VA Isareli va solaile calua ovisungo. Embimbiliya olonjanja vialua li tukula omanu va enda oku sika ovikuata viovisikilo kuenda oku imba ovisungo. Ocili okuti, onepa yalua Yembimbiliya ovisungo. Ndeci, elivulu Liolosamo, Liocisungo ca Salomone kuenda Liasiõsuĩlo via sonehiwa ndovisungo. Elivulu limue li vangula catiamẽla komuenyo womanu kotembo Embimbiliya lia sonehiwa, li popia hati: “Embimbiliya li lekisa lutate okuti va Isareli va enda oku talavaya lovisungo kolonepa vialua viomuenyo wavo.”

Ovisungo vomuenyo weteke leteke. Va Isareli va enda oku sika ovikuata viovisikilo kuenda oku imba ovisungo oco va situlule ovisimĩlo viavo. (Isa. 30:29) Akãi va enda oku sika lolopandelu, oku imba ovisungo viesanju kuenda oku piluka osimbu va sambiliya ndeci, koku tumbikiwa kuosoma yimue yokaliye, eci asualali va enda oku yula uyaki umue kuenda kovipito viefendelo. (Olong. 11:34; 1 Sam. 18:6, 7; 1 Olos. 1:39, 40) Va Isareli va endavo oku imba ovisungo oco va situlule esumuo liavo eci omunu umue a fa. (2 Asa. 35:25) Ka kuli atatahãi va Isareli va solaile calua ovisungo!

Ovisungo Velombe lia Soma. Olosoma vio Isareli, via solaile calua oku yevelela ovisungo. Soma Saulu wa vilikiya Daviti kelombe liaye oco Daviti o sikile ohalupa. (1 Sam. 16:18, 23) Noke, eci Daviti a linga osoma, eye muẽle wa sovola ovikuata viovisikilo, wa soneha ovisungo via posoka kuenda wa sokiya ocimunga cimue colonjimbi ca enda oku sikila vonembele ya Yehova. (2 Asa. 7:6; Amo. 6:5) Soma Salomone wa kuatele olonjimbi vialume kuenda olonjimbi viakãi velombe liaye.—Uku. 2:8.

“Va Isareli va enda oku imba ovisungo poku fendela Yehova.” Ci soka 4.000 kalume va enda oku sika ovikuata viovisikilo vonembele ko Yerusalãi. (1 Asa. 23:5) Ovo va enda oku sika olosimbalu, ovikuata viovisikilo via pangiwa lovikolo, olohalupa kuenda alumbeta. (2 Asa. 5:12) Pole, olonjimbi evi via loñoloha, havioko lika via enda oku fendela Yehova lovisungo. Va Isareli valua va enda oku imba ovisungo osimbu va linga ungende woku enda ko Yerusalãi oku ka sambiliya ovipito. Ovisungo viaco via enda oku tukuiwa okuti Ocisungo Covongende. (Osa. 120–134) Ndomo ci likuata lovisonehua via va Yudea, va Isareli va enda oku imba vimue pokati Kolosamo a vokuenda kuocipito co Paskoa.

Ovisungo handi vi kuete esilivilo lialua kafendeli va Yehova koloneke vilo. (Tia. 5:13) Etu tu imbila Yehova ovisungo momo vi panga onepa kefendelo lietu. (Va Efe. 5:19) Poku imbila Yehova ovisungo kumosi la vamanjetu, tu liyeva okuti tu kasi vomunga. (Va Kol. 3:16) Eci tu imba, tu sika, loku yevelela ovisungo viatiamẽla ku Yehova, tu vetiyiwa kuenda tu tẽla oku pandikisa ciwa kovitangi. (Ovil. 16:25) Ovisungo onjila yimue ya posoka yoku lekisa ekolelo lietu ku Yehova kuenda ocisola cetu kokuaye.