Ove wa Lalekiwa Locisola

ECI o pita ocipepi Lonjango Yusoma Yolombangi Via Yehova posongo yene, pamue o li pula eci ca siata oku pita vokati kaco. Anga hẽ wa kũlĩha ale okuti omunu lomunu o pondola oku enda kolohongele vi lingiwilamo osemana losemana? Omo liaco, tu ku laleka locisola oku iya kohongele.

Ove pamue o li pula ndoco: Momo lie Olombangi Via Yehova via siatela oku liongolola? Nye ca siata oku pita kolohongele viaco? Kuenda nye omanu vana va nyula Onjango Yusoma okuti Halombangiko Via Yehova va siata oku popia catiamẽla kolohongele evi?

“Ongolola Omanu”

Tunde nunde, omanu va siata oku liongolola ha va fendela loku lilongisa ovina viatiamẽla ku Suku.Va Isareli va va vetiyile oku liongolola okuti tunde apa elaleko liaco lia lingiwa, pa pita ale ci soka 3.500 kanyamo. Elaleko liaco liti: “Ongolola omanu vosi, okuti alume lakãi lomãla, lovingendeleyi vi kasi vovaimbo ove, okuti va yevelela loku lilongisa oku sumbila Yehova, Suku yene, kuenje va panga oku tẽlisa lutate olondaka viosi viocihandeleko cilo.” (Esinumuĩlo 31:​12) Ocili, va Isareli, akulu lomãla va handelekiwile oku fendela kuenda oku pokola ku Yehova Suku.

Kovaso yanyamo alua, noke yoku tumbika ekongelo Liakristão olohongele via kala ocina cimue ca velapo kefendelo liocili. Upostolo Paulu wa soneha hati: ‘Tu livetiyi pokati loku kala locisola lovilinga viwa. Ka tu ka liweki oku ongoloka ndomo vamue va lingainga, puãi tu likuatisi pokati.’ (Va Heveru 10:​24, 25) Ndeci ci pita vepata okuti nda omunu lomunu o likolisilako oku kala otembo yalua pamosi la vakuavo li pamisiwa, cimuamue haico ci pita la vana va yongola oku vumba Suku okuti, eci va kala pamosi kefendelo va pamisiwavo.

Poku kuama onumbi eyi, Olombangi Via Yehova via siata oku liongoluila Vonjango Yusoma olonjanja vivali vosemana. Olohongele vi kuatisa omanu oku kuata elomboloko liolonumbi Viembimbiliya loku vi kapako vomuenyo wavo. Olohongele viaco, via siata oku lingiwa koluali luosi kuenda ohongele lohongele yi kuete ocimãho cimue konepa yespiritu. Kefetikilo kuenda kesulilo vana va kasi kohongele va “likolisa pokati” poku sapela la vakuavo. (Va Roma 1:​12) Nye ca siata oku longisiwa kolohongele viaco?

Ohundo Yembimbiliya

Onepa yatete kohongele okuti omanu valua va yi yevelela, ohundo yopiwa Vembimbiliya yi tukuiwa hati, ohundo yowiñi ya siata oku lingiwa kesulilo liosemana. Yesu wa lingaile olohundo poku longisa omanu valua, ca piãla enene Kohundo a lingila Komunda. (Mateo 5:1; 7:​28, 29) Upostolo Paulu wa kundila omanu vo ko Atenai. (Ovilinga 17:​22-​34) Olombangi via Yehova via siata oku kuama onjila yimuamue poku linga ohundo yowiñi, okuti omanu vamue pamue oyo onjanja yatete va yeva ohundo yaco.

Ohongele yi fetika locisungo ci sangiwa velivulu li tukuiwa hati Cantemos Louvores a Jeová. * Vosi va yongola oku ci linga va lalekiwa lesanju. Noke yohutililo, ulume umue wa loñoloha o linga ohundo vokuenda kuakukutu 30. (Tala okakasia losapi hati “Esilivilo Liohundo Yowiñi.”) Ohundo yaco ya kunamẽla Vembimbiliya. Hundi o laleka olonjeveleli olonjanja vialua, oku tala ovisonehua kuenda oku kuama oku tangiwa kuovinimbu. Citava okuti ove o kuete ale Embimbiliya liove. Pole nda ku kuete, eci handi ohongele ka ya fetikile, vangula la umue Ombangi ya Yehova, oco a ku ĩheko Embimbiliya.

Elilongiso Liutala Wondavululi

Vakongelo alua, Olombangi Via Yehova,  noke yohundo yowiñi, ku lingiwa elilongiso Liutala Wondavululi, li lingiwa lapulilo kuenda atambululo kuenda olio li konomuisa etosi limue lia velapo Liembimbiliya. Ohongele yaco, yi vetiya olonjeveleli oku kuama ongangu ya va Berea va kala koloneke viupostolo Paulu, vana “va yeva ondaka lombili kuenje, oloneke viosi, va tanga tanga ovisonehua oku kũlĩhisa nda he ovina viaco viocili nda ndati.”​—⁠Ovilinga 17:⁠11.

