PA PITA ale anyamo ekũi tunde eci manji Gregorio lukãi waye Marilou va kuete ci pitahãla 30 kanyamo va lieca kupange wakundi votembo yosi kofeka yo Manila. Kotembo yaco, va kala oku talavaya kupange woku sanda eteku. Ndaño okuti ka ca lelukile oku ci linga, pole, va kuata onima yiwa. Manji Marilou wa kala usongui kombango a talavaya. Eye wa popia hati: “Upange wetu wa tu kuatisa oku kuata ekalo liwa komuenyo.” Omo okuti va kuata olombongo vialua, va nõlapo oku tungisa onjo yimue ya posoka ya kala ocinãla ci soka 19 kolokilometulu kutundilo wo Manila. Omo liaco, va sapela lolomesele oco vi tunge onjo yavo okuti yi fetiwa vokuenda kueci ci soka ekũi lianyamo.

Manji Marilou wa popia hati: “Omo okuti nda siata oku kala otembo yalua kupange woku sanda eteku, ombili yange kupange woku kunda ya tepuluka. Kuenje nda limbuka okuti, nda kala oku nyana Yehova.” Eye wa amisako hati: “Sia kalele vali oku pesila otembo yalua kupange wa Yehova, ndeci ndaenda oku linga kosimbu.” Omo okuti ekalo liaco lia sumuisile manji Gregorio lukãi waye Marilou, va sapela ovina viatiamẽla kocitangi caco.  Noke manji Gregorio wa popia hati: “Tua yonguile oku linga apongoloko komuenyo wetu pole, ka tua kũlĩhĩle onjila tu kuama. Omo okuti ka tua kuatele omãla, tua sapela ndomo tu pondola oku pesila o tembo yalua kupange wa Yehova. Kuenje, tua likutilila kokuaye oco a tu kuatise.”

Vokuenda kuotembo, va yevelela olohundo via lombolola ovina via tiamẽla koku kundila kovikanjo vina ku sukila akundi Vusoma. Manji Gregorio wa popia hati: “Tua limbuka okuti olohundo viaco via kala etambululo liolohutililo vietu.” Ovo va likutilila ku Yehova oco va kuate utõi woku nõla onjila ya sunguluka. Pole, va kuata ocitangi omo lionjo va kala oku tungisa, momo va fetele ale anyamo atatu. Nye va sukilile oku linga? Manji Marilou wa popia hati: “ Nda tua liwekapo oku tungisa onjo yaco, tu pesela olombongo tua feta anyamo atatu. Pole, tua kũlĩhĩsa lutate nda tu nõlapo oku pitisa kovaso upange wa Yehova, ale tu tẽlisa olonjongole vietu.” Omo okuti va sokolola olondaka upostolo Paulu a popia viatiamẽla koku ‘siapo ovina viosi’ va liwekapo oku tungisa onjo yavo. Noke va siapo ovopange avo, loku landisa ovikuata viavo, kuenje va ilukila vimbo limue likasi vocifuka co Palawan, ocinãla ci soka 480 kolokilometulu kombuelo yo Manila.—Va Fil. 3:8.

Osimbu manji Gregorio lukãi waye Marilou ka va ilukile, va kala oku lipongiya oco va kuate omuenyo umue wa leluka. Pole, ka va kuatele elomboloko liomuenyo va ka kuata kocitumalo va laikele oku enda. Manji Marilou wa popia hati: “Tua sumuile calua omo liocitangi caco. Momo vonjo yaco ka mua kalele olusu, kuenda ovina vikuavo ndevi tua kuata volupale. Tua enda oku teleka kolohũi. Nda kuata ongeva yoku landa ovina volovenda vinene, oku lia volowotele, kuenda ovina vikuavo.” Ovo va ivaluka eci ca va vetiya oku iluka osimbu ka va lingile apongoloko. Manji Marilou wa popia hati: “Ndi kuete esanju omo lioku tala ovina via posoka via tu ñuala oku kongelamo olombungululu tua siata oku mola kuteke. Esanju lietu lia livokiya calua poku mola omanu va lekisa onjongole eci tua va kundila olondaka viwa Viusoma. Oku kala kofeka yaco, ca tu longisa ‘uloño woku sanjukila ovina tu kuete.’—Va Fil. 4:12.

