka nda okuti Onatale ocipito cimue Cakristão.

Catete, Embimbiliya ka li longisa okuti tu sukila oku sambiliya eteke lioku citiwa kua Yesu ale liufendeli umue wa Suku ukuekolelo. Ovisonehua vi tukula lika omanu vavali va linga ocipito coku sambiliya eteke liavo lioku citiwa. Omanu vaco, ka va kaile afendeli va Yehova, o Suku ya tukuiwa Vembimbiliya kuenda vokuenda kuovipito viaco kua pita ovina vimue vĩvi. (Efetikilo 40:20; Marko 6:21) O Encyclopædia Britannica, ya lekisa okuti Akristão vatete ka va kuatele “ocituwa coku linga ocipito coku sambiliya eteke lioku citiwa.”

Embimbiliya ka li tukula eteke Yesu a citiwa. Elivulu losapi hati, Enciclopédia de McClintock e Strong lia popia okuti ka tu pondola oku sanga eteke Kristu a citiwa Votestamento Yokaliye ale vono yikuavo. Omo liaco, nda Yesu wa yonguile okuti olondonge viaye vi sambiliya eteke liaye lioku citiwa, eye nda wa va lomboluila eteke a citiwa.

Cavali, Embimbiliya ka li lombolola okuti Yesu ale olondonge viaye via lingile ocipito Conatale. O New Catholic Encyclopedia yi lekisa okuti, “oku linga ocipito Conatale, ca tukuiwa onjanja yatete velivulu lia Philocalus, ulume umue wa kemãla wo ko Roma, citava okuti wa soneha elivulu liaco kunyamo wo 336 [K.K.].” Eye wa tukula olondaka viaco noke yoku malusuiwa Kuembimbiliya, eci pa pita anyamo amue tunde eci Yesu a kala palo posi. Omo liaco, McClintock kuenda Strong va popia okuti “ocipito Conatale, ka ca tundile ku Suku kuenda ka ci sangiwa Votestamento Yokaliye.” *

Yesu, Ulongisi Wavelapo, wa eca olonumbi viasuapo viatiamẽla kovina eye a yongola okuti oco olondonge viaye vi linga kuenda ovina viaco via sonehiwa Vembimbiliya. Oku linga Ocipito Conatale ka ci sangiwa volonumbi viaco. Ndeci ulongisi umue wokosikola ka yongola okuti olondonge viaye vi linga ovina vina ka va longisile, Yesu ka yongolavo okuti “olondonge viaye vi linga ovina ka vi sangiwa” Vovisonewa vi Kola.—1 Va Korindo 4:6.

Pole, kuli ocipito cimue ci kuete esilivilo Akristão vatete va kũlĩhĩle ciwa, okuti Ocipito Colofa Via Yesu. Yesu wa sapuila olondonge viaye otembo va ponduile oku linga ocipito caco kuenda wa lekisa kokuavo ndomo ci lingiwa. Olonumbi viaco kuenda eteke eye a fa, via sonehiwa Vembimbiliya.—Luka 22:19; 1 Va Korindo 11:25.

Ndomo tua kũlĩhĩsa, Onatale ocipito cimue coku sambiliya eteke lioku citiwa kuenda Akristão vatete ka va lingaile ocipito caco cetavo liesanda. Embimbiliya ka li lekisa okuti Yesu ale omunu ukuavo va sambiliya ocipito Conatale. Omo liaco, Akristão valua vocili voluali luosi va nõlapo oku yuvula oku linga ocipito Conatale.