Elilongiso Liutala Wondavululi li fetika locisungo. Ovina viosi omanu va lilongisa kuenda apulilo a lingiwa lusongui, vi sangiwa vocipama caco. Citava okuti o pinga ku umue Ombangi ya Yehova o revista mu sangiwa ocipama celilongiso liaco. Vimue pokati kovina viokaliye via longisiwa, vievi: “Ene Alonjali Pindisi Omãla Vene Locisola,” “Ko Ka Fetuluinyi Umue Cĩvi Leci Cĩvi” kuenda “Ohali Yosi Ndopo Yipua.” Ndaño okuti usongui o linga apulilo a sonehiwa kuenda olonjeveleli vieca atambululo a kasi vocipama, pole omanu ka va kisikiwa oku tambulula. Ovo va ci linga lesanju kuenda poku eca atambululo tete va lipongiya kuenda va kũlĩhisa ovisonehua via tukuiwa vocipama. Ohongele yi malusuiwa locisungo kuenda ohutililo.​—⁠Mateo 26:30; Éfeso 5:⁠19.

Elilongiso Liembimbiliya Vekongelo

Vokati kosemana, Olombangi Via Yehova vi liongolola oku konomuisa olonepa vitatu vi lingiwa vokuenda kuowola kuenda 45 kakukutu. Onepa yatete kohongele yaco, Elilongiso Liembimbiliya Vekongelo, li lingiwa vokuenda kua 25 kakukutu. Elilongiso liaco li kuatisa omanu oku kũlĩha ciwa Embimbiliya loku pengulula ovisimĩlo viavo lovituwa oco va linge olondonge viocili via Kristu. (2 Timoteo 3:​16, 17) Elilongiso liaco li lingiwa lapulilo kuenda atambululo ndeci ci lingiwa elilongiso Liutala Wondavululi. Ava va eca atambululo va ci linga lesanju kuenda ka va kisikiwa. Elilongiso  Liembimbiliya li lingiwa lekuatiso lielivulu limue ale lo brochura ya sandekiwa Lolombangi Via Yehova.

Momo lie alivulu aco a siatela oku longisiwa kolohongele? Ndeci ca pita kosimbu, oku tanga lika Ondaka ya Suku ka ca kuatisile enene omanu oku kuata elomboloko. Ca sukilile oku lombolola loku eca elomboloko okuti eci omanu va tanga, “ci va lomboloka [ciwa.]” (Nehemiya 8:⁠8) Koloneke vilo, alivulu a lombolola ovitumasuku vi sangiwa velivulu lia Isaya, lia Daniele kuenda Liesituluilo a siata oku kuatisa omanu kolohongele oku kuata elomboloko liwa Liembimbiliya.

Osikola Yupange Wakristão

Noke yelilongiso Liembimbiliya Vekongelo, ku lingiwa Osikola Yupange Wakristão. Oyo yi lingiwa vokuenda kuakukutu 30. Osikola yaco, ya angiliyiwila oku kuatisa Akristão oco va kuate ‘uloño woku longisa.’ (2 Timoteo 4:⁠2) Ndeci, nda okuti o kuete omõla ale ekamba liove li ku pulisa ovina viatiamẽla ku Suku pamue Vembimbiliya, anga hẽ wa siata oku kuata ocitangi coku u tambulula? Osikola Yupange Wakristão yi pondola oku ku kuatisa oku eca atambululo asuapo lekuatiso Liembimbiliya. Vosi yetu tu pondola oku popia nduprofeto Isaya wa linga hati: “Ñala Yehova wa nyĩha elimi liuloño ndokuti nẽla oku kolisa lolondaka u wa kava.”​—⁠Isaya 50:⁠4.

Osikola Yupange Wakristão yi fetika lonepa yimue ya kunamẽla Vembimbiliya okuti yi vetiya olonjeveleli oku li pongiya vokuenda kuosemana eci handi eteke liaco ka lia pitĩlilepo. Noke hundi o laleka olonjeveleli oku lombolola ovina va lilongisa vokuenda kuosemana okuti vopako esilivilo lialua. Noke olondonge vina via li sonehisa kosikola yupange Wakristão, vi linga olonepa viavo.

Olondonge viaco vi nõliwa oku tanga onepa yimue Yembimbiliya kembumbua ale vi linga ocindekaise ndomo tu lomboluila Ocisonehua omunu umue. Noke yonepa lonepa usongui wosikola eca olonumbi lalungulo kolondonge, lekuatiso lielivulu Kuatisiwa Losikola Yupange Wakristão poku va lekisa apa va sukila oku linga  apongoloko. Noke eca olonumbi vimue komunu lomunu pulika.

Ohongele yaco ka yi kuatisa lika vana va kuata onepa kosikola, pole yi kuatisavo olonjeveleli oku kuata uloño woku tanga, oku sapela, kuenda oku longisa omanu lulelu. Eci Osikola Yupange Wakristão yi malusuiwa, ku imbiwa ocisungo ca sevetiwa Vembimbiliya, noke ku lingiwa Ohongele Yupange.

