Catiamẽla Komuenyo Wepata

Ceci Tu Lilongisa Ku Yesu

Ovisimĩlo vipi viatiamẽla kolohuela vi nena esanju vepata?

Olohuela elitokeko limue li kola. Eci Yesu vo pula catiamẽla kocitangi ci pondola oku tepa olohuela, wa popia hati: “Ka wa tangeli okuti kefetikilo usovoli wa va lulika ulume lukãi? Kuenda wamisako vali hati, Oco ulume osia isiaye la inaye, o likakatela lukãi waye, kuenje kavali kavo va linga etimba limuamue. Oco ka va lingi vali omanu vavali, puãi va linga omunu umosi. Oco eci ca tokekisa Suku omunu ka ka ci tepise. ... Wosi o nyala ukãi waye, nda halondaka yoku pekelisako, kuenje o kuela ukãi ukuavo, o linga ukahonga.” (Mateo 19:4-6, 9) Nda olohueli vi pokola kelungulo lia Yesu loku likolela pokati, vosi vepata va liyeva okuti va kolapo kuenje va kuata esanju.

Momo lie oku sola Suku ci kuatisila apata oku kuata esanju?

Yesu wa popia hati: “Sola [Yehova] Suku yove lutima wove wosi lomuenyo wove wosi lolondunge viove viosi. Eci oco ocihandeleko cinene, haico catete.” Cipi ocihandeleko cavali cinene? Yesu wa popia hati: “Sola u o lisungue love [oku kongelamo vakuepata liove] ndeci o lisole ove muele.” (Mateo 22:37-39) Omo liaco, oco apata a kale lesanju va sukila oku kuata ukamba wocili la Suku, momo oku lekisa ocisola kokuaye ci tu vetiyavo oku sola vakuetu.

 Alume kumue lakãi vavo va pondola ndati oku likuatisa pokati oco va kuate esanju?

Alume va pondola lika oku sanjuisa akãi vavo poku kuama ongangu ya Yesu. Eye omo liocisola a kuatela ukãi waye wocindekaise okuti ekongelo, wa pesela omuenyo waye. (Va Efeso 5:25) Yesu wa popia hati: “Mõlomanu keyilile oku vumbiwa, te oku vumba.” (Mateo 20:28) Yesu lalimue eteke a lekisile ungangala ale oku tata lãvi omanu vana a kala oku songuila, pole, wa va kavuluisa. (Mateo 11:28) Omo liaco, alume va sukila oku songuila epata liavo locisola oco vosi va kuatisiwe.

Akãi va pondolavo oku kuatisiwa longangu ya Yesu. Embimbiliya li popia hati: “Utue wa Kristu Suku.” Olio li popiavo hati: “Utue wukãi ulume waye.” (1 Va Korindo 11:3) Yesu lalimue eteke a li tendele okuti ka kuete esilivilo omo lioku pokola ku Suku. Eye wa lekisa esumbilo liocili ku Isiaye. Yesu wa popia hati: “Ndingainga ño-o ovina viu sanjuisa.” (Yoano 8:29) Ukãi wosi o pokola kulume waye, o lekisa ocisola lesumbilo ku Suku oco va kuate esanju vepata.

Nye olonjali vi lilongisa ku Yesu ndomo a tendele omãla?

Yesu wa sanda otembo yoku kala lomãla kuenda oku yevelela ovisimĩlo viavo. Embimbiliya li popia hati: “Yesu oku va kovonga, wa linga hati, Otumãla tuiye kokuange.” (Luka 18:15, 16) Eteke limue, omanu va sepula omãla va kala oku vangula catiamẽla kekolelo liavo va kuatela Yesu. Pole, Yesu wa pandiya omãla loku sapuila omanu vaco hati: “Ka wa la tangi olondaka evi viokuti, Kovimẽla viomãla lotuñaña ove wopako esivayo liocili?”—Mateo 21:15, 16.

Nye omãla va pondola oku lilongisa ku Yesu?

Yesu wa sia ongangu yiwa komãla yoku kapako ovina viespiritu. Eci a kuata ci soka 12 kanyamo, “vo sanga vonembele, wa tumala pokati kalongisi oku va yevelela loku va pula pula.” Nye ceyililako? “Vosi vo yeva va komoha olondunge viaye latambululo aye.” (Luka 2:42, 46, 47) Ocili okuti, ukũlĩhĩso waco ka wo vetiyile oku li velisapo. Pole, wo vetiya oku sumbila olonjali viaye. Embimbiliya li popia hati: “[Yesu] wa pokoyola kokuavo.”—Luka 2:51.

[Elitalatu kemẽla 16]

Oco o kuate alomboluilo akuavo, tanga velivulu Embimbiliya li Longisa Nye? kocipama 14. a

[Etosi pombuelo yemẽla 16]