ULANDU owu, umue pokati kovina ndi ivaluka ku isiange okuti wa kala embombe, kuenda ondingupange. Omo okuti wa kala ukuesunga, wa tava lonjanga kesapulo Liembimbiliya a yeva kunyamo wo 1953. Kuenje, wa tu longisa ovina viosi a lilongisa. Kefetikilo, ina yange wa kuata atatahãi omo liovina a lilongisa vetavo Liokatolika. Noke, wa fetika oku lilongisa Embimbiliya likawaye.

Ka ca lelukile olonjali vietu oku tu longisa Embimbiliya, momo ina yange ka tẽlele oku tanga, kuenda isiange wa enda oku talavaya kovapia. Olonjanja vimue wa enda oku kava, kuenje, vepuluvi lielilongiso wa enda oku suñila. Ndaño wa likolisilako, pole ka kuatele onima yiwa. Omo okuti nda kala omõla uveli, nda kuatisa manjange ufeko, kuenda va manjange vavali alume. Velilongiso Liembimbiliya ndaenda oku kongelamo ovina Isiange a enda oku popia viatiamẽla kocisola Noha a lekisa kepata liaye, kuenda epokolo liaye ku Suku. Nda solele calua ulandu waco Wembimbiliya. Ka pa pitile otembo yalua, noke, tua fetika oku endaenda kolohongele Vonjango Yusoma ya kala vimbo lio Roseto degli Abruzzi, volupale luo Adriatiku, ko Italia.

Kunyamo wo 1955 eci nda tẽlisa 11 kanyamo, ame kumue la ina yange, tua pita volomunda oco tu ende kohongele yetu yatete yofeka ya lingiwila volupale luo Roma. Tunde keteke liaco, nda tenda ohongele yaco okuti oyo yavelapo komuenyo Wakristão.

Noke yoku papatisiwa kunyamo wa kuamamo, nda iñila kupange wakundi votembo yosi. Eci nda tẽlisa 17 kanyamo, nda fetika upange wakundi valikasi volupale lumue kombuelo yo Roma, lu kasi ocinãla ci sola 300 kolokilometulu oku tunda vimbo lietu. Olupale luaco lua kala luokaliye okuti, omanu vaco ka va kapeleko ovisimĩlo via vakuavo. Ame kumue la manji nda kala laye kupange woku kunda, tua eca alivulu alua, pole, omo okuti nda kala umalẽhe, nda kuata ongeva yoku tiukila kimbo lietu! Pole, nda pokola kolonumbi nda tambuile.

Kunyamo wo 1963, nda tumiwa volupale luo Milan oco ndi kuatise koku pongiya ohongele yolofeka losapi hati: “Olondaka Viwa Viotembo ka yi Pui.” Vokuenda kuohongele yaco, nda kuatisa kovopange alua kumue la vamanji vakuavo oku kongelamo manji Paolo Piccioli, wa tundile volupale luo Florence.  Keteke liavali liohongele yaco, wa linga ohundo yimue ya vetiya vamanji valua. Toke cilo ndi ivaluka olondaka a popele hati: ‘Lalimue eteke a ka kuela.’ Pole, noke tua fetika oku li tumisa ovikanda, kuenje tua limbuka okuti, tu kuete ovimãho vimuamue ndeci: Oku lekisa ocisola ku Yehova, kuenda oku pamisa onjongole yetu yoku pokola kokuaye. Omo liaco, tua kuela kunyamo wo 1965.

Nda kala ukundi wotembo yosi volupale luo Florence vokuenda kuanyamo ekũi. Nda kuata esanju lialua poku mola ndomo akongelo a kala oku li vokiya, ca piãla enene poku mola ndomo amalẽhe va pamisa ekolelo liavo. Ame kumue lulume wange Paolo, tua kuata esanju poku sapela lavo ovina vi pamisa ekolelo liavo vepuluvi liovitalukilo, kuenda manji Paolo wa enda oku imba lavo ombunje. Nda sanjukila otembo ndaenda oku kala lulume wange, pole, nda limbuka okuti, amalẽhe vaco kumue la vamanji vakuavo vekongelo, va kuatisiwavo omo lioku sokiya otembo yoku kala lavo.