Manji Gregorio wa popia hati: “Eci tua pitĩla vocikanjo caco mua kala lika Olombangi Via Yehova vikuãla. Ovo va kuata esanju lialua eci nda fetika oku linga olohundo viowiñi olosemana viosi, loku imba ovisungo Viusoma lekuatiso lioviyola.” Noke liunyamo umosi, va limbuka okuti ocimunga citito ceya oku linga ekongelo lia kuata 24 kakundi. Omo liaco, manji Gregorio wa popia hati: “Ocisola vamanji va lekisa ca vokiya esanju lietu.” Omo okuti papita ale anyamo epandu tunde eci manji Gregorio lukãi waye va ilukila kocikanjo caco, va popia vati: “Tua kuata esanju lialua poku mola ndomo omanu tua kundila va fetika oku tiamẽla kekongelo liaco. Cilo, tua limbuka okuti omuenyo wetu ukuete esilivilo.”

Cisoka 3.000 ya vamanji kofeka yo Filipina, va siata oku ilukila kovikanjo vina okuti ka kuli akundi valua Vusoma. Pokati kavo pakala eci cisoka 500, vamanji akãi okuti ka va kuelele. Tu kũlĩhĩsi ulandu wa manji Karen.

Manji Karen okuti wa kulila volupale luo Baggao Cagayan, cilo o kuete eci ci pitãhala 20 kanyamo. Eci a kala umalẽhe, waenda oku sokolola eci catiamẽla koku ka kundila kovikanjo vikuavo. Eye wa popia hati: “Omo okuti esulilo lioluali lulo li kasi ocipepi, kuenda omanu vosi va sukila oku yeva esapulo Liusoma, nda nõlapo oku ka kundila kovikanjo vina kusukila akundi.” Ndaño vamue vakuepata liaye vo vetiya oku lilongisila kosikola ya pita pokati okuti kaendi kimbo limue li kasi ocipãla oco akundile omanu, pole, wa likutilila ku Yehova oco o kuatise. Eye wa sapelavo lavamanji va kala oku kundila vocikanjo caco. Eci a tẽlisa 18 kanyamo wa ilukila vocikanjo ci kasi ocinãla cisoka 64 kolokilometulu oku tunda volupale a kala.

Ekongelo litito manji Karen a ilukila, lia kala pokati kolomunda Kohulo yokalunga ko Pasifiku. Manji Karen wa popia hati: “Oku tunda volupale luo Baggao, toke vekongelo liokaliye, tu sukila oku linga ungende woloneke vitatu loku pita volomunda kuenda oku yoka olondui ci pitahãla akũi atatu kolonjanja.” Eye wa amisako hati: “Oco ndi pitĩle kolonjo viomanu vamue nda kala oku longisa Embimbiliya, nda sukilile oku enda olowola epandu. Noke ndi lala kolonjo viavo, kuenje keteke likuavo, ngenda vali olowola epandu oco ndi tiukile konjo.” Anga hẽ wa sukilile muẽle oku likolisilako? Wa sukilile, momo wa popia hati: “Ndaño okuti nda yevaile ekavo, pole, ndaenda oku longisa Embimbiliya kueci ci soka 18 komanu. Cilo, ‘nda limbuka okuti Yehova uwa’!”—Osa. 34:8.

Manji umue ukãi o tukuiwa hati Sukhi okuti ka kuelele haeye o kuete ci pitahãla 40 kanyamo, wa kala ko Estados Unidos. Nye co vetiya oku ilukila kofeka yo Filipina? Kunyamo wo 2011, wa endele kohongele yimue yimbo kua kala manji umue lukãi waye va pulisiwa. Ovo va lombolola ndomo va landisa ovikuata viavo, oco va ilukile ko Mesiku oku ka kuatisa kupange woku kunda. Manji Sukhi wa popia hati: “Eci nda yeva vamanji va pulisiwa ca ndi vetiya oku sokolola ovimaho sia tẽlisile.” Omo okuti manji Sukhi epata liaye lio ko India, eci a limbuka okuti kofeka yo Filipina kua kala omanu va vangula elimi lio Punjabi, wa nõlapo oku ilukila kofeka yaco. Anga hẽ wa liyaka lovitangi?

