Umãlehe umue ufeko, wa mola owisi wa kala oku tunda vonjo yoku panga ovikuata, kuenje owisi waco wa kala oku lisanduila vilu ndalende. Eye o sokolola kuenda o popia ndoco: “Tala, onjo yimue yoku panga alende!” Elomboloko eye a kuata citava okuti li koka ovinjola. Pole, nda ka tua kuatele elomboloko liovina via velapo, ci pondola oku nyõla omuenyo wetu. Nda okuti kua tangele ciwa onduko yovihemba vimue, ci pondola oku ku nenela ovitangi.

Nda ka tua kuatele elomboloko liwa liovina viatiamẽla Kembimbiliya, ci koka ohele yalua. Omanu vamue ka va kuatele elomboloko liwa liovina Yesu a longisa. (Yoano 6:48-68) Omo liaco, ka va sandele oku lilongisa ciwa ovina viaco, kuenda va nõlapo oku yuvula oku tava ovina Yesu a longisa. Ocili okuti ovina va linga, vi sumuisa calua!

Anga hẽ, o kuete ocituwa coku tanga Embimbiliya kuenda oku ecelela okuti olio li ku songuila? Ci kuete esilivilo oku ci linga. Pole, anga hẽ kua siatele oku kuata elomboloko liwa liolondaka vimue vi sangiwa Vembimbiliya? Omanu valua va siata oku liyaka locitangi caco. Kũlĩhisa ovina vitatu vi pondola oku tu tateka oku kuata elomboloko liwa eci tu tanga Embimbiliya.

• Omanu vamue ka va kuete elomboloko liwa liocihandeleko Cembimbiliya cokuti tu sukila oku ‘sumbila Suku.’ Ovo va sima okuti Suku o tu kisika oku u kuatela usumba. (Ukundi 12:13) Pole, Suku ka yongola okuti omanu vo fendela va kuata ovisimĩlo viaco. Eye o popia hati: “Ku ka kuate ohele, momo ñasi love. Ku ka yokoke, momo ndi Suku yove! Ame hu kolisa, hu kuatisa.” (Isaya 41:10) Oku kuatela usumba Suku ci lomboloka okuti tu sukila oku komõha ovituwa viaye kuenda oku u sumbila.

• Omanu vamue ka va kuete elomboloko liolondaka vi sangiwa Vembimbiliya ndevi: “Momo ovina viosi vi kuete uvo wavio, . . . Eteke lioku citiwa kuenda eteke liokufa.” Ovo va sima okuti Suku eye o nõla eteke omunu a fa. (Ukundi 3:1, 2) Pole, ocinimbu eci Cembimbiliya ci lombolola lika ekalo liomuenyo wetu kuenda okuti eteke limue tu ka fa. Ondaka ya Suku yi longisavo okuti onjila tu nõla oyo yi lekisa nda tu kala lomuenyo ale sio. Embimbiliya li popia ndoco: “Oku sumbila Yehova kuamisako oloneke.” (Olosapo 10:27; Osamo 90:10; Isaya 55:3) Olondaka viaco vi lomboloka nye? Nda tu sumbila Ondaka ya Suku, tu ka yuvula oku linga ovina vi pondola nyõla uhayele wetu, ndeci oku nyua calua kuenda oku linga evĩho liukahonga.—1 Va Korindo 6:9, 10.

• Omanu vamue ka va kuete elomboloko liasuapo liolondaka Viembimbiliya eci li popia okuti ilu kuenda ongongo, “ya pongiyiwila ondalu,” momo va sima okuti cosi ci ka nyõliwa. (2 Petulu 3:7) Pole, Suku o likuminya okuti eye lalimue eteke a ka ecelela okuti ongongo yi nyõliwa. Suku, “wa seveta oluali koviseveto vialuo okuti ka lu sengiwa vali.” (Osamo 104:5; Isaya 45:18) Eye o ka nyõla ovina vĩvi via siata voluali lulo lua vĩha. Ovio vi ka nyõliwa otembo ka yi pui ndu okuti via nyõliwa londalu. Pole, ilu lalimue eteke li ka nyõliwa.

Ndomo ca lekisiwa vovolandu a tukuiwa, omanu valua ka va kuete elomboloko liasuapo liovina vimue va tanga Vembimbiliya. Pole, momo lie Suku a ecelela ovina viaco? Omanu vamue pamue va sima ndoco: ‘Nda Suku ukualondunge kuenda o kuete ukũlĩhĩso walua, eye o pondola oku tu ĩha elivulu limue mu sangiwa olondaka via leluka, oco omanu vosi va kuate lonjanga elomboloko. Momo lie eye ka ci lingila?’ Kũlĩhisa asunga amue a koka okuti omanu ka va kuata elomboloko liasuapo Liembimbiliya.