Ohongele Yupange

Onepa ya sulako, Ohongele Yupange. Oyo yi lingiwa ndohundo, lovindekaise, loku pulisa omanu, kuenda olonjeveleli oku kũlĩha ciwa ocili Cembimbiliya. Eci handi Yesu ka tumile olondonge viaye kupange woku kunda, wa vongolola kuenda wa va ĩha olonumbi. (Luka 10:​1-​16) Omo okuti wa va pongiyile oco va kunde esapulo liwa, ovo va kuata esanju lialua kuenda ovolandu awa. Noke va tiuka kokuaye oku u sapuila ovina a va tuma. (Luka 10:​17) Olonjanja vialua olondonge via enda oku sapuila vakuavo ovolandu avo.​—⁠Ovilinga 4:23; 15:⁠4.

Ovipama vi lingiwa Kohongele Yupange vi sangiwa vokokanda ka tukuiwa hati Upange Wetu Wusoma. Okokanda kaco ka siata oku kuamiwa vokuenda kuosãi kuenda ohongele lohongele yi lingiwa vokuenda kuakukutu 35. Ovina vimue tua siata oku lilongisa vievi: “Oku Fendela Yehova Kumosi Lepata,” “Esunga Lieci tu Tiukililako Olonjanja Viosi,” kuenda “Tu Setukuli Kristu Kupange Woku Kunda.” Ohongele yaco, yi malusuiwa locisungo kuenda ulume umue wo vekongelo wa nõliwa o linga ohutililo ya sulako.

Ceci Omanu va Nyula va Siata Oku Popia

Vosi vekongelo va sukila oku likolisilako oku yolela vana veya onjanja yatete. Ndeci, ulume umue o tukuiwa hati, Andrew wa enda oku yeva ovina vĩvi viatiamẽla Kolombangi Via Yehova. Pole eci a enda onjanja yatete kohongele, eye wa komõha calua ndomo omanu a sanga vo yolela. Eye wa popia hati, “Ocitumãlo caco caposoka calua. Ame nda komõha ndomo omanu va lekisa ocisola kokuange kuenda ndomo va ndi tata.” Ufeko umue o tukuiwa hati, Ashel wo kofeka yo Kanada wa popia ndoco, “Olohongele viaco via fina calua! Kuenda ca leluka oku kuata elomboloko liovina vi longisiwa.”

Ulume umue woko Brazil o tukuiwa hati, José wa kũlĩhiwile ndomunu umue wa tema calua posongo yavo. Pole wa lalekiwa oku enda kohongele Vonjango Yusoma. Eye wa popia hati, “Ndaño okuti nda kũlĩhĩwile ndomunu umue ũvi, omanu vosi nda sanga Vonjango Yusoma va ndi yolela lesanju lialua.” Ulume umue wo kofeka yo Japãu o tukuiwa hati, Atsushi wa popia hati: “Eci nda endele onjanja yatete kohongele Yolombangi Via Yehova,, nda yeva osõi yalua. Pole, ndaño ndoco, omanu vaco va lianjele lame. Ovo va ndi kuatisa oku li yeva ciwa.”

Tu ku Yolela Locisola

Ovolandu omanu tua tukula ndeti, a lekisa okuti vana va endaenda kolohongele Vonjango Yusoma va siata oku kuata asumũluho alua. Ove oka lilongisa ovina viatiamẽla ku Suku, kuenda lekuatiso Liembimbiliya, Yehova Suku oku “longisa eci cu ku kuatisa.”​—⁠Isaya 48:⁠17.

Oku iñila Vonjango Yusoma Yolombangi Via Yehova, ocali kuenda ka ku pingiwa ovilumba. Anga hẽ o yongola oku enda kohongele Vonjango Yusoma pocitumãlo cene? Omo liaco tu ku laleka lesanju oku ci linga.

[Atosi pombuelo yamẽla]

[Okakasia kemẽla 30]

Esilivilo Liohundo Yowiñi

Kuli eci ci soka 170 kolohundo vi lombolola Ovisonehua. Vimue pokati kolohundo viaco vievi:

◼ Oku Kũlĩha Oku Tua Tunda ci Kuete Esilivilo Lie?

◼ Ocihandeleko ca Suku Catiamẽla Kovimatamata Viuyali Kuenda Kolohuela

◼ Oku Nyõla Ilu Lieve Kuka Wengula Onyeño ya Suku

◼ Ndomo tu Liyaka Lasakalalo Omuenyo

◼ Anga hẽ Omuenyo Ulo Owo Lika?

[Elitalatu kemẽla 30]

Ohundo Yembimbiliya

[Elitalatu kemẽla 30]

Elilongiso “Liutala Wondavululi”

[Elitalatu kemẽla 31]

Elilongiso Liembimbiliya Vekongelo

[Elitalatu kemẽla 31]

Osikola Yupange Wakristão

[Elitalatu kemẽla 32]

Ohongele Yupange