Toke cilo ndi kuete esanju poku sokolola omanu valua tua longisa Embimbiliya kotembo yaco. Umue pokati komanu tua longisa Embimbiliya o tukuiwa hati Adriana okuti, noke weya oku longisavo apata avali. Ovo va linga esokiyo lioku li sanga la patele, oco vo lomboluile eci catiamẽla kelongiso lia suku umosi Muvatatu, kuenda elongiso liocilelembia ka ci fi. Kuenje, olopatele vitatu via tunda vohongele yaco. Noke, vana tua longisa Embimbiliya va limbuka okuti, ovina olopatele via lombolola via litepa levi vi sangiwa Vembimbiliya. Ohongele yaco ya kuata esilivilo lialua. Momo ci soka 15 komanu vepata liaco veya oku linga Olombangi Via Yehova.

Koloneke vilo, tua siata oku kuama onjila ya litepa yoku longisa leyi tua enda oku kuama kosimbu. Ulume wange Paolo wa kuatele “uloño” woku sapela lolopatele vialua. Ndi ivaluka umue wa kala pohongele ya lingiwa lomanu vana okuti Halombangiko Via Yehova. Vohongele yaco, mua kala ovanyãli vamue va vetiya omanu oku linga apulilo ka a kuete esilivilo. Pole, noke va liwekapo lombangulo yaco. Umue pokati kavo wa pula nda ca sunguluka omunu ukuetavo oku tiamẽla kopulitika, ndomo vakuetavo va siata oku ci linga vokuenda kuanyamo alua. Epulilo liaco lia sumuisa olopatele. Vepuluvi liaco ocinyi ca ima, kuenje va liwekapo oku linga ohongele yaco. Noke lianyamo amue, tua limbuka okuti, olopatele ovio via tumile oku ima ocinyi vohondo yohongele yaco. Momo ka via solele ndomo ohongele yaco ya lingiwa.

Noke lianyamo ekũi tunde eci tua kuela, tua tambula ocikele coku nyula akongelo.  Ulume wange wa kuata upange uwa woku sanda eteku, kuenje, ka ca lelukile oku tava kelaleko liaco. Pole, noke yoku likutilila ku Yehova, tua tava kelaleko liaco. Tua sanjukila otembo vamanji va enda oku tu yekisa kolonjo viavo. Koñolosi, tua enda oku lilongisila kumosi ovipama vimue Viembimbiliya kuenje, ulume wange wa kuatisa omãla oku linga ovikele vio kosikola, ca piãla enene ocikele colokonda. Ulume wange wa kuatele onjongole yoku sapuila omanu ovina a lilongisa. Sengunda tua enda oku kundila kovikanjo vina okuti, ka kua kalele Olombangi Via Yehova, kuenda tua enda oku laleka omanu oco va yevelele ohundo koñolosi.

Noke lianyamo avali kupange woku nyula akongelo, tua lalekiwa oku enda ko Betele ko Roma. Manji Paolo wa talavaya voseketa yoku teyuila upange woku kunda vofeka. Pole, ame nda talavaya Voseketa Yolorevista. Ndaño okuti ka ca lelukile oku linga apongoloko, pole, tua pokola kelaleko liaco. Tua kuata esanju lialua poku mola ndomo o Betele yo Italia ya kala oku vokiyiwa, kuenda tua mola ndomo etendelo lia vamanji lia kala oku li vokiya. Kotembo yaco, Olombangi Via Yehova via kuata ale elianjo lioku kundila vo Italia. Tua sanjukilile oku linga upange waco.

Osimbu tua kala oku talavaya ko Betele, tua liyaka locitangi coku yuvula oku kapiwa osonde vo Italia. Oku upisa kunyamo wo 1980, ocitangi caco ca livokiya. Manji umue lukãi waye va lundiliwa vati ovo va ponda omõlavo ufeko. Pole, wa fa omo lioku kuama ocituwa comanu vamue vo ko Mediteraneo coku yuvula oku sakuiwa losonde. Vamanji ko Betele, va kuatisa olonganji via kala oku teyuila olonjali viomõla wa fa. Ovolandu a sandekiwa vokokanda kamue lo vo Despertai!, a kuatisa omanu oku limbuka eci Embimbiliya li popia catiamẽla kosonde. Vokuenda kuolosãi viaco, olonjanja vimue manji Paolo wa enda oku talavaya ekũi lepandu kolowola okuti ka puyuka. Pole, nda likolisilako oku u kuatisa kupange waco.