1. Embimbiliya lia sonehiwa lonjila yimue okuti ambombe kuenda omanu vana va kuete onjongole yoku lilongisa ovo lika va kuata elomboloko. Yesu wa sapuila Yehova hati: “A Tate, a Ñala yo kilu kuenda osi, hu sivaya, momo kua situluile ovina evi ku vakualondunge lava va lilongisa, pole, wa  vi situluila vana vomboka ndomãla.” (Luka 10:21) Embimbiliya lia sonehiwa lonjila yimue okuti omanu vana va kuete ovisimĩlo via sunguluka va pondola oku kuata elomboloko liesapulo lialo. Omanu vana okuti vakuakulitunula ndeci ‘olonoño kuenda vakualondunge,’ ka va tẽla oku kuata elomboloko liasuapo Liembimbiliya. Pole, vana okuti va kasi “ndomãla” ale vana okuti ambombe kuenda va sole oku lilongisa, va pondola oku kuata elomboloko liasuapo liovina Embimbiliya li longisa. Ocili okuti, Yehova wa lekisa okuti ukualondunge vonjila ndomo a panga Embimbiliya!

2. Embimbiliya lia sonehĩwila omanu vana va sanda ekuatiso lia Suku oco va kuate elomboloko lialio. Yesu wa lekisa okuti omanu va sukila ekuatiso oco va kuate elomboko liovina eye a longisa. Ekuatiso liaco lia ponduile oku eciwa ndati? Yesu wa lombolola hati: “Oñuatisi okuti espiritu sandu, yina Isia a ka tuma vonduko yange yi ko longisi ovina viosi loku wivaluisi ovina viosi ndo sapuili.” (Yoano 14:26) Omo liaco, Suku eca espiritu sandu, okuti ongunsu yaye ya pama oco yi kuatise omanu oku kuata elomboloko liovina va tanga Vembimbiliya. Pole, Suku ka eci espiritu liaye komanu vana ka va sandi ekuatiso kokuaye momo kokuavo esapulo Liembimbiliya li kasi ndu okuti lia tatama. Espiritu sandu li pondolavo oku songuila Akristão vana va kuete ukũlĩhiso walua oco va ka sandiliye omanu vana va kuete onjongole yoku lilongisa.—Ovilinga 8:26-35.

3. Omanu va pondola lika oku kuata elomboloko liolonepa vimue Viembimbiliya vepuluvi lina Suku a sokiya. Uprofeto Daniele wa vetiyiwa oku soneha esapulo limue li ka tẽlisiwa kovaso yoloneke. Ungelo umue wo sapuila hati: “A Daniele, yika olondaka evi, sitika elivulu liaco, toke kotembo yesulilo.” Vokuenda kuanyamo alua, omanu valua, va tanga elivulu lia Daniele, pole ka va kuatele elomboloko liaco. Ocili okuti Daniele ka tẽlele oku kuata elomboloko liovina eye a soneha. Eye wa lekisa umbombe poku popia hati: “Nda yeva, puãi ka ca ndombolokele.” Vokuenda kuotembo, omanu va fetika oku kuata elomboloko liocitumasuku ca Daniele, pole, ovina viaco via pita lika vepuluvi lina Suku a sokiya. Ungelo wa lombolola hati: “Kuende ño, a Daniele, momo olondaka evi via yikiwa, haivio via sitikiwa toke kotembo yesulilo.” Helie o pondola oku kuata elomboloko liesapulo lia Suku? “Layimue ondingaĩvi yi limbuka. Puãi kuava vakualondunge ci lomboloka.” (Daniele 12:4, 8-10) Omo liaco, Suku o situlula lika elomboloko liolondaka vimue Viembimbiliya eci ku pitĩla otembo ya sokiyiwa yoku kuata elomboloko liaco.

Anga hẽ Olombangi Via Yehova ka via kuatele elomboloko liolondaka vimue Viembimbiliya omo otembo ya sokiyiwa ka ya pitĩlĩle? Ocili. Pole, eci otembo Suku a sokiya yoku situlula elomboloko liaco ya pitĩlapo, Olombangi Via Yehova via pongolola lonjanga elomboloko liavo. Ovo va tava okuti, poku ci linga, va setukula ongangu yovapostolo va Yesu vana va lekisa umbombe poku pongolola ovisimĩlo viavo eci Yesu a va lungula.—Ovilinga 1:6, 7.

Umãlehe ufeko wa tukuiwa, poku sima okuti alende a pangiwa lowisi, ka kuatele elomboloko liasuapo. Pole, oku kuata elomboloko liovina Embimbiliya li longisa, ci kuete esilivilo lia velapo kokuove. Esapulo Liembimbiliya li kuete esilivilo lialua kuenje, ka citava omunu umue oku sima okuti o pondola oku kuata elomboloko liaco lika liaye. Omo liaco, sanda ekuatiso oco o kuate elomboloko liovina o kasi oku tanga. Sanda ekuatiso komanu vana va lekisa umbombe poku lilongisa Embimbiliya, vana va sanda ekuatiso liespiritu sandu lia Suku kuenda va kolela okuti va kasi kotembo yimue okuti Suku o yongola okuti omanu vosi va kuata elomboloko Liembimbiliya. Sapela Lolombangi Via Yehova kuenda tanga ovipama ovo va siata oku konomuisa vi sangiwa vonumbi yetu yo Internet, jw.org. Embimbiliya li likuminya hati: “Nda o sandiliya ukũlĩhiso . . . , o sanga ukũlĩhiso wa Suku.”—Olosapo 2:3-5.