Nda citiwila volupale luo Moundsville. Olupale luaco lua posoka calua, hailuo lu kasi kohulo Yolui Ohio, konano yocivanja co West Virginia. Ame ndimõla wavali pokati komãla vakuãla okuti, vatatu alume. Olonjanja vimue, ka tua kuataile ovina tu sukila konjo yetu. Pole, olonjali viange via lingainga upange walua, via kala vakuacili, kuenda via kuatela ocisola omanu. Ndaño ka tua kuatele olombongo vialua, tua enda oku landa ovina tu sukila. Omo okuti olonjali viange via kala Olombangi Via Yehova, via ndi longisa oku kapako olonumbi Viembimbiliya eci nda kala omõla.

Pole, osimbu nda kala oku kula, utima wange wa fetika oku tinduka kovina nda lilongisa vutila. Nda kuata atatahãi vokuti, olonumbi Viembimbiliya ka vi pondola oku ndi nenela esanju. Kuenje, nda fetika oku sima okuti, oku linga ovina ndi yongola oco ci nena esanju liocili komuenyo. Noke nda liwekapo oku endaenda kolohongele. Vamanjange vavali, va kuamavo esino liange. Ndaño okuti olonjali vietu via likolisilako oku tu kuatisa, tua likala ekuatiso liavo.

Sia kũlĩhĩle okuti elianjo liaco lia laikele oku ndi nenela ovitangi. Eteke limue osimbu nda kala oku enda kosikola, umue ekamba liange wa nyĩha osikalu, kuenje nda tava. Tunde keteke liaco, nda fetika oku kuata ovituwa vialua vi nyõla uhayele. Vokuenda kuotembo, nda litumbika koku sipa eliamba lovihemba vikuavo vi vihĩsa calua olondunge, kuholua, kuenda kupuepue. Noke, nda fetika oku nyua olodroga vi nyõla calua olondunge kuenje, nda linga upika wavio. Omo ocituwa coku nyua olodroga ca li vokiyile enene, nda fetika oku landisa olodroga oco olombongo viaco vi ndi kuatise.

Olonjanja vimue, utima wange wa enda oku ndi vetela calua evelo loku sima okuti, ovina nda kala oku linga ka via sungulukile, pole, sia kapeleko ovisimĩlo viaco. Nda simĩle okuti, omo nda livĩhisa ale, si pondola vali oku kuata ekalo liwa. Ndaño nda endaile lakamba vange kovipito, nda kala ndu okuti, ndi kasi ulika kuenje, ca ndi nenela esumuo. Noke, nda fetika oku sokolola ndomo olonjali viange via kuata ekalo liwa, kuenda ndomo nda yapuisiwa.

Ndaño nda simĩle okuti si pondola vali oku pongolola omuenyo wange, haimo lumue omanu vakuavo ka va kuatele ovisimĩlo viaco. Kuenje, kunyamo wo 2.000, olonjali viange via ndi laleka oku enda kohongele yofeka Yolombangi Via Yehova. Nda susõha oku enda kohongele yaco. Pole, eci nda pitĩlako, nda komõha poku lisanga la vamanjange vavali.

Osimbu tua kala kohongele, nda limbuka okuti, kocitumãlo caco oko kua lingiwilile olomiluko vio rock, unyamo wa pita. Pole, pa kala etepiso limue lia ndi komõhisa calua. Kocipito colomiluko, ocitumãlo caco ce yukile olosisi viokulia kuenda olosikalu. Valua pokati ka vakuavisikilo va lisuvukile, kuenda olondaka va tukola vovisungo viavo, ka via sungulukile. Pole, kohongele Yolombangi Via Yehova, nda kala pokati komanu vakuacili haivo va sanjuka, kuenda va ndi yolela ndu okuti va ndi kũlĩhĩle ale. Ocitumãlo caco ca yelisiwile ciwa, kuenda esapulo liavo li nena elavoko. Nda limbuka okuti, Embimbiliya li kuatisa omanu oku kala ciwa, kuenje, nda livela omo lioku siapo olonumbi Viondaka ya Suku.​—Isaya 48:17, 18.

Noke yohongele, nda nõlapo oku tiuka vekongelo. Vamanjange vavali va vetiyiwa lovina va mola kohongele, kuenje, va nõlapovo oku tiuka. Katatu ketu, tua tava oku lilongisa Embimbiliya.

Olondaka vi sangiwa kelivulu lia Tiago 4:8, via ndi vetiya calua. Ocinimbu caco ci popia ndoco: “Ameli ku Suku kuenje eye amela kokuene.” Nda limbuka okuti nda nda amela ku Suku, ndi pondola oku kuata vali ekalo liwa. Noke, nda liwekapo oku sipa akaya, olodroga kuenda oku nyua ovina vi koluisa.​—2 Va Korindo 7:1.

Nda siapo akamba vange vãvi kuenje, nda fetika oku kuata ukamba lafendeli va Yehova. Ukulu umue wekongelo wa kala oku ndi longisa Embimbiliya, wa ndi kuatisa calua. Eye wa enda oku ndi telefonalela, kuenda olonjanja vimue wa enda oku siapo upange waye oco a ndi nyule. Kuenje, wa linga ekamba liange lia velapo.

Kunyamo wo 2001, kotembo yonjovo, ame kumue la vamanjange vavali, tua litumbika ku Suku poku papatisiwa. Olonjali viange kumue la vamanji vekongelo va kuata esanju lialua omo epata lietu, lia likongela koku fendela Yehova.

Ndaño nda simĩle okuti olonumbi Viembimbiliya vi ndi tateka oku kuata elianjo, pole, via siata oku ndi teyuila. Embimbiliya lia nyĩha ongusu yoku siapo ocituwa coku fenya olodroga loku vi landisa, kuenje cilo ndi kuete ovituwa viwa.

Ndi kuete esumũlũho lioku tiamẽla kongongela yafendeli va Yehova voluali luosi. Afendeli vaco va lisole pokati, kuenda va likuete omunga koku vumba Yehova Suku. (Yoano 13:34, 35) Pokati ka vamanji vaco, nda sangapo ukãi wange Adrianne, una ndi sole calua. Omo liaco, tu kuete esanju lioku vumbila kumosi Ululiki wetu.

Ndaño nda enda oku tẽlisa lika olonjongole viange muẽle, cilo nda litumbika kupange wakundi votembo yosi oku longisa omanu oco va kuatisiwe Londaka ya Suku. Upange waco u ndi nenela elavoko lia velapo. Ndi pondola oku popia siti, Embimbiliya lia pongolola omuenyo wange. Momo cilo nda sanga elianjo liocili.