Kosãi ya Kuvala yunyamo wo 2012, Olombangi Via Yehova via landisa o wotele yi tukuiwa hati Bossert. Olosapi via eciwa komanu va yi landa kuenda ya pĩtilapo otembo yoku longeka kuenda oku siapo ocitumãlo. Olombongo viaco vi ka kuatisa kupange woku longisa Embimbiliya u lingiwa Lolombangi Via Yehova.

Osapalalo yaco ya lepele calua okuti ya lisetãhala levi vioko Italia ya landisiwa omo okuti Ombala Yolombangi Via Yehova ka yi kala vali vo Brooklyn, Nova York pole, yi yilukila ko Warwick, Nova York. Epongoloko liaco li ka ambata anyamo alua.

Ulume umue o tukuiwa hati Louis Bossert, volupale wo Nova York wa tunga o Bossert kunyamo wo 1909. Wa yi tunga locimãho coku kala o wotele okuti yi kuata olohondo omanu va pondola oku kalamo kuenda olohondo vikuavo viakombe. Omo okuti vosapalalo yaco mueya oku kala omanu valua, kunyamo wo 1914 yeya oku vokiyiwa. Kunyamo wo 1916 kilu liosapalalo yaco kua vokiyiwa o bare yimue yitukuiwa hati Marine Roof.

Oku pisa kunyamo wo 1980, Olombangi Via Yehova via landa kuenda via pongolola osapalalo yaco, oco vamanji vana va kala oku talavaya kombala Yolombangi Via Yehova voluali luosi va kalemo. Olohondo vina via kala viofesta, via pongoluiwa oco vi kale olohondo vioku lilamo, kuenda obare ya kala kilu yosapalalo ya linga ohondo yoku tambuila akombe.

Tunde kunyamo wo 2010, kosapalalo yaco oko kua enda oku sikĩla Olombangi Via Yehova via tunda kolonepa viosi violuali okuti veya oku nyula ofiliyale yaco.

Omunu wa landa osapalalo yaco cilo, o yongola oku yi pongolola oco yi kale owotele. Omo okuti o sapalalo yaco handi yi kasi ciwa, ci ka leluka oku yi pongolola oco yi linge o wotele.

Osimbu handi Olombangi Via Yehova ka via landele osapalalo yo Bossert, pa pitile ale otembo yalua okuti, osapalalo yaco ka ya tatiwuile ciwa. Ovimano viaco okuti via kuatele evala liyela, via fetika oku sĩla, kolonele viokilo yosapalalo yaco kuenda ovimano viaco via kala oku nyolẽha. Olonjanela via kala viosimbu kuenda ofela ya enda oku iñila kolonele. Osapalalo yaco ka ya tatiwile ciwa. Omo liaco, kua fetikiwa upange woku tumbulula osapalalo yaco. Olombangi Via Yehova via tunda kolonepa viosi vioko Estados Unidos va lieca olumue kupange waco kuenda va talavaya lovoloño avo toke eci upange waco wa pua kunyamo wo 1991.

Vokuenda kupange waco woku tumbulula, ovimano via tungiwa lovawe via yelisiwa kuenda via semuluiwa. Ocimano ci kasi kolonele vio kilu via piñanyiwa lovimalẽho via pangiwa lovindalasa via lela. Kua kapiwa olonjanela viokaliye.

Vokati kosapalalo yaco, mua tumbuluiwa capiãla enene vo citumãlo co ku tambuila omanu okuti eposo liaco lia nyolehẽle. Oco ku tumbuluiwe ovimano viovawe, va talavaya lovawe a tunda ko Itália. Ovina vi finisa olusoka okuti via nyolehẽle via pangiwa.

Ocitangi ca kala kolongunji viutale via kala vohondo yoku tambuila omanu. Va malusula oku linga upange waco poku kuama uloño wo ko Italia u tukuiwa hati Escaiola okuti yi lingiwa logesso. Pole ologunji viaco via pindaliwuile olonjanja vialua lomanu vana va kalamo tete, kuenda laumue wa kũlĩhile uloño woku talavaya lo escaiola. Onjo yoku soleka alivulu osikola ya velapo yi kasi ocipepi, ya undika elivulu limue li lombolola ndomo ku lingiwa ewe liaco. Omo liaco, olomesele via talavaya olosemana vialua oco va kape ogesso toke ologunji viaco via fina ndeci via kala kosimbu.

Eci va mala oku tumbulula osapalalo yaco kunyamo wo 1991 oyo ya finile calua. Omo liaco o Bossert ya tambula onima yimue yi tukuiwa hati, Lucy G Moses, omo liupange uwa woku yi tumbulula.