AMAMAKO OKU LAVULULA!

Vakuapulitika va Eca Elungulo Liatiamẽla ko Harmagedo—Nye Embimbiliya li Popia?

SIKA

Keteke 10 vo Sengunda komẽle yosãi ya Mbalavipembe 2022, o Russia ya fetika oku linga uyaki lo Ukrânia. Uyaki waco etambululo lietenda limue linene, lia imbiwa noke yoloneke vivali okuti lia nyõla onepa yimue yalua ya tiamẽla ko Russia kuenda ko Krimeya. Ovina viaco viosi via lingiwa omo lialungulo a vakuapulitika okuti, oluali ndopo lu sulila vuyaki wo Harmagedo.

“Ka tu kasi oku liyaka luyaki wo Armagedon tunde eci [John F. ombiali yo ko Estados Unidos] tunde kotembo ya Kennedy kuenda atenda a imbiwa lo lokubanu . . . Si tava okuti ci tẽliwa oku yaka luta umue unene, okuti ka ci kasulila vuyaki vo Armagedon.”—Ombiali yo Estados Unidos Joe Biden, 6 Mbalavipembe, 2022.
“Ndi tava okuti eci ci lomboloka uyaki wo Harmagedo; eci ci kasi oku kapa kohele oluali luosi.”—Volodymyr Zelensky, ombiali yo ko Ukrânia, ya popia eci catiamẽla kovitangi vioku talavaya latenda anene, BBC News, 8 ya Mbalavipembe, 2022.

Anga hẽ atenda anene a ka nena uyaki wo Harmagedo? Nye Embimbiliya li popia?

Anga hẽ atenda anene a ka nena uyaki wo Harmagedo?

Sio. Ondaka “Harmagedo,” yi moleha lika onjanja yimosi Vembimbiliya kelivulu Liesituluilo 16:16. Ondaka yaco ka yi tiamisiwila kuyaki umue wolofeka, pole yi tiamisiwila kuyaki wa Suku kuenda “kolosoma vio kilu lieve liosi.” (Esituluilo 16:14) Pocakati cuyaki wo Harmagedo, Suku o kamalako ovoviali osi vomanu.—Daniele 2:44.

Oco o kũlĩhe ovina vikuavo viatiamẽla kovina vi ka pita longongo vuyaki wo Harmagedo, tanga ocipama losapi Uyaki wo Harmagedo u Lomboloka Nye?

Anga hẽ ongongo kuenda omanu va ka kunduiwa latenda anene?

Sio. Citava okuti olombiali viomanu vi ka talavaya latenda anene kovaso yoloneke, pole Suku ka ka ecelela okuti ongongo yi kunduiwa. Embimbiliya li popia ndoco:

“Ongongo yamamako otembo ka yi pui.”—Ukundi 1:4.
“Vakuesunga va ka piñala ilu lieve, kuenda va ka kalamo otembo ka yi pui.”—Olosamo 37:29.

Pole ovitumasuku Viembimbiliya kuenda ovina vi kasi oku pita koloneke vilo, vi eca uvangu wokuti tu kasi koloneke via sulako. (Mateo 24:3-7; 2 Timoteo 3:1-5) Limbuka eci Embimbiliya li popia catiamẽla kovaso yoloneke lekuatiso lielilongiso Liembimbiliya li lingiwa ocali.