Eci tua tẽlisa 20 kanyamo tunde eci tua kuela, tua liyaka lovitangi vimue ka tua lavokaile. Eci nda tẽlisa 41 kanyamo, kuenda ulume wange 49, ndo sapuila okuti, nda mina. Kesulilo lieteke liaco nda sanga velivulu liaye olondaka a tukula vohutililo yaye hati: “A Yehova, nda olondaka evi viocili, tu kuatise oku amamako kupange wotembo yosi, pole ka tu ka ecelele okuti, ekolelo lietu li hongua, kuenda tu kuatise oco tu kale olonjali vimue viwa. Ndi kuatise oco ndi kapeko ovina viosi nda enda oku tukula kembumbua vokuenda kuakũi atatu kanyamo.” Omo liaco, Yehova wa tambulula olohutililo vietu.

 Oku citiwa kuomãla wetu Ilaria kua tu nenela apongoloko komuenyo. Ndaño okuti elivulu Liolosapo 24:10 li popia hati: ‘Nda wa konyoha keteke liohali, ci lomboloka okuti ongusu yove yitito, ’ pole, tua sumuile calua vokuenda kuotembo yimue. Pole, tua li kuatisa pokati eci tua ivaluka okuti oku ci linga ci kuete esilivilo.

Cilo, omõletu Ilaria wa popia hati, o kuete esanju omo lioku citiwa lolonjali vimue via litumbikile kupange wakundi votembo yosi. Eye ka liveli, momo wa citiwila vepata limue li kuete ovituwa viwa. Vokuenda kueteke, ndaenda oku u kuatisa. Ndaño okuti ulume wange eci a tiuka kupange, wa kuata ovikele vikuavo, pole, waenda oku papala laye, kuenda oku u kuatisa kovikele vio kosikola. Noke, wa kuata ocikele coku linga upange ukuavo toke kowola yavali ale yatatu komẽle. Omo liaco, Ilaria wa popia hati: “Isiange eye ekamba liange lia velapo.”

Tua likolisilako oku pindisa Ilaria oco amameko oku kala vocisoko ca Yehova. Ndi ivaluka epuluvi limue eci Ilaria a kala oku mangala lekamba liaye okuti, wa linga ovina ka via sungulukile. Noke tuo kuatisa lolonumbi Viembimbiliya vi lekisa esunga lieci a sukilila oku yuvula ovina ka via sungulukile. Kuenje, tuo vetiya oku pinga ongecelo kekamba liaye vepuluvi liaco.

Ilaria wa popia hati, wa sanjukila ocisola olonjali viaye via lekisa kupange woku kunda. Omo okuti cilo wa kuela, o kuete elomboloko liesilivilo lioku pokola ku Yehova kuenda kolonumbi viaye.

Kunyamo wo 2008, ulume wange Paolo wa limbuka okuti, o kuete uvei wo kanser. Eci a fetika oku vela wa simĩle okuti o kaya, kuenje wa ndi sapuila olondaka via ndi pamisa calua. Osimbu tua kala oku sanda onjila yoku sakula uvei waco, ame la Ilaria, tua likutilila ku Yehova oco a tu kuatise oku liyaka locitangi caco kovaso yoloneke. Pole, nda limbuka okuti, ulume wange wa pamele, wa fetika oku kopa. Olofa viaye kunyamo wo 2010 via ndi kokela esumuo lialua. Pole, nda yeva elembeleko eci nda sokolola ci soka 45 kanyamo nda kala kumosi laye. Ame kumue laye, tua eca ekuatiso lietu kupange wa Yehova. Nda kũlĩha okuti, upange tua linga, u ka kuata esilivilo ka li pui. Omo liaco, ndi lavoka esanju ndi ka kuata eci ulume wange Paolo a ka pinduiwa palo posi, ndomo Yesu a ci popia kelivulu lia Yoano 5:​28, 29.

Toke cilo, ndi ivaluka otembo nda kala omõla okuti nda solele calua ulandu wa Noha. Nda nõlapo oku pokola ku Yehova, kuenda oku linga upange a tuma. Nda limbuka okuti, ndaño tu liyaka lovitangi, oku likolisilako kupange wa Yehova ale esumuo li tunda kolofa via umue ukuepata lietu, ovina viaco ka vi sokisiwa lasumũlũho tu ka tambula ku Yehova. Momo nda limbuka okuti, oku pokola ku Yehova, ci kuete esilivilo lia velapo.