Kosimbu ondaka yaco va enda oku yi tiamisila kulume una okuti, wa soviwa. Kosimbu alume vamue va enda oku soviwa ndondimbukiso yoku kangisiwa, yoku kuatiwa kuyaki ale upika. Alume vana va koleliwa okuti va soviwa, va kuatele ocikele coku lava olonjo viakãi kelombe liolosoma. Ndeci va enuku Hegai kuenda Siasigase va tambuile ocikele coku lava akãi kuenda akama va Soma Ahusuero yo ko Persia, una wa nõliwa oco a linge Xerxes I.​—Ester 2:3, 14.

Pole havosiko Embimbiliya li tukula okuti va enuku, va soviwile. Olonoño vimue via popia hati, ondaka yaco va enda oku yi tiamisilavo kapalanga va kuatele ovikele kelombe lia Soma. Eyi oyo onduko va tukula Evede-Meleke una wa kala koloneke via Yeremiya kuenda ulume una u Etiopia Filipu a kundila. Evede-Meleke ci tava okuti wa kuatele ocikele ca velapo momo wa kuata omoko yoku vangula la Soma Sedekiya. (Yeremiya 38:7, 8) Kuenda ulume u Etiopia wa tukuiwa okuti kalei kanene, una “wa endele ko Yerusalãi oku ka fendela.”​—Ovilinga 8:27.

Yesu eci a tukula otembo yesombiso li keya kovaso yoloneke, wa popia hati: “Eci Mõlomanu eya lulamba waye . . . omanu o va tepa pokati okuti va likaila, ndeci ungombo a tepa olomeme lolohombo.” (Mateo 25:31, 32) Momo lie angombo va enda oku tepela ovinyama viaco?

Ocili okuti olomeme kuenda olohombo via enda oku kongeliwa kuenda oku lisiwila kumosi vokuenda kueteke. Kuteke via enda oku kongeliwa pocitumãlo cimuamue oco vi teyuiwe kovinyamo viatema, kovingumba kuenda kombambi. (Efetikilo 30:32, 33; 31:38-40) Pole, ovisoko evi vivali viovinyama via enda oku kapiwa voviunda via litepa oco va teyuile olomeme omo vionjuka calua, oco ka vi ka lemehiwe lolohombo. Elivulu losapi (All Things in the Bible), Ovina Viosi Vembimbiliya, li lombolola okuti, angombo va endavo oku tepa olomeme lolohombo eci vi cita, poku vi kanda asenjele kuenda poku vi pemula. Olusapo lua Yesu lua vetiya olonjeveleli viaye momo ocituwa coku lisa olomeme lolohombo ca siatele calua pokati ka va Isareli kosimbu.