Kuata Ukamba la Suku

Yehova o tu Ĩha Elianjo Lioku Nõla Esinumuĩlo 30:11-20

UKÃI umue Ukristão, wa popia hati: “Nda kuatele usumba wokuti, ndika lueyela Yehova.” Ukãi waco, omo liovina vĩvi a enda oku linga vutila waye, wa kuatele ohele yokuti oka lueya vali. Anga hẽ, tu kasivo oku liyaka locitangi caco? Tu sukila hẽ, oku kuata ohele yokuti eteke limue tuka lueyavo? Sio. Yehova Suku wa tu ĩha ombanjaile yoku linõlela eci tu yongola oku linga. Omo liaco, tu pondola oku nõla ndomo tu ambata omuenyo wetu. Yehova o yongola okuti tu nõla onjila ya sunguluka, kuenda Ondaka yaye, Embimbiliya, yi tu sapuila ndomo tu cilinga. Kũlĩhĩsa olondaka via Mose vi sangiwa kelivulu Liesinumuĩlo kocipama 30.

Anga hẽ, ca tĩla oku kũlĩha eci Suku a yongola kokuetu kuenda oku linga ocipango caye? a Mose wa popia hati: “Ocihandeleko cilo ñasi loku ku ĩha etaili ka ca ku kãlẽlẽle, ka ci kasi kupãla.” (Ocinimbu 11) Yehova ka kisika oku linga ocina ca tĩla. Ovihandeleko viaye via sunguluka kuenda via leluka. Handi vali, citava oku vi kũlĩha ciwa. Oco tu kũlĩhe ovina Suku a yongola kokuetu, ka tu sukila oku ‘londa kilu,’ ale oku ‘yokila kesinya likuavo liokalunga.’ (Ovinimbu 12, 13) Embimbiliya li tu sapuila ciwa ndomo tu sukila oku ambata omuenyo wetu.—Mika 6:8.

Yehova ka tu kisika oku pokola kokuaye. Mose wa popia hati: “Etaili nda ku kapela omuenyo luwa, kuenda okufa lũvi.” (Ocinimbu 15) Omo liaco, tu kuete elianjo lioku nõla pokati komuenyo ale olofa, uwa ale uvĩ. Tu pondola oku nõla oku fendela Suku kuenda oku pokola kokuaye loku tambula asumũlũho ale tu nõla oku u sinila kuenda oku liyaka kovitangi vi yililako. Tu kuete elianjo lioku nõla ovina evi.—Ovinimbu 16-18; Va Galatia 6:7, 8.

Anga hẽ, Yehova wa kapako onjila yosi tu nõla komuenyo wetu? Ocili okuti wa kapako! Mose lekuatiso liespiritu sandu wa popia hati: “Nõla omuenyo.” (Ocinimbu 19) Tu pondola ndati oku nõla omuenyo? Eye wamisako hati: “Sola Yehova, Suku yove, loku pokola kondaka yaye loku likakatela laye.” (Ocinimbu 20) Nda tua sola Yehova, tuka pokola kokuaye loku likakatela kokuaye ndaño lovitangi. Poku linga ovina evi, tu lekisa okuti tua nõla omuenyo, momo eyi oyo onjila ya velapo yeca elavoko lioku kala otembo ka yi pui voluali luokaliye lua Suku luna lu laika oku iya.—2 Petulu 3:11-13; 1 Yoano 5:3.

Olondaka via Mose, vi tu longisa ocina cimue ci lembeleka. Ndaño okuti ove, o liyaka lovitangi vialua voluali lulo lũvi, ka ci lekisa okuti ku kuete ekuatiso, ale oka amamako lovitangi viaco. Yehova wa ku sumũluisa lombanjaile yoku linõlela ovina oyongola oku linga. O pondola oku nõla oku sola Yehova, loku pokola kokuaye, kuenda oku amamako oku u kolela. Nda wa nõla onjila yaco, Yehova oka sumũluisa alikolisilo ove.

Ondaka eyi yokuti tu kuete elianjo lioku nõla oku sola Yehova loku u vumba, ya lembeleka ukãi una wa tukuiwa kefetikilo liocipama cilo. Eye wa popia hati: “Nda nõlapo oku sola Yehova. Olonjanja vimue nda siata oku ivalako oku sokolola okuti ocisola cange ku Yehova oco ca velapo. Omo liaco, nda nõlapo oku kolela kokuaye.” Lekuatiso lia Yehova, o pondolavo oku cilinga.

[Etosi pombuelo yemẽla]