Manji Sukhi wa popia hati: “Ka ca lelukile oku nõla ovikuata ndi seleka levi ndi landisa. Omo okuti nda kala 13 kanyamo vonjo yange ya posoka, ndeya oku iluka kumue lepata liange kuenje tua kala vonjo yimue yitito. Ndaño okuti ka ca lelukile oku kala vonjo yitito, pole, ca ndi kuatisa oku lipongiya oco ndi leluise omuenyo wange.” Ovitangi vipi a liyaka lavio noke yoku ilukila kofeka yo Filipina? Eye wa popia hati: “Nda liyaka locitangi coku kuatela usumba ovinyama, kuenda ongeva yoku tiukila konjo.  Pole, nda lilongisa oku kolela ku Yehova kovina viosi!” Anga hẽ ca lelukile oku liyaka locitangi caco? Manji Sukhi wa popiavo ndoco: “Yehova o kasi oku tu sapuila hati: ‘Ndi seteki nda si eci kokuene asumũlũho alua.’ Nda kuata lika elomboloko liolondaka evi eci nda kundila ukãi umue wa ndi pulisa hati: ‘Eteke lipi o tiuka vali? Ndi kuete ovina vialua ndi yongola oku ku pulisa.’ Nda kuata esanju lialua poku yeva olondaka viaco, omo lionjongole yoku kuatisa omanu va yongola oku lilongisa ovina viatiamẽla ku Yehova!” (Mal. 3:10) Manji Sukhi wa amisako lulandu waye hati: “Ka ca lelukile oku nõlapo onjila yoku ilukila kofeka yikuavo. Pole, noke yoku iluka nda komõha calua poku limbuka ndomo Yehova a ndi kuatisa oku nõla onjila yaco.”

Manji umue o kuele o tukuiwa hati Sime, eci a kuata ci pitahãla 30 kanyamo, wa tunda kofeka yo Filipina oco a ka talavaye kupange umue a fetiwa olombongo vialua kofeka yimue yo Kutundilo. Osimbu a kala kofeka yaco, wa kuatisiwa la manji ukuakunyula akongelo. Noke wa kuatisiwavo lohundo ya lingiwa la manji umue watiamẽla Kosungu Yolombangi Via Yehova. Ovina viaco vio vetiya oku pitisa kovaso ocipango ca Yehova. Eye wa popia hati: “Nda sumuile calua omo lioku siapo upange wange.” Omo liaco, wa nolapo oku siapo upange waco, kuenje wa tiukila kofeka yo Filipina. Cilo manji Sime kumue lukãi waye Haidee, va kasi oku kundila volupale luo Davao del Sur, kombuelo yofeka yavo vocikanjo cimue ci kuete ekambo liakundi Vusoma. Eye wa amisako hati: “Ngeca olopandu omo lioku yula usumba woku siapo upange wange oco ndi pitise kovaso ocipango ca Yehova. Omo liaco, oku linga ocipango ca Yehova, oco ci nena esanju lia velapo komuenyo!”

Manji Ramilo lukãi waye Juliet, okuti akundi votembo yosi, eci va tẽlisa ci pitahãla 30 kanyamo, va limbuka okuti, ekongelo limue lia kala ocinãla ci soka 30 kolokilometulu, oku tunda volupale luavo, lia sukilile ekuatiso. Kuenje, va lieca olumue oco va kuatise ekongelo liaco. Ndanõ kuli ombela ale utanya walua, pole, manji Ramilo kumue lukãi waye, olosemana viosi va enda oku linga ungende lomoto yavo oco va kale kolohongele kuenda kupange woku kunda. Ndaño va liyaka lovitangi vioku pita vatapalo mue yuka ovikulungu, loku yoka olondui vi kuete ayau apangiwa lovikolo, pole, va kuata esanju omo lioku kundila olondaka viwa vocikanjo caco. Omo liaco, manji Ramilo wa popia hati: “Ame kumue lukãi wange tu kasi oku longisa Embimbiliya kueci ci soka 11 komanu! Oku likolisilako oku kundila olondaka viwa vocikanjo caco, ca tu nenela esanju lialua!”—1 Va Kor. 15:58.

Anga hẽ o yongola oku kũlĩha ovina viatiamẽla kovikanjo kuli ekambo lia kundi Vusoma vofeka yene ale vofeka yikuavo? Nda o kuete onjongole yaco, sapela lamanji ukuakunyula akongelo, kuenda tanga ocipama ca sandekiwa Vupange Wetu Wusoma wosãi Yenyenye, yunyamo wo 2011 losapi hati: “Ove hẽ o Pondola ‘Oku Enda ko Makedonia’?”